《我竟然同左一個陌生男仔去歐遊...》: 《愛沙尼亞篇- 塔林 Tallinn (1.1)》

整個晚上我都自己一個呆坐在床邊，望著外面皎潔既月光淡去，太陽繼而升起，光線刺眼得我無法再正面望出窗外。

酒意亦隨着時間散走，我先回想起啱啱發生既事有幾唔真實，但現實比起一場噩夢更可怕，就算一覺訓醒都無法消除已發生既事。

我無法再面對Nick了，因為我既衝動同魯莽，我地恐怕連旅伴，朋友都再做不成，所以我終於選擇左退出，就當作係放過大家。

我收拾時，喺背囊搵到之前Nick比我既記事本，上面寫滿每個國家同城市既景點同行程，不過，對我黎講已經無用武之地了。

我諗，如果喺我悄悄離開前，在記事本寫下些甚麼，總算可以留下一樣屬於我既痕跡，就好似證明我的確出現過喺佢生命裏，即使時間有多短暫都好。



Nick：

我琴晚又失眠喇，然後諗左好多好多野，你都知我幾多愁善感架喇。

我喺度諗，究竟一個人，可唔可以同時鐘意兩個人？我覺得唔得。

人類既心臟面積其實好細，並唔夠足夠既空間容納兩個人。

唯一既方法，就係忘記前者，騰出空間比另一個人，你話係唔係？



不過我知道，呢啲野並唔係一時三刻就可以做到。

當有一日，你發現你心裏面終於有個空位既時候，你想搵嗰個人，已經未必係我。

多謝你琴晚，仲有一路以黎都照顧左我咁耐。

我依家將呢本notebook還返比你，唔再需要你既行程喇。

因為我都知道，冇人可以一直無條件咁陪著我，所以我決定剩下既旅程要自己走埋佢。



希望你唔好介意我不辭而別，對唔住！呢次終於到我講喇！我地打和了。

Take Care.

Jess

早上拖著行李臨走前，我曾經諗過，如果喺我走之前，Nick返左黎，佢會唔會好似千篇一律既電影情節般留着我，叫我唔好走。

但事實係，無論我花多少力氣，我都唔會留得著佢。

一路以黎，我都自作多情夠了，我地既劇本已不能再順著我意思走。

因為結局由我地相遇既一刻就已經被決定，仁憑我再努力，也無法改寫。

或有種隔膜　沒法攻破


都可否念於當初　吻過麼
如果騷擾你是我　不勝負荷
寧願斷絕來往　就這麼

我會消失　讓自己一個抑鬱
道謝你絕情　絕得送上這種惡疾
來日裡　你與我各自賣醉
再也不知你於週末怎麼生趣

盡快消失　為自己一個呼吸
若令你動情或者我永遠不及
即管退隱　誰人令我這麼固執

https://www.youtube.com/watch?v=pU9DwW4hbKo



這樣的愛情有兩種。

一種是單戀，再來是前度。

前者從未擁有，便永遠的失去。

後者是離開後，再也沒有回來。
 
***

我再次搭火車返回Warsaw，然後搭巴士往更東邊的國家出發。

原來自己一個搭長途巴士真係特別辛苦，因為喺我覺得最無聊時，都已經冇人會再同我談天說地；而眼睏時能挨著的，就只有冷冰冰既車窗。

我唐突離開後既一個星期，獨自一人走過了波羅的海三小國（立陶宛，拉脫維亞，愛沙尼亞）。



一個多月前我毅然決定嘗試既一次單獨旅行，終於喺我既旅程黎到終章時實現了。

幸好我還未完全喪失獨立能力，我自己一個也可以過得很好，Nick沒有我，也可以過得很好很好。

因為就像我之前所說的，這世上，真的從來就沒有誰要依附著誰才能生存。

曾經同大家講過，我自己一個人既時候，就會不停聽歌，喺我嗰段獨遊既時間入面，我手機單曲循環得最多次數既，就只有一首歌。

「她怎麼吸引你，總喜歡將我作類比
　投入與我發展你也靠演技
　專一的一個你，專一得給過去勒死

　身可以留得低，心恐怕留不低
　身份也沒憑沒據你認錯我那位


　惋惜我們依歸，給一位舊情人反噬
　原諒你太愛她把我作代替」

https://www.youtube.com/watch?v=3AM7B1ncQY8

Nick並沒有說謊，佢由此至终都係一個咁專一既人，對食物的口味如是，感情亦如是。

我地每次愛上既「下一個」，可能只係「上一個」既化身，直到有一日，我地終於搵到對的「那一個」。

但其實每一個，可能都是一樣。

因為命中註定，我們只會愛上一種人，輸給一種人，然後，被其他人愛上。

我曾經以為，Nick係我人生入面既過客，或者其實我先係佢人生中嗰個過客。

因為愛與被愛，從來都不對等。

大概很久很久以後，我都無法忘記呢次旅程中發生過每一件刻骨銘心既事，而我只會喺佢記憶裏慢慢淡化。