《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (3.1)》

喺Coffee Shop再坐多左陣，突然諗起，我地預訂左三點梵高博物館既門票，因為唔想再重演喺佛羅倫斯時候排隊既悲劇。

睇下時間，原來都差唔多兩點，雖然我地一早出黎，但去旅行嗰陣，時間總係唔見洗。不過好彩嗰日係星期五，博物館會開到夜晚十點，所以尚算有充足既時間，唔洗趕頭趕命咁去參觀。
 
梵高博物館係一個我期待已久既地方，大部分去過阿姆斯特丹既人都話，無論你對藝術有冇興趣或追求都好，呢度都係必去既景點之一。

對我黎講，佢比起之前喺意大利，法國等去過既更值得我用心去睇。其實個原因真係好幼稚，因為自從細細個上網無意中發現梵高同我同一日生日之後，我就開始特別留意佢。

唔知有冇人同我一樣，會對呢個1/366既機率有種奇怪既執著。



梵高博物館收藏左接近200幅 最珍貴既油畫，係世界上擁有最多梵高藏品既地方。整棟博物館高達三層，將佢唔同時期既作品按年份排列。
最為人熟悉既係《麥田》同《向日葵》，不過入去前需要寄存隨身行李，有明文規定唔可以影相。我建議入館之前用五歐羅租用佢既講解器，會對佢既畫作有更深入既認識，咁就唔會隨便兜一圈就走。
 
喺咁多我認識既藝術家之中，我覺得梵高係最令我著迷既一個，你可以從佢既作品，感受到佢喺唔同時期既經歷同心路歷程，佢既畫作就好似陪住佢一起成長咁。

好多人都話梵高係一個自割左耳既瘋子，但喺我眼中，佢係一個不被賞識既天才， 或者呢個都係好多藝術家既命運。雖然身為一個「瘋子」，但既畫作總係帶著鮮明既色彩咁去勾勒出佢腦海裏既世界。

我個人比較中意佢晚期既作品，受日本既浮世繪影響，佢不斷嘗試用唔同色彩配搭畫自畫像，即使嗰時係佢受困於精神致病既頂點，佢仍然用最鮮艷既顏色去畫出最陰沉既佢。

大概每個人，都有一個只有自己明白既執著。



我一邊行一邊拎住本細細地既notebook去記下講解器既內容，呢個係我開始歐遊後先培養既習慣。

我並唔係想扮咩文藝青年，只係想記得我去每個地方時明白到既事，所以即使到今日，我都可以好清楚寫低我參觀每個景點時既感受。

講返正題，多數去博物館呢種地方參觀時，我同Nick都會分開行，始終兩個人想睇既野好難會一樣，唯有跟住自己既節奏行，先唔會浪費喺入面既每一分鐘。

因為藏品多，人流又多，我其實都冇留意時間。我地約好左睇大概兩個鐘喺底層出口到見，但到我睇錶既時候，發現原來我已經喺入面留左兩個半鐘，我即刻好緊張咁衝返落樓下。

去到我地約定既地點，等左十五分鐘，期間我周圍望，但都見唔到Nick既身影。我拎手機出黎，諗住睇下嗰度有冇wifi可以等我聯絡到佢。



不過喺呢啲關頭，有一種情況總會出現——手機冇電。

Shit.

就咁睇或者只係一件小事，可能Nick只係好似我咁，睇到唔記得左時間。

但因為聯絡唔到佢，我竟然有種好無助既感覺。
 
*
 
嗰次應該喺我第一次嬲左Nick。
 
我坐喺對正出口既位，望住出入既每一個人，前前後後等左半個鐘，先等到佢出現。我見到佢出黎嗰一刻，直程想行過去打佢一身，或者連珠炮發咁用粗口鬧佢，可惜對住佢，我冇咁既勇氣啦。
 


「對唔住啊，對唔住，我行到唔記得睇時間，我真係無心，你係咪等左好耐？」
 
Nick雖然行到過黎，但佢好似驚我嬲，所以同我保持住一小段距離。
 
「耐就唔耐，不過本身以為係我遲到，所以我衝左落黎，估唔到你仲遲過我。我手機冇電，又借唔到charger。我差啲以為你發生左咩事。」
 
我好少真係會黑面，但我嗰刻嬲佢嬲到面無表情，同佢講野都冇正面望住佢。
 
「點都好，今次真係我唔啱，但可唔可以原諒我？你想我點補償都得架。」
 
佢既道歉好誠懇，並唔係好似一般人咁敷衍了事講一句Sorry就算。
 
雖然的確係嬲左一陣，但我都知並唔係啲咩大事，而我亦都係一個好心軟既人，所以我只係作勢打左佢心口一拳。
 
「以後唔好再要女仔等你。至於要點補償返我…...我要認真諗下。」


 
「冇問題，只要唔係犯法野我都會做。不過呢…你啱啱真係擔心我出左事？」Nick直直地望著我。
 
「係啊，依家手機冇電，擔心冇左個人肉地圖咋。」
 
我永遠都係咁口硬心軟。