《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (3.2)》

 
梵高博物館座落於博物館廣場（Museumplein）， 所以周邊都充滿住文藝氣息，廣場上有一大片草地，就好似一個中央公園咁，好多人就咁訓喺度享受夏天特別長既日照時間，聽講四月黎既話仲會見到可以媲美日本既櫻花海。
 


嗰度其實仲有國立博物館（Rijksmuseum）同市立博物館（Stedelijk Museum），後者相對冷清，但出到黎既時候，兩間都接近閉館時間，所以都與佢地無緣。
 
話說我係一個幾中意睇紀念品既人，不過除左postcard之外，其他我都只係window shopping。雖然另外兩間博物館都就黎關門，但賣紀念品既商店都仍然歡迎遊客入黎盡情消費。
 
我喺嗰度發現好多Miffy公仔既身影，記得細個時候都幾中意佢，但黎到呢度先知，原來係荷蘭出品，難怪連博物館既鋪頭都擺放住不同Miffy既紀念品。


 
Nick見我目不轉睛咁望著擺滿整堆Miffy既貨架，主動問我：
 
「乜你好中意Miffy架？不如我買隻公仔比你當補償啦。」
 
「你都傻既，仲當我細路仔咩，知唔知一隻公仔浪費我行李幾多位？」
 
「Sorry，你喺我眼中真係一個細路女。」Nick對住我做左個鬼臉。
 
「以為你中意叫我傻妹多啲添。」我輕描淡寫咁講。


 
Nick臉上既笑容突然褪去，我地兩個都冇再出聲。嗰次之後，佢好似再冇咁樣叫過我。
 
沿著廣場再行近國家博物館既正前方，又係另一個著名地標，就係「I Amsterdam」嗰個搶眼既紅白色立體雕塑，從字面上都睇得出係玩食字。
 
富有現代藝術色彩既字母被擺放於中央，但一啲都唔會顯得突兀。
 

 
咁吸睛既地標，當然引黎大量遊客影相打卡等等。個個都爭住同自己中意既字母影相。因為雕像既體積都頗大，好多人都要攀爬上去頂點嗰度留影，又令我諗返起之前喺米蘭大教堂既景象。


 
一開始我都想湊下熱鬧，同呢個標誌性既背景合影一張，但見到太多人狗衝去堆字母度，我只覺得喺米蘭既情況依家重演緊。
 
「你係咪想去影相啊？你唔介意既我可以做住龍友先喎，雖然我影相唔靚。」
 
Nick興致勃勃地向我提議道。
 
我正想回絕佢既時候，前面既「t」字咁啱冇人喺度，Nick即刻推左我一下：
 
「你快啲趁依家冇人爬上去個t度，嗰個角度影出黎應該幾好睇！」
 
我都黎唔切比反應佢就比佢推左出去，既然如此，咪把握下呢個機會。
 
不過問題係，個字母都幾高下，以我呢種平均身高要爬上去t橫線個位都有啲難度，我左試右試，都總係差小小。
 


「喂，不如算啦，我爬唔到上去啊！」我擰轉頭向住Nick大嗌。
 
Nick見狀，連答都冇答到我，就一支箭咁跑過黎，然後，毫無預警下，佢捉住我條腰，用雙手抱起左我。
 
「乜你咁冇用架，你捉住前面再坐上去啦。」
 
比著平時既我，聽到佢話我蠢啊，冇用啊呢啲字眼都會不爽，但佢一做埋呢種出乎我意料既事，我就講唔出腦海中想講既野。
 
「唔該曬。」我只能報以一個尷尬既笑容。
 
影完相落返黎既難度相對冇咁高，我只要一躍而下就得。
 
「頭先嚇死我咩，唔識你既話我差啲嗌非禮架喇。」我對Nick翻一翻白眼。
 
「邊個叫你啱啱唔上唔落啊，真係睇到連我都炆。不過你睇下張相影得幾好，完全影唔到路人，全靠我咋。」佢對佢既作品非常自豪。


 
我望一望佢用我部相機影既相，佢連續影左幾張，又真係我想要嗰種效果。
 
「好啦，我終於有張單人相可以po 喺instagram喇，之前嗰啲全部都係風景相，但又唔係影得靚過人，睇落去都幾悶。」我一邊講，一邊拎住部相機係咁噤黎噤去。
 
「係喎，一講起，我好似仲未follow你instagram，你有冇用開？」
 
「呃…都有既，不過好耐冇用喇。你follow我都冇野睇。」
 
呢個人相當有嫌疑。