【少少甜】扑野扑得你心碎: 十八

朝早十點半，我同Lucy食完個早餐，買左十幾份報紙然後返到公司，見到門口有中年婦女企左響門口等候。
 
「你地係立生偵探社？」中女婦女問。
 
「係呀。」Lucy回答，我負責開門。
 
「撞鬼你地咩，你地張傳單上面明明寫住早上十點開門，我響左半粒鐘都唔見人，仲以為咁快執左粒。」佢拎住我地既傳單講。
 
「唔好意思，我地咁岩有d事，所以……」Lucy恭維地說，「呢位小姐點稱呼呀？」
 




「我姓錢。」中年婦女答。
 
「哦錢小姐，咁不如我地入黎office先傾呀。」Lucy帶錢小姐入黎既同時，我就已經斟好茶。
 
「錢小姐飲茶。」我端上茶，「唔知你黎搵我地我地幫你查d咩呢？」
 
「我懷疑我屋企隻貓女被出面d貓公搞大左個肚，我想你地幫我搵出究竟係邊隻貓公做，搵佢出黎之後，我要閹左佢。」
 
「咁……出面咁多流浪貓，好難搵架喔。」我說。
 




殊不知錢小姐又指住我地張傳單價目表一欄，聲大大咁講:「你地呢度寫搵貓搵狗收費兩千，拿，只要你地幫我搵到搞大我個貓女個肚果隻衰貓，我就俾你地一萬。」
 
話音剛落，Lucy就搶住答：「好！好！就咁話！錢小姐你俾幾日時間我地，我地一定將果條負心貓搵出黎！」
 
我睥左Lucy一眼，心諗：咁都接，唔撚野下話。
 
「錢小姐，不如你講多d成件事既細節我聽下。」Lucy對住錢小姐烚熟狗頭咁既樣。
 
然後錢小姐一輪嘴講足大半個鐘，由佢隻貓岩出世講到去五歲大，再講埋佢細個養過既貓，花左幾多功夫最後先送到個八婆走。
 




「喂，Lucy點搞呀？一街都係貓點搵呀？」錢小姐一出門口，我就對Lucy講。
 
「你陣間去佢屋企樓下睇下有咩流浪貓出沒，通常都係d大貓做架啦。」
 
「我？咁你呢？」
 
「我下晝要去永泰的骰貓溫泉中心，所以麻煩你啦。」Lucy補充，「仲有呀，你搵完貓順便去黎生屋企拎黃麗麗身前d物件返黎查下，跟住再去黃金商場度搵個叫Jack既人。」
 
「Jack？乜水黎架？」我問。
 
「琴日我響黃大濤電腦協會度識架。我將黃麗麗生前所有社交網站AC俾佢，拜託佢幫我查下死者生前響網絡上接觸過既所有人。」Lucy說，「點知佢咁快就搵到曬所有Record，叫我下晝過去拎。」
 
「點解唔叫佢用send俾你？」
 
「佢話檔案太大send唔到。」




 
「係真唔係呀，定係佢見你靚女想借頭借路溝你下話。」我笑說。
 
「唔好咁多廢話啦，快d去搵貓啦！」
 
Lucy返到座位打開頭先買返黎既報紙仔細閱讀關於昨晚長洲全裸女屍既報道。
 
我靜靜離開，前往錢女士提供既地址搵貓去。