《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (6.4)》

呢一日差唔多又黎到尾聲。

黃昏時分，我地都踩左成日，連市中心外圍都踩過一遍，已經可以自豪咁同其他人講我地做左一日只靠單車代步既荷蘭人。

歸還完單車之後，夜晚我地再次去到琴晚嗰間中餐館，始終好難再喺其他將會去既國家食到正宗既中國野。

我地又見到琴日幫我地落單嗰個侍應。


「又係你地啊？」佢既廣東話唔鹹唔淡，有少少似我，但我第二次先留意到。




「係啊，好食丫嘛，同埋我地聽日走喇。」我微微一笑。


「梗係啦，我地呢度啲中餐係最正宗架，第二度好難搵。想食咩啊？」


佢對間餐廳讚不絕口，應該要頒返個傑出員工獎比佢。




「乾炒牛河。」


「叉燒飯。」


我地不約而同地一齊嗌返琴晚食既野。




「好….一個牛河，一個叉飯。」說罷佢就將單據放喺臺上。


「你又食乾炒牛河…」 Nick無奈地說。


「你咪又係食返叉燒飯… 」我將尾音拉長。


「話時話，我真係好少見女仔會鐘意食乾炒牛河呢啲咁麻甩既野。」


「哈，我個EX都同我講過一模一樣既野。」我冷笑一聲。




「咁……真係好少見丫嘛。」Nick卻被我既冷笑弄得尷尬起黎。


「因為我阿爸係廚師，雖然佢已經冇再做中菜。但我記得細細個既時候，佢就同我講，好多餐廳請廚師時都會叫佢地即時炒碟牛河，因為呢樣野易做難精，要炒到一碟夠鑊氣，油而不膩既牛河，其實唔係咁簡單，最考到廚師既手勢。所以至此之後，我去茶餐廳啊，中菜館呢啲地方都會先叫碟乾炒牛河，一試就知龍與鳳。」


「咁你叫得第二次，即係好好食啦。」


「唔係喎，琴晚食嗰碟雖然味道幾好，但太過油膩，不過我通常都會比第二次機會佢，因為我知道心情會好影響廚師既表現，或者佢琴晚心情唔好，所以控制唔好啲油份姐。」


「一碟牛河你都可以諗到咁多野，你都幾特別。」




「係咩？我多數都係比人話我奇怪。」


「都叫你做返自己就得。肯定又係你個EX話你奇怪啦。」


我冇答到佢，由得佢自行想像。


×


二十四小時前，我地都係從同一間餐廳出黎，行緊同一條路，不過我地當然再冇意欲踏入任何一間Coffee Shop。

只係過左二十四小時，但好似所有野都唔同曬。



大概四十五鐘後，我地返到Haarlem。雖然一開始我地book錯民宿，但Haarlem除左冇阿姆斯特丹咁繁榮之外，其實都算係一個幾靚幾寧靜既小城市。

有一個遺憾就係，我地冇好好喺呢度行過。不過嗰陣係週末既夜晚，值得去既景點都已經一早關門，最後只能沿著來回過數次既運河行返去，結束喺荷蘭既最後一日。

企喺大門前，諗起琴晚我地用盡九牛二虎之力先開到呢道門，唔想重新經歷多次惡夢，所以都係直接噤門鐘算。

好彩有人喺屋入面，雖然迎接我地既又係嗰一張不友善既臉。

再次行上二樓時，我腦海入面湧出琴晚既畫面，心裏不禁暗暗尷尬起黎。

臨入房間之前，Nick既聲音從後方傳來：


「Jess……等一等，我有野想同你講。」




「呃…..你講啦。」我背著佢皺起眉頭，諗住無限既可能性。


「對唔住。」


佢停一停再講：


「其實今日我都想講左好耐，但我又唔知點開口。我知我琴晚突然咁樣嚇親你，我都唔好意思，我保證唔會再發生。」


我諗左下：「都唔關你事，係我自己食high左姐。得啦，我接受你既道歉，晚安。」


我始終都係背對著佢，大概係唔想同佢既眼神正面對上。


我關上房門，衫都冇換就訓左喺床。

究竟喺佢既記憶入面，佢記得既有幾多？佢覺得唔好意思既，係嗌錯左我做Karina，定係佢既一時衝動？

我冇勇氣問佢，因為我害怕知道真相。