《我竟然同左一個陌生男仔去歐遊...》: 《比利時篇- 布魯塞爾 Brussels (3.2)》
Fast forward到06:40，距離航班開出仲有十五分鐘，屏幕上顯示” last call”，並無任何delay。
雖然我地已經去到差不多最前，但前面仲有幾個人等緊過安檢。去到呢刻，我已經冇任何感覺，都係將命運交返比個天幫我地決定。
我如常地拎出電腦同其他電子產品，佢地做野好慢吞吞，我地已經講明只有幾分鐘剩，但都係搞左一輪先比我地過。
而Marc就早我地三十秒度，連一句Bye都冇講就直沖閘口。都啱既，去到呢啲關頭就梗係顧返自己先。
最壞既情況都仲未出現，個閘口係成個機場入面最遠既一個，即使本身面積好細，但我諗我從來未試過跑得咁快。
Nick拉起我手，捉住我跑過去閘口，可能係因為冇食野既關係，我上氣不接下氣，但我覺得，只要趕到班機，就咩都值得。
終於用盡剩餘既力氣跑到去閘口，但見到Marc仲企左喺櫃檯同地勤講緊野，就心知不妙。
我地都未真正行到去，Marc已經垂頭喪氣咁行走左，已經知道個結果。
我地望一望玻璃窗外，大大個印住Ryanair Logo既飛機仲喺度，冇起飛既跡象，我地不抱任何期望，問地勤職員係咪已經冇可能上機，佢地勉強地擠出一副同情既樣子，話唔好意思，機長已經宣佈要關閉閘口。
只係一道玻璃窗既距離，就將我地同嗰架航班隔絕。
嗰次係我人生第一次趕唔到飛機。
×
知道無法上機後，我地要趕返去check-in櫃檯拎返已寄艙既行李。我拖着個篋，搵左張凳坐低。
呢個機場真係好好似一個廢墟，只有冷冰冰既硬座位同幾間小餐廳。
由四個小時前就折騰到依家，點知個結果都係不如人意。
或者係餓得濟，我坐喺張凳度進入發呆狀態，然後，眼淚開始慢慢流過我臉龐。
我從來都唔係一個脆弱既人，我好怕見到自己喊，但更加怕人地見到我喊。
Nick本身企左喺隔離整理返下佢既行李，但回頭見到我竟然喊緊，佢即刻喺背囊入面拎張紙巾出黎，遞到我面前。
我接過佢既紙巾後，就雙手掩面咁啜泣起黎。Nick並無用「你唔好喊啦」呢種老掉牙既方式安慰我。可能佢都知，當喊緊既人聽到呢句，就只會喊得更厲害，只起到反作用。
「我都知你辛苦喇，喊出黎會舒服啲。」佢摸一摸我頭，就好似安慰緊一個小朋友咁。
「Sorry…….比你見到我喊…..我都唔知我喊乜，上唔到機姐，有幾閒…呀可… 」口就咁講，但我仍然無法停止。
「都唔係第一次啦，喺香港機場見到你嗰陣，你好似都喊緊。」
「我嗰陣都冇喊到，係打喊路打到流眼水姐…」我繼續反駁。
「點都好啦，你喺我面前喊得，即係代表你相信我啦，我應該覺得開心添。」
「你去死啦…..呢啲時候仲要將自己既快樂建築喺我既痛苦上。」
簡單既幾句，就令我冷靜落黎，我果然好好氹，或者係只有佢氹到我。
×
離我地不遠有個flight information既櫃位，所以我收拾心情後就決定用行動黎解決問題，而唔係用眼淚。
我地問下一班飛Warsaw既機係幾點，因為儘量唔想耽誤我地既行程太耐，得到既答案，竟然係兩日後。
我都以為我聽錯，就再問多次，W-A-R-S-A-W喎。
答案都係一樣，佢話無論邊間航空公司，去Warsaw既機呢兩日都爆滿曬，我不服氣地用Skyscanner搜尋左一次，都淨係搵到啲亂七八糟，要轉機轉兩次，而且價格驚人既機票。
沒有最絕望，只有更絕望。
雖然我就係一個冇計畫既人，但對於Nick黎講，當佢計畫好既一切突然被打亂時，佢都有思緒混亂既時候。
由於個機場實在太低級，WiFi只可以連接二十分鐘，之後就要揀plan比錢。
我啱啱喺由用Skyscanner開始，已經過左一段時間，亦都被自動disconnected，所以只能用Nick既手機去嘗試搵下我地有咩option。
Marc喺我地面前再次出現，睇黎佢都係拎完行李然後過黎information櫃位。
我地同佢解釋依家既情況，大家都係煩惱緊究竟可以點離開呢個鬼地方，既然喺機場都只能白等，就決定搭返我地黎既時候嗰一架Shuttle，返翻去Brussels車站。
好彩返到車站時，嗰度有免費WiFi，喺GoEuro既提議下，嗰日只有全程長達接近二十個鐘，要經過Berlin轉車既一架超級長途巴士可供選擇。
見到呢啲超越我地想像範圍既Option，覺得根本唔係辦法，到我地去到嗰陣，靈魂都應該出竅左。
令我地驚訝既係，Marc居然選擇左要去搭嗰架巴士。
佢同我地講佢辛苦工作左好耐先拎到呢次假，如果等到兩日後先飛，根本同冇左個假期冇分別，起碼搭呢班車，佢仲可以勉強趕得切聽日早上到Warsaw，就不至於浪費呢次難得既假期，語氣充滿著無奈同心酸，
佢走既時候，輕輕地用一句道別：「Good luck to both of you. 」
我差啲想講：「Enjoy your journey.」，但二十個鐘既車程，好難有人會enjoy到，講出黎只有諷刺既意味。
「Wish you have a safe journey.」 我只吐出呢一句。
我望著佢落寞既背影，諗起佢啱啱同我講離開自己屋企，去鄰國努力工作換到既一次假期，就咁被摧毀左一半。
生活喺香港，多數人都成日幻想歐洲係一個無憂無慮既國度，咩工時短，福利高諸如此類。
其實概括啲講，都係你睇我好，我睇你好。
就好似外國人黎旅行時會覺得香港五光十色，生活多姿多彩，但佢地又點會明，喺呢個擠逼得透不過氣既城市，我地有幾多人要為最基本既公義而付上代價。
×
一連串既事件，都令我地無法順利準時去到波蘭。
雖然Hostel既錢無法Refund，但因為嗰度物價非常低，住宿都係人均少於一百港幣一晚，所以都不算太心痛。
我地選擇將行程推遲，搭兩日後同一時間既機，不過當然學識要醒目啲，提早前一晚就直接去機場過夜。
可惜Brussels實在冇任何野值得我地留戀，要我喺度留多兩日，誇張啲講句應該會係一種折磨。
靈機一觸，Nick醒起有朋友提議過佢去布魯日（Bruges），一個離Brussels唔遠，搭火車都只需要一個鐘既城市。
我嗰陣連Bruges呢個名都冇聽過，但只要可以離開Brussels，我真係去邊都冇所謂。
塞翁失馬，焉知非福。估唔到因為一次不幸既錯失，令到我對比利時改觀。