《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (4.3)》

其實諗返起，都係我主動提出先：「好似冇料到喎….我只係有少少輕飄飄既感覺，同飲左一支啤酒冇咩分別。」
 
「你想咪去買多件囉，我比。」
 
「咁豪啊，哈哈哈哈….. 」嗰陣我都唔察覺我已經開始語無倫次。
 
我故作鎮定咁再次行去收銀處，指左一下個Lemon Cake，順便試埋另一隻味。
 
行返去我地靠牆既位，唔知效用係咪已經開始喺Nick身上發作，佢成個人閉住眼挨左喺牆度。
 


「喂你，唔係咁快就high左啊嘛，食埋呢個先啦。」
 
佢咩都冇講就搣左幾塊黎食，而我就食埋淨低嗰啲。
 
我都唔知係受大麻影響定係點，我覺得口中件Lemon Cake比啱啱件Chocolate容易入口得多，完全冇嗰種強烈既草味，所以我好快就將佢食完。
 
之後發生既事，係靠我僅餘既回憶寫出黎，嗰啲片段好零碎，但我會嘗試湊合佢地。
 
身體開始不受控制時，大概係離我食第一件Spacecake後既45分鐘，兩件蛋糕既效力同時發作，佔據左我既思緒。我感覺到一股熱流湧上頭，然後不由自主地開始笑，係無焦點地傻笑，停唔到落黎。
 


眼前陰暗既環境，喺我眼中突然變得五光十色， 耳邊多左好多雜音。

我記得嗰度有部大電視，電視播緊類似Discovery Channel既紀錄片，我呆望住屏幕，居然覺得一隻冇乜特別既雀仔都零舍有趣。
 
我望一望隔離既Nick，佢既狀態同我差唔多，或者比我仲興奮少少。

我地開始講埋啲無意義既野，但話題漸漸越講越深奧，不過唔好問我講左啲咩，我一啲都唔記得，只記得我地兩個都傾得好認真。
 
我對時間已經失去左觀念，唔知隔左幾耐，有一對情侶坐左喺我地對面，然後開始旁若無人咁熱吻起黎。



我唔肯定我有冇miss左啲乜，只知道我進入左迷迷糊糊既狀態。

 就喺呢個時候，Nick突然用手臂攬住我條腰，將我整個身體轉到佢既方向，然後往我嘴唇直接錫落黎。
 
因為太深刻，冇辦法唔記得呢一段。
 
我雖然被嚇得雙瞳放大，但卻完全冇想反抗既意欲，反而順住佢既節奏，回應住佢。

唔知道係咪受大麻既化學成分影響下，我好享受當下既每一秒，或者任何化學反應都只係輔佐品，我對Nick既情感瞬間被釋放出黎。

Nick將雙手放喺我兩頰旁，錫得越黎越用力，即使我地兩個既口氣都充滿住大麻味，但咁樣更加刺激到我地既感官，就好似一種催化劑咁。
 
我都分唔清啱啱我見到嗰對情侶，係咪只係我將我同Ｎick既畫面投射出黎既影像。

但我好肯定，呢一次毫無預警既法式熱吻，係我腦海中最真實既回憶。



 我地究竟錫左幾耐？喺我混沌既記憶中，就算話持續左半個鐘我都覺得不出為奇，時間喺嗰刻根本一啲都唔重要，重要既係我終於有機會去面對自己真正既感覺，係一種我好耐都冇感受過既幸福。
 
當我地慢慢從對方既身軀拉開一段距離後，我唔敢作出咩反應，只係互相望住大家，卻不發一言。
 
Nick既眼神好似失去聚焦一樣，就咁睇好似係望緊我既方向，但仔細觀察既話，佢根本完全係冇任何焦點。
 
佢再次拖住我既手，呢次真係十指緊扣。
 
佢嘴巴開始微微郁動，我靠近佢，想聽清楚佢將會講既野，喺幾秒內我諗過好多可能性，但係我聽到既只係一個名。
 
.
.
.



「Karina。」