《我竟然同左一個陌生男仔去歐遊...》: 《比利時篇- 布魯日 Bruges (1.2)》
我地每次都係靠彩數，臨急關頭搵到一間backpacker hostel既最後兩個床位，價錢仲要唔係特別貴。
由車站到Hostel，要搭巴士經過四個站，歐洲既巴士都偏細，我地拎住兩個人既行李，已經佔左唔少位置，雖然旁邊有一個空座位，但我連坐低都唔好意思，只靠扶着扶手以免人帶行李一齊跌低。
「做乜隔離有位都唔坐？」Nick疑惑地望著站姿狼狽既我。
「唔喇…都係幾個站，十分鐘就到啦。」
「喺我面前，就唔需要逞強喇，連你喊我都見過兩次啦。」佢既語氣好溫柔，就好似睇穿左我故作強悍既另一面。
最後都係屈服於佢既一句說話，我都唔知幾時開始我會變得「聽話」。
*
抵達Hostel後，Receptionist好熱情地歡迎我地，大堂結合左餐廳同酒吧， 雖然並冇華麗既裝飾，只有幾張紅色長方形梳化同圓餐臺，一眼就望得曬。
住客飲住啤酒，食住pizza，就咁睇落去都幾熱鬧。
回想起Brussels嗰間「鬼屋」，簡直係天淵之別，我既第六感果然冇錯，Bruges係一個好地方。
我地訂既係mixed dorm room，但我第一次見到房入面既居然唔係碌架床，而係一張張既單人床。
空間好闊落，裝修以最簡潔既白色調為主，望落去乾淨整齊，仲有獨立locker可以比我地擺放貴重物品。
黎歐遊之前既我，一直都以為backpacker hostel全部係啲汙糟邋遢既地方，但原來只係我思想狹窄。
見到軟綿綿既床，我一下子忍不住就訓低，而訓低後，就冇落床既意欲。
由淩晨三點起身開始，經過左十二小時既轉折，我身體既精力已經所剩無幾，咪埋眼應該一分鐘就可以訓著。
Nick既床位喺另一邊，我伸手示意叫佢過一過黎。
「喂，我真係好鬼攰，可唔可以比我訓陣先？」
「你訓下先啦，我自己出去行下。」佢睇落仲精神奕奕咁款。
「下？乜你唔攰架？仲有氣力出去行？」我不禁驚歎佢既體力。
「少少啦，但唔知點解黎到Bruges就精神返曬。」
「睇黎呢度有一股魔力喎。」
「我諗係掛。係呢，你仲記唔記得我地第一日到米蘭，反而係我攰到要訓，而你就出左去周圍影相影左幾個鐘。」
「梗係記得，我嗰陣係咁叫你沖左涼先訓你都唔肯。」
「去旅行時，時間總係過得特別快，咁就一個月。」
我發覺佢諗野時都中意望向遠方，就好似佢依家望向窗外咁。
「係啊，所以你要好好珍惜。」
珍惜我地僅餘既時光。
「好啦，依照劇本既發展，應該輪到我去物色一間餐廳，然後夜晚返黎請你食野，不過你都唔可以丟我架，所以要著靚啲。」
我當初既對白，由佢口中再講多次，令我會心微笑。
*
起身既時候，我習慣性地望手機，原來已經係夜晚六點十五分。
我即刻被嚇一嚇，明明較左鬧鐘一個鐘後起身，點知訓訓下就成差唔多三個鐘，我掲開被落床，見到Nick返左黎。
「你終於肯起身喇？」我行完一圈返黎都半個鐘喇。佢眼尾瞄到我起左身，雙手噤住電話同我講。
「鬧鐘冇響啊…我都唔想... 」 我抓一抓淩亂既長髮。
「傻啦，又點會怪你，你訓到淩晨先起身都冇所謂。」
「邊可以冇所謂啊？去旅行去到訓教咁冇癮。」我都忍不住自嘲。
「我搵到一樣野，你一定唔會覺得冇癮，而且仲會覺得你依家呢個時候起身啱啱好添。」
聽到後都激發起我既好奇心：「講到你好瞭解我咁，係乜先？」
「你梳返好個頭咪帶你去囉。」Nick依然不改佢故作神秘既作風。
我用手機既前鏡頭打量一下自己，頭髮真係亂到活像一個瘋子。
「你識乜，呢啲叫九一分界女神頭，潮流黎。」
Nick帶左我去樓下大堂（aka餐廳＋酒吧）。
「呃…你帶我黎食pizza啊？」我一臉不解，以為佢會帶我去啲特別既地方。
「唔算係。我記得你鐘意飲酒？啱啱返黎既時候見到原來呢度每日六點至七點happy hour，一歐羅就有a pint beer。比利時啤酒好出名架。」
「1 euro per pint咁抵？係就嗌多幾杯喇。」
「我諗喺呢度就算你任嗌我都比得起既。」
「又真係幾瞭解我喎，知道我係個酒鬼。」
「我對自己既觀察能力不嬲都好有自信。」
First Round我嗌左一隻比利時啤酒，而Nick就成個女仔咁，嗌左杯Strawberry Cider…
「其實你飲唔飲得架？好少見男仔會嗌Cider。」
「就係唔飲得先嗌Cider，尤其是依家個肚空空地，特別容易醉。」
「咁我搵到你既弱點喇，等我試下灌醉你！」我將整杯啤酒放到佢嘴邊，作勢逼佢飲。
Nick逼於無奈地飲左兩啖，就即刻飲返自己嗰杯Cider。
「唔好玩啦，我對酒精有少少敏感，作為男人唔飲得我都好羞恥架喇。」
「Sorry，酒精敏感對我黎講只係一個酒量差既藉口。」
「好好好，我承認我酒量差，你滿意未？」
我總是喜歡逼別人承認佢地既弱點，卻不肯承認自己既弱點。
Second Round都過後，本來諗住叫最後一次，但我地一路飲一路傾計，已經過左七點。
「我地冇跟劇本發展啊，應該係我一起身，你就同我出去食野架嘛，竟然用happy hour黎引我飲酒。」
「起碼係一段美好既小插曲丫，睇你有得飲酒幾開心。」
我地相視而笑，喺柔和既jazz music下，我地既笑聲掩蓋左所有音樂聲。
如果時光真係可以倒流返去米蘭既第一晚，我或者會對好多事情做出唔一樣既抉擇，改寫我地兩個既「劇本」。