《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (4.1)》

電車停喺中央火車站，阿姆斯特丹作為一個中西文化交匯既大城市，市中心嗰頭梗係咩都有得食，但估唔到，我地最尾竟然比一間中餐館吸引入去。

雖然我本身都唔係特別中意食中餐，但係黎左歐洲一段時間，日日都係食西餐居多，平貴都有，就係少食亞洲菜（除左有一次喺德國食左日本野）。

我諗喺外地留過一段時間既巴絲，應該會明嗰種對亞洲野既cravings。

荷蘭喺歐洲入面，都算係多華人移民既國家，所以周不時都會見到中文字既招牌。

我地去既係一間唔太起眼，喺角落頭既餐廳，入面既佈置都偏簡陋，門口仲有好傳統嗰啲掛住乳豬燒鴨既櫥窗。睇睇下menu都係以粵菜為主，應該係香港人開，而裏面既客人多數都係白人面孔，除左我地兩個之外，只有另一臺既亞洲人家庭。



我地叫野食既時候，唔知係咪我地個打扮似足香港人，侍應直接用廣東話問我地要食咩，雖然只係簡單既一句，但homesick既感覺即刻湧出黎。

當見到面前既叉燒飯同乾炒牛河，我頓時覺得佢地比魚子醬同安格斯牛扒更能吸引我既感官。食落去既每一啖，都係我最熟悉既味道。

*

嗰一日我地喺阿姆斯特丹都幾乎去曬最touristy嗰幾個地方，本身諗住食完飯直接返去Harrlem。

平時我都係比較精力充沛嗰一個，但連我都已經開始行到好攰，反觀Nick，卻好似意猶未盡。



「想唔想去多個地方？」Nick望住喺佢右邊，有啲失魂既我。

「今日我地已經由朝行到晚，好攰啊。」

我望到佢既嘴邊仍然殘留住少少叉燒汁既漬，我偷偷用頭髮掩住笑。

「係啊，就係帶你去relax下。」

因為嗰陣我地喺紅燈區附近，所以佢既建議聽落去奇奇怪怪咁。



「Relax啲乜？你想去紅燈區既自己去啊，我返去訓教。」我沒好氣的說。

Nick只係拉住，唔係，係拖住我隻手，帶我去到前面既一條小街。

佢好似未試過咁樣拖住我，我第一次感受到佢手掌既溫度，只欠一個十指緊扣。

嗰度望落去好似一條陰暗既酒吧街，但喺荷蘭，貌似酒吧既，極有可能係另一樣野。

類似咁啦，冇影，Google咋



細看漆黑中微弱閃亮住既霓虹燈，意料之內，係一間Coffee Shop。