【少少甜】扑野扑得你心碎: 十九

響海心公園搵左兩粒鐘，終於俾我搵到疑似係搞大錢小姐隻貓果只貓公。
 
我用午餐肉引隻貓過黎，然後再影相send俾錢小姐確認下呢隻係咪佢要搵既貓。
 
隻貓既毛係橙黃色，身形唔算太大，估計應該都係1歲左右。
 
過左陣錢小姐打俾我。
 
「喂？張生呀？」佢打招呼道。
 




「係，錢小姐。」
 
「你頭先send俾我果隻貓呢，係佢啦，唔該你喔，咁快就搵到，你地公司效率幾高。」
 
「係咩？哈哈。咁隻貓係咪交返俾你處置呢？」我問。
 
「唔係！交比你地呀，幫我閹左佢，然后你影張相俾我做證明，完成曬我會過數落你地公司戶口呀架啦。」
 
「下？要我幫你閹左佢？但你之前好似凈係要我地搵貓咋喔？」
 




「係，但係我最近公司好多野做唔係好得閒，所以要麻煩你地幫幫手，呢兩日你地搞掂曬閹左佢之後我就會俾錢架啦！所以麻煩曬。」
 
「之但係……」
 
「唔好但係啦，係咁啦，唔講住，麻煩曬啦，拜拜！。」講完，錢小姐就收左線。
 
吃飽之後，隻橙貓行左去樹蔭下訓覺，而我響隔離既垃圾站搵到一個紙箱，趁依家佢訓左我拿拿臨笠佢入個箱度。
 
隻貓驚到醒左響箱入面係咁掙扎而且仲發出淒厲既喵喵聲，我死封住個箱口唔俾佢出黎，過左陣佢好似停止左反抗。
 




我拎手機睇下時間，原來已經下晝兩點，我lunch都未食，陣間仲要去深水埗搵果個阿jack跟住又要入元朗搵黎生，身心有點疲倦既我不禁深嘆一口氣。
 
「夠膽你就閹我，睇下我殺唔殺你全家？！」
 
突然我聽到有人好似同我講野。
 
「夠膽你就閹我，睇下我殺唔殺你全家！」
 
我再豎起耳朵認真聽下，好似真係聽到有人同我講野，。
 
「夠膽你就閹我，睇下我殺唔殺你全家！」
 
但我附近人影無個，照計唔會有人同我講野架？
 
「夠膽你就閹我，睇下我殺唔殺你全家！」




 
我越聽個心就越慌，果個人不停重複同一句駭人既說話。
 
「夠膽你就閹我，睇下我殺唔殺你全家！」
 
我諗我都係晏就無食飯出現幻聽姐。

再隔左幾分鐘，果把聲音講多幾次就消失左，我準備去下個目的地，黃金商場。