《我竟然同左一個陌生男仔去歐遊...》: 《意大利篇- 佛羅倫斯 Firenze (4.1)》

「咩類型既故仔？唔好諗住無端端講鬼故比我聽。」


「係一個關於暗戀既故事。」


「暗戀？咦，唔通係你既真人真事？」我即刻對Nick投以狡猾既笑容。


「的確係真人真事，不過唔關我事。你知唔知但丁係邊個？」




「梗係知！神曲既作者吖嘛，我早幾年真係想試下睇佢既作品，奈何我文學造詣有限，阻止左我。」


「我就係想講但丁既故事。係神曲入面，有一位仙女般既女子帶領但丁由煉獄去到天堂，佢既名叫做Beatrice，而佢係一個真實存在過係但丁生命裏既人。但丁一生只見過呢個女仔兩次，雖然有兩種唔同既說法，有啲人話佢地九歲已經相遇，但我想講我中意嗰個版本。據說但丁第一次遇見佢，就係喺我地依家望緊既老橋上。」

我望住對面既老橋，接近黃昏時分漸漸散去既陽光灑落係佢身上，令本身淡黃色既佢發出金黃色閃耀既光芒。我腦裏幻想住但丁遇見呢個女仔既場景。




「即係但丁對佢一見鍾情？咁第二次呢？」


「第二次已經係九年後，佢地係佛羅倫斯既街道上再次相遇，但此時既
Beatrice，已經貴為一個銀行家既妻子。Beatrice見到但丁，只係好簡單咁問候左佢一句，自此佢地再冇任何交集，冇耐仲過左身。不過佢並冇係但丁既心裏面消失，但丁對佢既愛慕，由第一眼見到佢開始，就冇減弱過，反而越黎越強烈。雖然後來但丁亦都有另娶他人，但世人都相信佢最愛既始終係Beatrice。但丁以Beatrice為靈感寫左《新生》，後來亦係神曲入面賜予佢一個唔可以被替代既地位。不過無論係邊個版本都好，但丁確實對佢係一見鍾情。」

原來係一個關於一見鍾情既故事。

Nick講故事既聲音好溫柔，就好似佢係我耳邊輕輕訴說咁。



其實我一直覺得一見鍾情係一樣頗為膚淺既事，一個人只係比另一個人既外貌同軀殼所吸引，並唔瞭解真正既佢，又點可以真心鐘意佢？

我腦海飄過左唔同既想法，最尾都係懶幽默咁答阿Nick：

「呢個故事咁似講緊依家既女神同兵既？雖然咁講好似有少少侮辱左但丁既感情，但佢令我諗起Juno首念念不忘，你有冇聽過？ 」 

” 那故事倉促結束不到氣絕便已安葬，才成就心裏那道不解的結沒法釋放。”

我清唱左一小段歌詞。

「不過係呢個故事入面，其實只有但丁對佢念念不忘，係唔係？」

我自己心入面都有個答案。

「其實我係Juno既fans，呢首咁hit點會未聽過。的確我覺得女方並冇對但丁有同樣既感情。”其實你是一幅畫，狠狠往這舊人心上掛。”之後有一個英國畫家，真係將佢地喺老橋相遇既畫面，化作成一幅油畫。」



Dante and Beatrice by Henry Holiday （白衣女子為Beatrice）



「你好似好有感觸喎，你係咪有相似既經歷啊？」

其實我地始終都係算啱啱識，所以之前一直唔敢開口問佢既感情生活，但係咁浪漫既氣氛下，我都按捺唔住我既好奇心，想八卦下Nick既感情狀況。
「我點會有但丁呢啲咁淒美既經歷，我只係一個普通人，我一生都好平凡。」

我好想直接問佢有冇女朋友，但始終冇開到口。

「平凡唔好咩？又係你講既，簡單對你黎講就係最好既野。或者我同你唔同啦，喺我人生入面發生過太多事，好多都係一般人一世都唔會經歷到既野。我細細個既時候，一直不甘平凡，覺得自己係一個好特別既存在，諗返起其實都幾傻。當我大個左，經歷多左，漸漸領會到平淡已經等於幸福，就好似細水長流既愛情咁。」

嗰刻我好想將我既感受講曬比Nick知，即使咁樣唔似平時傻更更既我。




「傻妹，頭先仲話我好感觸，明明你先係感觸嗰個，不過又睇唔出你都有呢一面，仲要記得曬我講過既野。」


「係啊，平時我連自己電話擺喺邊都唔記得，但人地同我講過既野，唔知點解我記得好清楚。」


「都開始夜喇，我地去食野好冇？」Nick好似唔想再觸及呢個話題。


之後佢帶左我去老橋附近一間食T-Bone牛扒好出名既餐廳，聽聞係最正宗既一間，出名既餐廳，自然多人慕名而來。

當我諗又要好似晏晝排美術館咁排，我都有啲想走既衝動，但估唔到既事情總會發生，侍應話嗰晚預訂既人比平時少，所以可以開放多啲位比排緊隊既人。



就係咁，我同Nick就食到傳說中的T骨，果然名不虛傳，至少我係咁覺得。

嗰次都應該係第一次作為客人既我，唔可以自己決定牛扒既生熟程度，因為正宗佛羅倫斯T-Bone基本上都係統一唔會超過三成熟，咁先保留到佢柔嫩多汁既口感同風味，唔食得太生肉既人，千奇唔好亂試，因為入面真係血淋淋。


「上次你請左我，今次到我喇。」


埋單既時候，Nick問都唔問我一聲就拎左自己張卡出黎比錢。


「上次我請你係因為你幫左我，I insist。」我即刻拎張20歐羅紙幣比佢。


「唔好咁啦，下下都計得咁清楚。一係咁，你依家正式再差我一餐飯，我都堅持。」




我唔會拗得贏Nick，比佢焗住要我擺返啲錢入銀包。

*

雖然天色漸夜，我地都係覺得要慢慢散步返Hostel先可以消化返胃裏面1KG既牛扒。

喺佛羅倫斯經過得最多既地方，應該就係共和廣場（Piazza della Repubblica），佢原本好似係古羅馬時期時一個城鎮既廣場，唔需要特登搵路佢都老是常出現。

最吸睛既係嗰道貌似凱旋門既大門，仲有帶有童話色彩既旋轉木馬，建築風格同主教堂廣場嗰度完全唔同。

晏晝既時候已經行過呢度，但入夜既佢顯得更為迷人。夜幕下，古樸既城門襯托住旁邊亮起燈既旋轉木馬，完全冇格格不入既感覺。



因為附近係商業區，呢個時間既佛羅倫斯比日頭少左一份擁擠感，大概係好多人都係食完晚餐之後行過黎散步，放低左平時急促既步伐。

廣場上有好多彈奏樂器既街頭藝人，同坐低欣賞音樂既遊人。

一段又一段唔同既旋律不停地飄過我地耳中，我都冇細心咁去聆聽，唯獨是不遠處既琴聲，引起左我既注意….