《我竟然同左一個陌生男仔去歐遊...》: 《比利時篇- 布魯日 Bruges (1.1)》

我地喺火車站（Brussels Midi Station）附近食埋lunch 先起程，唔係咁樣拎住二十幾三十公斤既行裝周圍走，我應該會進入虛脫狀態。

火車班次非常頻密，票價大約十四歐羅，同一張廉航飛波蘭既特價機票差唔多，不過去到呢個地步，又何必再作比較。

布魯塞爾同布魯日，譯名好接近，距離都好接近，但事實上，容許我用誇張手法，係地獄與天堂既分別。

當然，前者係地獄，後者係天堂。

布魯日就好似一個遠離一切世間紛擾既世外桃源，喺嗰度，完全冇布魯塞爾既黑暗沉重。




呢樣野喺我由踏出布魯日火車站已經既第一刻，已經感受到。


「我覺得你一定會好中意呢度。」Nick自信滿滿。


「你咁有信心？講到好似你黎過咁。」




「我係就係冇黎過，但我個friend係啲旅遊達人黎，我好多行程上既野其實都係請教佢，佢推薦得，實冇錯。」


「原來你係有搵幫手既！等我仲以為你真係咁勁，乜都識。」


「你好意思話我咩？你份人一啲計畫都冇，你有冇諗過，如果你當初冇遇到我，唔知你依家會點呢？」佢淡然地說，帶點感慨既意味。


我又真係冇諗過呢個問題。




依賴其實好可怕，可怕在於你當你已經習慣左佢既陪伴，不知不覺中連獨立能力都失去，如果有一日佢再唔喺你身邊，你既世界入面就好似缺失左一塊好重要既拼圖，從此再不完整。

要避免呢一件事發生，就要避免對佢過分依賴。

就好似一個計時炸彈咁，當呢次旅程完結後，我地最後或許只會各散東西，但情感上既依賴，卻不會立刻被消除。


「哈，最多咪流浪街頭，有乜咁大不了，我天生天養。」


「你肯定天生天養呢四個字係咁用？」佢言語間充滿著質疑。




「肯定，我睇好多中文書架，連張愛玲本《半生緣》我都睇過，我中文一定唔比你差。」


「聽講睇得多張愛玲既女人，都會好討厭男人。」


「我都憎過幾個男人，希望你唔會變成其中一個啦。」


「咁我寧願你憎我。」Nick細細聲講，徘徊於自言自語與回答我之間。


「咩話？」我下意識地想佢重複講多次。




「冇野。」佢斬釘截鐵的說。


我冇追問下去，因為每一隻字我都聽得好清楚，雖然嗰陣既我，並唔明白箇中意思。