《我竟然同左一個陌生男仔去歐遊...》: 《意大利篇- 佛羅倫斯 Firenze (3)》

我地離開隧道之後，穿過一條條既大街小巷，就好似置身係中世紀歷史古城入面。

佛羅倫斯周圍都係統一以淡黃色為基調既建築物，帶有少少殘舊既感覺，同遠處微微突出既聖母百花大教堂圓頂形成一種對比。




呢度就係我期待已久既佛羅倫斯，一直聽人講係佢地喺意大利最中意既一個地方。

唔熟悉歐洲既人，可能只會聽過意大利有羅馬既鬥獸場，威尼斯既水都，同米蘭既購物天堂。



ViuTV上一年有一個熱播既節目《跟住矛盾去旅行》，連詩雅同葉蘊儀就係黎左佛羅倫斯，對嗰個節目既印象，大概只有連piece雅如何充分地用佢完美既偽ABC口音去同人溝通，同讀得好錯既意大利文。

話就話係旅遊節目，其實都冇咩認真咁講過個城市。

而我第一次聽到佛羅倫斯呢個名字，係細細個係外國睇TVB既《衝上雲霄》，套劇有係佛羅倫斯取景，講述Sam哥同Belle既愛情故事。

自嗰陣開始，我就對呢度存有無數既FF，估唔到我歐遊既第二個目的地就係佢，隔離仲要多左個陌生人，差啲以為自己幫TVB拍緊劇。

只要朝住棗紅色圓頂既方向行，即使冇任何科技既協助，都好容易就走到去人群既集中地。


 
途中經過左一個小市集，見到當地人好悠閒咁買菜，買生果，買花，就好似同兩街之隔既遊客區冇任何連接同關係咁。

我係度諗，如果老左既我退休黎呢度住，我既生活大概就好似佢地咁，拎住個藤籃黎買餸，再返去自己個棟黃黃舊舊既閣樓，咁就一日。

其實我地一路行，都幾dead air，所以我開始搵啲話題黎講。

「喂，如果你退休會唔會揀黎呢度住？」我好奇問Nick。

「我黎左幾個鐘咋喎，咁快要決定我既人生大事？」



「不過真係住係呢度既話，就好似返左十六世紀咁，好唔真實。」

「但總好過係香港日日對住一棟棟既高樓大廈，伸手都掂到你鄰居，個種窒息既生活掛？」我歎左一口氣。

「傻妹，你講得冇錯，香港只適合有錢人住，係香港有錢既話，真係可以擁有一切，除左真普選啦，哈哈。」

明明佢只係大我一年，就開門埋口都叫我傻妹，當我細路女咁。

「但信我，你係歐洲留得耐左，就會掛住一碗簡簡單單雲吞麵既味道。」

穿過市集，繼續往前行，已經開始見到好多拎住相機周圍影既遊客，佢地都集中係聖母大教堂（Cattedrale di Santa Maria del Fiore）既周邊。

呢個並唔係一個普通既教堂，佢係由多棟建築物組成，將主教堂，洗禮堂，同鐘樓巧妙咁結合成為一體，形成整個建築群，所以面積非常之大。





「癡線！呢度真係好靚好宏偉，比起米蘭大教堂有過之而無不及！」我不禁讚歎。

廣場街道既旁邊，都係一間又一間既餐廳同紀念品店，一睇就知係吊高黎賣賺遊客錢個啲。

唯獨是前面一間正對住主教堂既鋪頭，有好多人排緊隊，我見狀，就即刻同Ｎick行去睇下究竟係咩黎。

原來又係一間Gelato店！依家天氣咁熱，唔怪得咁多人排隊。

「不如到我請返你食雪糕，呢間咁多人排，應該唔會伏得去邊度掛？」其實就算Nick話唔洗我都會照買，學佢講黎到意大利，唔係唔食雪糕啊？

「乜你咁為食架？如果佢有Vanilla味我就食，唔係既話我睇住你食都冇所謂。」

又係Vanilla，真係咁好食咩？定係習慣左一種味，就唔會想轉黎轉去？或者佢對食呢方面，真係咁專一啦。



前面堆滿左好多人，生得唔高既我要逼到好前先望到個menu。原來佢地有Fresh egg and Vanilla，一睇就知岩曬Nick。

我就比佢另一種味吸引，Fresh egg and White Wine。我特登揀左杯裝，費事又食到成手都係，到時又比Nick機會幫我抹嘴。


「呢隻味一定啱你。」我將面前既雪糕遞比佢。


「聞落去又幾香雲尼拿，我信住你先。」說罷佢就即刻筆左一羹雪糕食。


「又真係唔錯，你都試下。」




佢好快手咁將個膠匙羹遞到我口邊，我都好自然咁張開口比佢喂。

越平凡既小動作，越容易令人想入非非。

*

整個下午，我地跟住係遊客中心拎既地圖，將市內主要既景點參觀左一遍。

比較值得留意既係領主廣場（Piazza della Signoria），擺放左好多經典雕像既複製品，包括最出名既”大衛像”，同位於廣場一角既烏菲茲美術館（Galleria degli Uffizi）。

佛羅倫斯作為文藝復興既溫床，我地都唔可以浪費呢次機會，係香港有幾多機會可以接觸藝術？以現時梁特首領導下既特區政府，發展藝術呢方面只會被視為浪費政府資源。

為左令我地既旅程徒添幾分藝術氣息，我地都係選擇入美術館參觀。

不過因為我地冇預先上網買飛，而正值旅遊旺季，所以都用左好多時間排隊。



雖然中學時期有略略修過Art，對於唔同類型既畫作都有基本認識，Renaissance呢個字細細個就聽得多，但並冇深入瞭解過，人地話，文藝復興既精華，都集中曬係呢度。

作為意大利最大既美術館，入面既藏品非常豐富，聽聞多達2500件作品，就連整個天花板都充滿住彩繪，亦有香港人好熟悉既達文西，米開朗基羅，拉斐爾等等既真跡。

行到某個迴廊處時，我見到對面一座好靚既橋，原來就係著名既老橋（Ponte Vecchio）。



因為我同Nick喺美術館分開左行既關係，只剩我望住呢座帶住中世紀味道既石橋。

計埋排隊既時間，我地差唔多用左下半個晏晝係美術館，雖然我地參觀完之後都開始有啲肚餓，但我真係好想近距離咁欣賞老橋既日落，所以Nick都好遷就我陪我去。

美術館離老橋並唔遠，基本上行五分鐘就到。我地去到阿諾河畔（Fiume Arno）， 嗰度大概係觀賞老橋最好既地方。

正當我默默地凝望住黃昏下既老橋，Nick突然問我：

「你想唔想聽一個故仔？」