《我竟然同左一個陌生男仔去歐遊...》: 《愛沙尼亞篇- 塔林 Tallinn (1.2)》完

我歐遊之旅既最後一站，係塔林（Tallinn），愛沙尼亞既首都，嗰度既旅遊氣息冇西歐般濃烈，就如之前去過既布魯日一樣，都係一個中世紀既童話小鎮。



美中不足既係，留喺塔林既第三日，腸胃突然出現問題，令我整天只能留喺Hostel蜷縮在床上，痛得連訓教都訓唔到。

然後，我突然收到Nick傳來既訊息，亦係呢一個幾禮拜以黎佢唯一一次搵我。我一直以為，我地早就曲終人散了。

我只係猶豫左一陣就打開ＷhatsApp，而佢傳來既只有一張圖片：




圖片中既地方係塔林既老城區。



Me：「你依家喺Tallinn？」


Nick：「係，我琴日喺嗰度見到一個幾似你既女仔。」




Me：「可能係我掛，我琴日都去左嗰度。」


Nick：「我本身都plan左黎呢度，以為你會去克羅地亞嗰邊添。」


Me：「唔夠時間去，我後日朝早就走喇。」




Nick：「呢度有個影相好靚既地方，叫Toompea Hill，你應該會好鍾意，走之前可以去下。」


Me：「我知啊，我聽日去。」


Nick：「我聽日都準備三點左右去，如果你肯既話，我想親自同你farewell。」


Me：「Okay. 」


短短數分鐘既對話就結束了，估唔到我地事到如今仲會「如常」地對話。
 
第二日起身，不適感已經冇咁強烈，睇著時間慢慢接近下午，或者與Nick作最後一次正式道別，也未必會像我想像中尷尬。




來到Toompea Hill，因為觀景臺既面積不大，遊客亦不太多，我只花數秒已經尋找到Nick既身影，原來佢早早就已經喺度等待我。


「你係咪唔舒服？面青口唇白咁。」


雖然我已經用淡妝掩蓋左我尚存既病容，但Nick一如既往地留意到我既面色有異樣，一眼就睇穿我。


「嗯…前兩日好似食錯野，今日好返好多喇，唔洗擔心。」


「係你成日都令人擔心。」




「你睇下我自己一個都未死得，就知我仲生存到啦。」我依舊擠出勉強的笑容。


「咁你下一站諗住去邊？」


「下一站..？係喎，唔記得同你講，我聽日其實係搭船去芬蘭，然後就喺嗰度搭飛機返香港。」


「咁快？我以為你起碼會去埋北歐先。」


「我屋企有事，要提早返去。」




「咁…我希望你順利準時上到機，唔洗再喺機場喊，我想幫你都無能為力。」Nck緩慢地說出每個字。


「嘻，我一定，一定，唔會再喺人地面前喊。」


觀景臺有一道印着英文句子既牆：


“The Times We Had.”


我們曾經在一起的時光。





呢度亦係我地旅程中最後一次相見既地方，現在看上去是多麼的諷刺。

我地曾經共同擁有過既時光，不論是美好的，揪心的，都已成過去式了。

我話，呢度既風景好靚，想留多一陣，而Nick最後選擇先行離開，冇留低同我一齊。



其實誰先離開，也沒有什麼分別，因為結果也只有一個，就是離別。


Nick臨行前說他三天後便要向北歐起程，而我只途徑芬蘭，便要回港了。


「雖然我最尾都係做唔到，但我希望，終有一日，有人會醫好你既失眠。」


這是Nick與我說的最後一句話。


如果你睇緊既話，要讓你失望了，因為我仲未搵到一個可以醫好我失眠既人。

***

好多人都話，我同佢最後不能夠開花結果，只係因為我地喺錯的時間相遇。

但如果佢真係對的人，佢就自然會出現係對的時間。

If he/she was the right person, it would be the right time.

至少到呢刻，我都係堅持住呢個想法。

返到香港後，處理左繁雜既家事，我既生活亦都漸漸回到正軌，過去一個多月既「流浪生涯」就正式結束了。

我望住房間牆上面被我貼得滿滿既明信片，諗起我同Nick喺每個地方經歷過既事，遇過既人。

每張照片，都代表住一段屬於我地兩個既回憶，或者我只能靠住呢啲事物，一直活在過去裏。

我仍然要感謝Nick喺我最脆弱既時候出現過，但正如佢所講，我諗依家連我都唔知點樣再去鍾意一個人。

我記得Nick曾經冷不防卻認真地問過我，當我再次睇番啲相既時候，會唔會記起佢，依家答案應該很明顯吧。

唔知喺佢心目中，又有冇任何事物，會令佢記起我呢？


能被你最眷戀，恐怕要下世。

《終》