「九哥?點可能丫?我地呢D茶記仔,邊請得起你呀九哥。」

「唔係哩,你隨便比萬七八蚊一個月我,我可以幫你個午市同夜市營業額翻兩翻架」仇九說。

「但......但係我怕有人黎尋仇,又燒我鋪喎......」

所謂好事不出門,醜事傳千里。仇九被燒鋪一事,早就傳遍整個茶餐廳業界。

「咁....萬五蚊個月!拿出面你要請個有料既總廚都起碼兩萬三,我收你萬五!」仇九無奈地道。





「九哥,萬五蚊個月,又要屈就你,我又要終日擔憂,何必呢?」

「唉.....咁好啦,算啦。」仇九只能低頭就走。

家裡,廚藝有所進步的美芳早已煮好飯菜,等待仇九。

「老闆,做咩咁唔開心丫,又被人拒絕左丫?」小遊問。

「係丫小遊,九叔叔又被人拒絕啦。」仇九笑笑地道。





「唔怕啦九哥,聽日有班師奶仔叫我去返散工做女工,都有成五舊水一日,有一個星期工可以開,都夠頂今個月。」美芳道。

「嗯.....小遊,咁九叔叔聽日又要去搵工,媽咪又要去開工,未無人陪你囉?不如叫媽咪唔好開工,等九叔叔諗下法子搵少少錢返黎仲好啦,你話係唔係呀?」仇九借意問小遊。

「九,一家人遇到問題就要一家人去解決,唔好咩都要自己揹上身啦。」美芳歎氣道。

這個男人,真的待自己和小遊如公主一樣。

但現實就是現實。落難時,公主王子還不是要共患難?





「芳,你拖一下果邊先啦,比多兩日時間我,我有辦法架啦。」仇九說:「我唔會要我女人出去外邊捱世界既!」


「艷陽下與妹相親,望揩白首永不分,美景醉人,心相允,綠柳花間相對訂緣份.......」九哥的電話響起來。


「喂,係丫。炒散?得得得,無問題丫。頂兩日?都無問題丫。嘩六舊水日添呀?好好好,我即刻黎。」

虎落平陽,得到區區一份炒散的工作機會,仇九仍然如獲至寶。

「拿,你睇,有工返啦!你乖乖地係屋企照顧小遊,小遊又乖乖地比媽咪照顧,其他野你地就唔洗擔心啦!」仇九笑笑地說。

小遊和美芳相視,二人都不禁失笑。

「黎!寧食開懷粥,莫吃愁眉飯,來來來,開餐啦!」九哥笑說。





幸好,天無絕人之路。數月後,美芳年多前申請的公屋,終於獲派,令她們三日終能放下容身之所問題的心頭大石。

「拿,轉運啦我地!唔洗再捱貴租!」九哥說。

「但....咁即係我地正式同居住埋一齊啦喎.....我怕小遊佢會唔鐘....」美芳輕聲說道。

未待美芳說完,小遊先搶先說

「咦,老闆,如果你黎同我地一齊住,咪可以再省返多D錢囉?」小遊對仇九說。

「係丫....不過小遊你鐘唔鐘意同我一齊住架?」仇九問道。

「哦....我無所謂既,不過我要自己訓一間房,唔要同你地訓架。」小遊說。





「哈哈哈,衰女,真係人細鬼大丫你。」仇九和美芳都失笑道。