《我竟然同左一個陌生男仔去歐遊...》: 《比利時篇- 布魯日 Bruges (2.5)》

我地搵左間Café坐低，Josie或多或少都有少少「港女」既特質，就係鍾意所有包裝得好華麗，同粉色系既事物，所以佢都係因為嗰度華而不實既裝飾，先被吸引左入去。

人生入面總會遇上一種人，你同佢唔係青梅竹馬，識左十幾年既老朋友，但係初相識，已經可以無所不談。

可能正正就係因為對方唔認識過去既你，所以佢無法用你既過去黎評論現在既你，更加唔會聽到：「你變左」，「我識你嗰陣唔係咁」，之類既說話。

我同Josie，就係呢種關係。即使一開始只係因為一份group project而相識，但拜另外兩位free riders所賜，我地要約出黎見面傾野既次數就越黎越多。

久而久之，我都變得好相信佢，嗰陣我正值同前度分手既過渡期，非常難挨，但Josie以旁觀者既角度，不加任何偏見地同我分析左好多事。



佢曾經講過：「一段感情裏面，雙方都必定有對錯，如果太執著對方既錯誤而忿忿不平，換個角度黎睇，只係用別人既過錯黎懲罰緊自己，又何必呢？」

被傷害得太徹底既我，有一段時間都好抗拒身邊所有男性，覺得自己已經唔再需要向佢地乞求被愛既感覺。

而Josie對我既慰藉，令我開始意會到，女性永遠都係最懂女性既人，我有一刻甚至認為，同性比起異性更能互相吸引，聽說這世上，沒有人是絕對百分百的異性戀。

不過都係以前既事，或者只係頭腦一時被沖昏，我諗。

無論如何，太美好既人同事，我大概都不配亦不會擁有。



回憶在腦海裏繞一圈後，我一口喝下半杯Black Coffee，任由苦澀味道支配我既味覺，我最享受苦後帶出既嗰股咖啡香。

我如實地將我同Nick由初相識到依家既經歷，一五一十咁講曬比Josie知，連喺荷蘭「死而復生」嗰一晚，都毫無保留地講左出黎。


好似亦係我第一次講呢件事比第二個人知。不過面前既人係Josie，所以我唔介意，因為我知道佢唔會對我既行為諸多批評。


「你地根本就係Before Sunrise真人版！好羨慕啊！」佢聽得雙眼發光，可惜事情並唔係好似電影中如此浪漫。




「唔係啦。現實又點同電影，電影呃人架咋。」我牽強一笑。


我不停用匙羹攪動杯中剩餘既咖啡，其實裏面並冇任何砂糖需要被溶解，只係一個習慣性既動作，令我可以看到杯中既漩渦，然後慢慢失去焦點。


「不如你諗清楚，你係咪真係鐘意佢？」Josie認真地問我，睇黎佢冇再沉醉於電影中既虛構情節。


「姐係咩意思？」我從放空狀態中回復過來。


「即係…..你對佢既感覺可能只係錯覺，同埋你講到佢對你咁好，我覺得好有可疑，我好驚你比人呃。」Josie緊握我既雙手，我卻有想縮開既意欲。




「其實係咪錯覺都唔會有太大分別，我諗佢都係放唔低佢以前個女朋友。」


「放低都需要時間，你唔諗下你用左幾耐時間先get over到你以前個仆街Ex？」


平時溫文爾雅既佢，雖然只係講左一個平凡既粗鄙詞語，但都足以教我驚訝。


放唔低係一回事，但我更怕既其他事。


「我覺得我會輸。」




「嗯？」Josie不解我話中意思。


「邊個坦白先，咪邊個輸。」


「你仲係咁執著輸贏，同你講左幾多次，感情冇得計較呢啲野。」


眼前既黑咖啡只剩下最後一口，我卻喝不下去，被放置得太耐既咖啡，會由香醇慢慢變成酸澀得難以下嚥；或許感情亦如是，沉澱得太耐，剩下既只有心酸。


我諗我由一開始已經輸左比自己。




佛典有云：旗未動，風也未吹，是人的心自己在動。