《我竟然同左一個陌生男仔去歐遊...》: 《比利時篇- 布魯日 Bruges (2.1》

嗰晚食完晚餐後，行程欠奉，因為黎布魯日根本不在我地本來既計畫之中。

好吧，說穿了其實只是Nick既計畫，我既職責就係一直說：「好」，「冇問題」，「乜都得」。

我地當飯後散步咁四圍行，布魯日係一個好迷你既城市，或者用小鎮黎形容佢會更加貼切。

呢度當然一唔似Brussels咁，有現代化既高樓大廈，周邊只有古舊而矮小既建築群。

我地離遠望到一座鐘樓，朝著嗰度既方向行，好快已經進入古城區。




「呢度就係我啱啱講既Market Place，本身諗住聽日先黎，點知行行下又黎到，Bruges細得濟。」


夜晚既市集廣場人唔多，比較空曠，但鐘樓仍然發出刺眼既燈光，成為整個廣場既焦點。

利申：偷圖again，嗰日冇帶相機出去。


 


「硬係覺得呢座鐘樓熟口熟面，好似唔知喺邊度見過咁。」我努力嘗試回想，但徒勞無功。


「咁我覺得鐘樓棟棟都有啲相似架啦，你係咪撈亂左尖沙咀海旁嗰個啊？」


「你唔好真係當我白癡，兩座鐘樓一啲都唔似囉，呢座靚好多。」


我繼續說下去：




「我成日都係咁，越逼自己要諗起，我就越諗唔起，然後就越想要諗起，就好似一個惡性循環咁。」


「你會唔會執著左少少？或者你聽朝黎，望到佢喺日頭既另一面，你就會諗起。」


可能就係因為我太執著，先會成就今日既我。

***

第二朝七點半就被Nick叫醒左，起床氣特別嚴重既我，用盡一切方式去賴床，再加上惡言相對，叫佢「收皮」，「唔好阻住我訓教」，「Get the fuck off 」諸如此類。




不過佢對我既脾氣，百般容忍，最後我都屈服於佢既死纏爛打既毅力，朦朦朧朧中落左床。


「洗唔洗晨早溜溜叫我起身？」我捽著疲倦得略帶紅筋既雙眼。


「呢度既早餐八點半就冇架喇，我唔想自己一個落去食啊，你陪我啦。」


平時都係佢陪我做我想做既事，好似又真係第一次聽到叫我陪佢。


「唉，好啦，見你成日遷就我，我就返你一次啦….」




「不過點解全部Hostel都要將早餐時間整到咁早啊？十點都係朝早姐！」


「因為佢地想節省成本，知道大把好似你咁既懶蟲會唔肯起身食早餐。」


「我唔係懶，只係失眠，訓得唔好，講過好多次。」

失眠既原因有好多，漸漸地Nick都變成我失眠既其中一個原因。

***

Hostel既費用包括自助早餐，但當然係平民式既自助，只有最基本同簡單既食物。

我將整個焦點放喺搽麵包既朱古力醬上，用鼻子靠近聞，一股濃香既可可味，夾雜住少少榛子香味，未食之前，仲以為只係普通Nutella，不過絕對超越Nutella，過之而無不及。




拎完野食後，我地搵左一張最後一張冇人既圓臺坐低，原來都幾多人比我地更早落黎。


「你睇下幾多人仲早過我地起身，好心你養成下早睡早起既習慣，好似我咁，幾有規律。」


「你咁講，我要開始食安眠藥喇喎。」


「咁安眠藥又唔好亂食，調整下自己既心態，應該就會訓得好啲。」


「你唔明架喇，我由幾年前，甚至更早，已經開始係咁。」




「你琴晚失眠嗰陣，諗緊乜？」


唔通話諗緊你咩。


「我喺度Google琴晚鐘樓張相，睇下記唔記得起喺邊度見過。」(btw，我認真，唔是藉口)


「….」換來一陣Dead Air。


「放鬆少少自己會唔會好訓啲呢？」


「係咪有句說話叫，有頭髮邊個想做癩痢？你當我係咁啦。」


「你比左個目標我。」


「下？」我聽得一頭霧水。


「我要喺呢次旅行入面，醫好你既失眠。」


我聽到後冷笑幾聲：「Excuse Me，心理醫生都醫唔好我，你會唔會太有自信？」


「我每晚send一篇佛經比你，你認真睇既話，包你訓得著。」


「嗯…你都幾有幽默感喎。」雖然佢既語氣非常認真，但卻認真得令我不禁失笑起來。


此後，佢真的幾乎每晚都會WhatsApp一篇佛經或者佛教音樂給我，但遺憾地，我真的提不起勁認真看。