《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (2.2)》

唔知大家有冇聽過free walking tour呢樣野？

基本上隨便喺街上，有時都會見到有人舉牌或著住寫有Free Tour既Tee，邊個都可以參加，導遊就會帶你喺城內主要景點都走一遍。

不過天下間哪有免費的午餐，佢地到最後都會expect你比返tips，當賺下外快。

有人問，其實唔比錢得唔得呢？冇話唔得既，你比人睇唔起係你既事，當然如果你覺得個導遊唔夠好，可以中途走人，不過呢種行為並不被鼓勵。

其實Free Tour唔只歐洲有，世界各地包括香港都有呢種所謂既免費步行團，只係大部分人都唔知道呢樣野既存在而已。



喺意大利我地一次都冇參加過，但到左法國德國後都比較積極參與呢種Free Tour，好彩既話導遊會帶我地去啲充滿local味道，旅遊書入面都冇，夠曬地道既地方。

而另一方面，亦都啱曬好學既人，因為導遊通常都會一邊行，一邊簡單咁講解下嗰度既歷史同其他fun facts。

「嗰度好似有個人舉牌，不如就join嗰個。」Nick指一指前方。

「嗯。」

雖然呢啲團質素可以好參差，不過都好難話提前查清楚，多數都係靠彩數，我地當然都遇過悶到好似機械人廣播既導遊啦。



通常比較engaging既導遊，都會叫大家好快咁介紹自己一次，十足十上tutorial第一堂比tutor逼self-intro咁。

嗰陣既導遊，係一個滿面鬚根同高到我要仰望佢既荷蘭男人，若果大家唔知既話，荷蘭擁有全球最高既平均身高，180既身高？或者人地小學六年班已經有。喺荷蘭既每一日，5’4既我都體驗緊小矮人既生活。

Tour既開頭例牌都係去市中心既著名景點，例如水壩廣場（Dam Square），皇帝運河（Keizersgracht），仲有我諗大部分人都好有興趣既紅燈區（Red Light District）。

紅燈區係最展現到荷蘭自由同開放既地方，坐立於兩條平行運河既中間。

一條條狹窄既巷道，會見到一間又一間既情趣商店同數不盡既櫥窗女郎光天化日之下搔首弄姿，空氣充滿著大麻既氣味。



我地跟著導遊既步伐，佢風趣咁講解荷蘭呢個奇妙既國家。一個充斥住性同毒品既地方，竟然係歐洲犯罪率最低既國家之一，罪犯之少令到荷蘭要將監獄關閉，聽起黎都有啲匪夷所思，似乎最危險既地方，就係最安全既地方。

不過喺紅燈區五光十色既背後，都有好黑暗既一面，例如人口販賣同誘騙啲外地女仔黎荷蘭，然後成為其中一個櫥窗女郎。


「如果你夜晚想自己黎呢度玩，我地可以分開行架。」我用戲弄既口吻同Nick講。


「我帶夠錢既話，真係諗得過喎，之前喺德國比人罰嗰六十歐羅都夠用啦。」


我即刻向佢投以鄙視既目光。


「拿，女人真係好口不對心，又叫人去，去又要嘈。」我地其實已經熟到講乜都得。



不過有樣野要提醒下大家，就係千祈千祈千祈唔好喺紅燈區對住櫥窗影相，好重要所以要講三次。否則部相機應該會被殘忍地分屍。

Tour喺紅燈區附近結束，因為個導遊非常風趣幽默，我地都好滿意佢既講解，所以比多左啲tips佢。

我地之後喺周圍既街道隨心而行，見到街道一角既Coffee Shop (if you know what I mean)，我向Nick作出一個提議…