《我竟然同左一個陌生男仔去歐遊...》: 《比利時篇- 布魯塞爾 Brussels (1.1)》

第二日晏晝執好行李，就告別呢間住左三日，毫無親切感既民宿。

我地坐大巴由Amsterdam到Brussels，只需要三個幾鐘，我諗，如果我住喺歐洲既話，真係會一得閑就會去下其他國家玩。

臨開車前，我轉頭望向窗外，最後一次望清楚呢個城市。

Amsterdam, I’ll be back.

×



如果你問我最後悔去過既地方係邊度，我會答Brussels。

唔止我啊，Nick都係咁覺得，就連其他去過歐遊既朋友，都話唔值得去。

其實我地嗰陣又唔係特別想去Brussels既，只係比利時同荷蘭實在太接近，所以就當順路去埋。

喺Brussels間Hostel我地都係隨便book，好似係貪佢夠平又就腳。

嗰度好破舊，Reception好細。職員只係好求其咁查左我地既ID，就帶我地去房，不過又係男女分房，但好奇怪地兩間房係互相對住。



同一樣既程序，我地都做過無數次，Hostel既規則啊，禮儀啊，我都已經完全瞭解，所以個職員講咩，我完全冇細心去聽。

淨係聽到佢話近廚房嗰度有個bar，可以坐低飲杯野。

佢將locker鑰匙交比我地，我就行入我間房擺低行李，間房得我一個喺度。而我就急不及待想喺間Hostel行下，冇理會到Nick。

嗰度的確係好殘舊，但係面積好大，同時亦係我去過最靜既Hostel。

穿過好多條走廊，好多間房，但幾乎一啲人聲都聽唔到，我開始有少少懷疑呢度係咪「有野」。



跟住指示牌，終於行到黎廚房，嗰度好陰暗，連燈都冇開到，只係見到有一兩個人係度飲緊咖啡。

個職員講嗰個’bar’，原來只係一個喺角落，好細既水吧，有兩個beer tap同幾支spirits咁，仲要冇開到。我心諗：算啦，反正都冇意欲去幫襯。

果然一分錢一分貨，比咁既價錢就要接受咁既環境。

行到我地間房既走廊處，見到Nick亦都朝住我既方向行緊黎，因為一直係度噤手機，差啲同佢迎頭相撞。


「你唔係喺房咩？」我問。


「本身係，但想出黎搵你。」




「哈哈，唔見我幾分鐘就掛住我喇？」我吐出舌頭，雙眼笑成一條線，扮曬可愛咁。


「驚你比鬼捉左去咋。」


「噓…雖然依家係日頭，但唔好亂咁講呢啲野，因為我真係覺得呢度有唔妥…」


我作出「收聲」既手勢，示意佢唔好再講落去。


「你唔係真係驚啊嘛？」佢甚少見到我細膽既一面，所以藉機取笑我。




「你喺度行過一圈就明架喇…總之你唔好再提起嗰類野啦… 」我雙手合十。