《我竟然同左一個陌生男仔去歐遊...》: 《波蘭篇- 克拉科夫 Kraków (1.1)》

當你遇見一個幾近完美的男人，不要輕易愛上他，因為他每一次拉起你的手讓你走在馬路的裏面，每一次替你跳出不喜歡吃的食物，每一次你痛經時他體貼地為你買來各種正確的藥物和用品。那都是一個女人教給他的經歷。——麥曦茵　《前度》導演。

好耐之後，我先搵返呢套電影黎睇。

周怡母親說：「不是說身邊的那個不是自己最喜歡的，而是最喜歡的那個，已經不在身邊了。」

呢個咒語，大概應驗過喺無數人身上。

嗰日，我地終於趕得上飛機，但全程緘默不語。



說實話，我並未小氣得因為被間接地拒絕而忿忿不平，只係我不能裝作若無其事地再找話題同佢如常般談天說地，因為我知道由我地把事情攤開來說既一瞬間，所有事都不會再維持原狀。

無論大家之間喺一個晚上多左幾多芥蒂，只要厚著臉皮捱過剩餘既時間，返到香港，即使我地繼續聯絡與否，好來好去就可以，不過，只係我以為。

***

原本的計畫，係留喺華沙（Warsaw）一兩日再起程到克拉科夫（Kraków），聽說華沙雖然身為波蘭首都，卻不值得去。

而因為行程已因為兩日前既意外被耽誤，之後既住宿亦一早訂好，我地到達華沙後，從機場搭到中央火車站，再去到Kraków。兩城既距離都只係同布魯塞爾<->布魯日差不多。




喺搭火車途中，Nick終於打破我地維持良久既沉默：


「Kraków其實好多地方都值得去。」


「係啊，我最想去既係Auschwitz個集中營，不過我怕我睇到喊。」




「聽講嗰度要預早好耐買飛。」


「到時睇下點啦。」

我口中吐出既每一個字都冷淡得令話題無法繼續，奈何我又點樣都勉強唔到自己要去偽裝冇事發生過。


Kraków嗰間民宿，只有一間房，兩張單人床。當初喺Airbnb訂房既時候，又點會諗到事情會落得如斯田地。


但撇開一切不說，Nick依然係一個最好既旅伴。


「如果你想分開行既話，我比啲我plan好左行程你睇，仲有搭邊啲交通工具來回呢度，我都寫好左喺度。」Nick向我遞上一本小型記事本。




「你比左你啲行程我，你就唔會去架喇？」


「咪話左Kraków有好多地方值得去，我想去嗰啲，你未必有興趣，所有我點都會有地方去既。」


「其實照返之前咁咪得，反正我都慣左同你行。」


我沒有想抗拒繼續同佢旅行既意欲，但Nick反而有逃避我既意欲。


「唔好誤會，我唔係有咩其他意思，只係你成日話想試下真正咁自己去旅行，咪等你體驗下冇左我呢個人肉導航既感覺。我信你搞得掂既。」




我聽到後亦順佢意思，可能呢個先係最好既辦法。


「咁我依家就出去架喇。」


我將行李unpack，隨手將需要既物品擺入背囊。


相機，銀包，水，急救藥，仲有我成日唔記得既外套。


因為得返自己一個既時候，就冇人會再喺我覺得凍既時候，為我披上一件大褸。




「你唔係發緊脾氣呀可？」Nick見我快手快腳地將行裝整理好，或者真係覺得我誤會左佢。


「哈，我梗係唔係。只係我有個地方想去。」


我習慣用一聲敷衍既笑聲去表達我既不在乎。


「不過呢，唔好問我去邊，我都唔會問你去邊，睇下我地會唔會撞到對方。」


「去邊都好，唔好蕩失路，或者被人拐左去，到時就冇人喺隔離幫你。」




「唔好咁自大啦，有咩事，我自己會幫自己。」


因為這世上，從來就沒有誰是依附著誰才能生存的。