《我竟然同左一個陌生男仔去歐遊...》: 《比利時篇- 布魯日 Bruges (2.4)》

佢皮膚白哲，身材高瘦，從側面已經望到佢秀麗既五官，依然留住嗰一把我見過最靚既長直黑髮。


再望一望佢掛喺背囊嗰隻我送既貓公仔，我肯定佢就係Josie——我喺大學既一個朋友。


我地之間既距離並不遠，所以我提高聲線叫佢個名，佢已經下意識地望向我既方向。


佢定立左幾秒，先認得出係我，再笑顏逐開地跑過黎，熱情地向我奉上一個擁抱：




「Jess！估唔到竟然會喺度見到你！嗰次喺 Can撞到你之後，我想約你出黎架，不過你知啦，大家都係Final Year，好忙丫嘛！」


Josie係我做group project既時候，其中一位既組員。


而嗰陣其他兩個組員基本上由開始到結束都冇出現過，聽聞係danso既成員。



雖然話每個人讀大學必經既階段，就係遇到Free-rider(s)，但成份野得我地兩個做曬，都幾辛苦，好彩Josie係一位比心機而又讀得書既女仔，所以我地最終都高分取勝。

我地共事期間都傾過唔少計，漸漸變得熟稔，但可惜做完Project後就冇特登約出黎見面。

不過神奇地，我地成日會喺唔同既地方碰面，唔只喺學校，連有一次去餐廳食野，都見到佢喺嗰度做緊part-time。


更莫講呢次喺比利時都會見到佢，緣分真係緣分。




「唔緊要，依家都grad左啦，所以我咪黎grad trip，你都係？」


其實我問既問題都幾無謂，唔通黎呢度賣藝咩。


「算係啦！我男朋友啱啱去完荷蘭exchange準備返香港，我就自己買機票過黎諗住同佢去旅行，我等陣就去Antwerp會合佢架喇！」


Josie講完野後，先留意到Nick既存在。


「Sorry啊啱啱掛住同Jess講野，你係Jess既男朋友？」佢故意拖慢每個字講。




「呃……唔係啊……你問Jess啦，哈哈…… 」


唔知係咪Josie個樣太吸睛，Nick望著佢一臉尷尬咁。


「哈，我地點識，講起就搞笑。」我卻皮笑肉不笑。


「不如你地周圍行下先啦，反正啱啱冇機會，我依家想行上去鐘樓嗰度。」


「你唔等埋我？」




「要行三百幾級樓梯喎，費事你嗌攰啦，呢度附近有Free-Wi-Fi，我等陣再聯絡你。」


我都黎唔切比咩回應，Nick就自己走左去。


「佢都幾怕醜架喎。」Josie回頭望住佢離開既背影。


「你咁靚，我見到你都怕醜啦！何況係男仔。」


以女性既角度睇女性既要求自然特別高，Josie喺我眼中，係我認識既女性朋友入面，最有吸引力既一個。




佢非常有明星相，卻因為聽男朋友話，就算幾多Model公司想搵佢簽約，佢都一一拒絕，絕對唔係嗰啲庸俗得一個招牌跌下來都壓死幾個既「IG女神」。

如果一定要話佢似一個明星既話，我諗會係陳法拉，因為佢地同樣擁有一對過份甜美既酒窩，笑靥如花。


Josie聽到後嫣然一笑，佢既一舉一動都充滿氣質，有時作為女仔，都幾羨慕佢有呢種魅力。


「講呢啲。老老實實，佢真係唔係你男朋友？你地睇落去幾襯喎。」佢向我報以一個調皮既單眼。


「唔係，朋友姐，雖然唔係識左好耐。」我語氣異常的平淡，但不知怎麼的，一股心酸感卻湧上心頭。


有時真係希望「朋友」這一詞，可以概括曬我地之間既關係，但除左「朋友」之外，我亦再諗唔到有其他合適既形容詞。