《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (2.1)》

因為住得比較遠，我地又係一早就起身。

有時去旅行總係有種要爭分奪秒既壓力，但係對我地黎講，好彩大家都唔係chur住去旅行既人，盡可能都輕鬆啲，放慢腳步去欣賞周邊既環境，所以我地幾乎未試過為行程而爭吵，遇到一個好旅伴真係享受旅程既主要因素之一。

不過請容許我直接跳去早餐，晨運行去火車站既過程就等佢跳過啦。

我地依家食野真係好隨心，見到邊間啱食就入去，已經過左成日要上網搵好西食既日子。雖然時不時會中下伏，但亦有時會喺啲隱世小店搵到出面點都食唔到既味，嗰種成功感簡直不能言喻。


而嗰日，我地又好好彩食到一餐相當唔錯既早餐。



就咁睇落去，我嗰碟只係普通到不得了既頹餐——煎蛋，焗豆，煙肉，腸仔，冇辦法啦，荷蘭物價都唔平，成個menu最平就係佢。

成碟既精華在於煎蛋上面既seasoning，鹹度同香草味都恰到好處，最簡單既調味料，竟然帶出煎蛋最好食既一面，變左整碟既主角，大幅度拋離隔離既煙肉腸仔。（點解咁似啲造作食評）Nick嗰嗰wrap我真係唔記得入面有咩餡，總之餡有餡味。不過我再寫食評大概會被棄故。



印象中荷蘭周圍都有free-wifi，不過佢市中心發展得好完善，唔洗Google Map都會搵到主要景點，雖然嗰陣並唔知道阿姆斯特丹除左一道道既運河，其實究竟有咩，所以食完野就去左隔離既遊客中心睇一睇。

果然，荷蘭係一個思想極為開放既國家，除左眾所周知既大麻合法化，仲有最出名既紅燈區，sex museum嗰類景點。



其實如果一家大細黎呢度旅行，都幾尷尬，隨時帶小朋友行下街都會見到衣著性感既美女們喺落地玻璃後擺弄身段。

唯一合家歡既行為，應該係到市區外睇下鬱金香同風車，而呢兩樣野我地嫌麻煩，都冇做到。

其餘既？我諗我地都估唔到自己會咁放縱自己。