《我竟然同左一個陌生男仔去歐遊...》: 《比利時篇- 布魯塞爾 Brussels (2.3)》

其實我已經諗唔起我地嗰日下午既行程，只依稀記得無意中行到去一個花園，佢係一種knot garden既設計，即係會將花草排列成特定形狀，好多都會以“結”做概念，所以得其名，喺英國會比較常見。

由嗰度望出去既景色特別怡人，市政廳既尖頂尤其突出。即使見唔到大廣場裏面嗰一群華麗既建築物，我覺得布魯塞爾既呢一面更吸引到我。

綠草如茵既公園同一整排既歐式建築被攝入於同一個畫面，相映成趣。

其餘去過既景點，我都冇乜特別深刻既印象。入過一間教堂，睇過數個石雕，同去左近市中心南面既火車站。

因為我地嗰間陰森Hostel冇食物供應，我地行街嗰陣係某某商場既food court食左一個比所有大學既頹can更頹既東南亞fusion take away。



突然好掛住喺荷蘭既中餐，我諗我喺房淥個營多食都冇咁嬲。

布魯塞爾既遊記，我可以濃縮到用一百字已經寫曬，關鍵字離不開Waffle，朱古力，同大廣場。

我比過好多機會佢令自己嘗試學識享受喺呢個城市走過既每一段路，但我發現，我大部分時間都只係帶著沉重既腳步行走。

我地早早就返到去Hostel，因為要準備三點起身。

喺西歐留左咁耐，終於要開始喺東歐既旅程，打算以波蘭做第一站。



有一日喺Ryanair個網度搵到從Brussels到波蘭華沙（Warsaw）既平機票，所以先成就左我地既比利時之旅。

雖然最後只能失望咁離開，但起碼可以同人講，我喺比利時食過好多朱古力同Waffle，仲見埋撒尿小童既真身，概括左呢二十四個小時。

但平機票有一樣唔好，就係depart時間通常都係一大早，六七點，計埋要預留返check-in既時間（因為有行李），我地最遲四點幾就要到達機場。

Brussels只有一個機場，但我地嗰班機並唔喺嗰度開出，而係喺南部一個叫Charleroi既機場，要搭Shuttle Bus去，大概一個鐘。

最早個班車淩晨三點半開出，我地亦只能搭個一班，唔係就趕唔切喺機場check-in。



因為免得拖住行李箱喺淩晨時分走去車站，我地一早已經準備call Uber。

諗諗下原來已經有一段時間冇搭過飛機，之前去過既地方好多搭巴士，火車等等就能到達，就連我之前話最唔鐘意坐既長途巴士，都已經搭過幾次，習慣曬。

今次要搭咁早既機，其實都幾驚會趕唔切，但從call Uber到Shuttle Bus，過程都好順利，冇任何意外，我地慢慢放心下來。

直到我地終於到達機場時，就知道事情唔係我地想像中，咁順利同簡單…….