《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (1.1)》

喺意大利既最後一晚，有驚無險地過左。除左收拾行裝，仲要收拾心情向我地既下一個目的地出發——法國。

以前既我，確實講過對長途巴士係可免則免，但當呢個比其他options平成幾倍既話，慳妹如我又點會忍心比貴咁多。

而嗰次我地更加好彩，咁啱喺BlaBlaCar，一個carpool既service度搵到順風車，所以我地由佛羅倫斯，搭左大約六個鐘車去法國尼斯（Nice）。

一開始覺得Carpool呢樣野其實幾危險，真係隨時比人賣豬仔都唔知咩事，但見又有幾多好評又剩，人一世，物一世，乜都要試下。

嗰架係五人車，除左我地同司機仲有兩個人，睇落都係背包客，不過我地全程都冇講過野，我同Nick喺車度又冇乜好傾，所以大家都戴住耳機，閉上眼聽歌，幾乎就係咁樣喺沉默過左成六個鐘，夜晚九點幾先到尼斯。



我仲記得嗰陣因為受Nick既影響，不斷聽返佢介紹比我既麥浚龍舊歌，到依家一聽返Juno既歌，歐洲既回憶就會湧曬出黎。

之前都提過下，法國同德國我只會略略帶過，因為真係冇乜特別既事發生過，怕悶親大家，所以喺度我大概同大家交代下去過邊度。

基本上我地喺法國既主要城市都有去到，尼斯，馬賽，里昂，當然唔少得好多女仔既dream city——巴黎，但都係嗰句啦，佛羅倫斯喺我心目中比巴黎更浪漫。

之後我地從巴黎搭火車去到柏林，不過喺德國逗留既時間比法國短，只係簡而精地遊走左一遍柏林，法蘭克福（Frankfrt）同科隆（Cologne）。

或者值得一提既，就係我地喺德國因為貪一時既小便宜而冇買到車飛，每人都被罰六十歐羅，可想而知我地之後既歐遊預算都係不斷退減中。



我地喺呢兩大西歐國家都過左兩個幾禮拜，連埋之前喺意大利既五日，原來不知不覺都同Nick識左有一段時間。

對我黎講，認識一個人同時間長短並無關係，而係你認識佢有幾深。

喺呢三個禮拜入面，我地話曬都朝夕相對，我對佢生活上既某啲習慣已經了如指掌。例如佢幾乎每日都會準時起身，訓教極有規律，唔會好似我咁禁熄嗰鬧鐘繼續訓；佢唔飲所有帶氣既飲品，呢樣就同我一樣。

仲有啊，佢越黎越中意叫我傻妹，好似已經變左佢對我既代號。

自問已經稱得上好瞭解佢，但當我諗深一層，似乎都係流於表面既野，佢心裏面有一層隔膜，我好似永遠都打唔開。



到最後一刻，我先知道，原來有啲事情，真係寧願自己從來都唔知，咁既話，我可能就可以一直呃自己。