是命運，令廚師和香料遇上: 第一章 　艱苦的開端 2

「恭喜發財呀咁多位～小遊，快D同咁多位長輩拜年啦!」

美芳出生在一個大家庭內。家裡有十兄弟姊妹，她排名倒數第二。

「喂，芳。聽講你識左個新男朋友喎，做咩唔帶黎拜個年呀？」美珠說。

美珠是美芳的姐姐。

「哦....佢今日要返工丫，所以黎唔到。下次有機會再見啦～」美芳說。





「吓？年初一都要開工，你男友做咩架？」美珠續問。

「佢？佢係廚師。」美芳說

「係丫，九叔叔煮野食好好食架。」小遊加把咀。

「叫呀狗咁搞笑？」美珠說。

「唔係，佢叫仇九。個九字係個仇字無左企人邊。」美芳說。





「喂但廚師今日都無假放？我見呀文今日都放假既？」美珠說。

「唏，我做酒店，我又負責編假，老虎都編自己今日放假啦。」呀文插口說。

呀文是家庭中最小的女兒美泙的丈夫，同樣是個廚師，不過專精西廚。

「佢以前係自己開茶餐廳架，不過後來無做，而家先去幫人打工姐。」美芳嘗試為仇九抓點面子。

「唔係無做，係被人燒左。」美珠的丈夫呀強突然開口說道，他是重案組組員，態度一向囂張。





「仇九，前黑道金牌打手。老父被人於街頭斬死，故展開報復，以數十人之力翻起對方百多名人士。報仇後突然棄黑從廚，手上刀鋒只斬菜不斬人。開辦茶餐廳「九記」本來一直相安無事，但約一年前被仇家尋個正著放火燒鋪，變得一無所有。」強續說：「佢未從良之前差館個FILE厚過佢餐廳塊牛排呀。」

「吓？一無所有。妹，咁即係你差我條數，我都唔洗指意你有得還啦？」美珠說。

美芳為了前夫，欠下了美珠一筆。

「都....都唔係既。我而家上左樓，交平租，每個月大約都可以還到....五....五百...」美芳心中計算著。

「拿，每個月還一萬比你地，一年還足十四期，連本帶利還三年清晒你，OK?」仇九不知那時推門進內。

「大家恭喜發財！！伯父伯有新年快樂。我係美芳既新一號男朋友呀！我買左幾支紅酒呀，VSOP呀，同埋D朱古力果D上黎同大家拜年呀！」仇九大聲道。

打完招呼，美芳把仇九帶出門外。

「喂！你今日唔係要開工架咩？仲有你買咁多野做咩呀？Ｄ錢又做咩搶住黎還呀？點還呀？中六信合彩呀？」美芳不停地質問著仇九。






「唏，我辦事你放心啦。今日抄散果時，我唔覺意露左兩手，炒左碟金風炒蛋比個老闆試，咁個老闆都唔野少，一試就知我廚功有幾了得，就叫我去佢天水圍間新店度做總廚，成兩萬五蚊個月呀。仲即刻比我放工外加先出個半月糧比我，真無得頂。」仇九說。

「我唔信！人地唔怕被人燒鋪咩？」美芳問。

「呢個老闆新入行，有錢無掟洗，又唔知行情。而家我係佢支盲公竹黎架。」仇九說。

「你真係無呃我？」美芳扁起雙咀問道。

「當然無啦！」仇九笑笑地回答。

「我無呃你，只不過我人工唔小心講多左一萬銀姐。係天水圍打工想有兩萬幾一個月，邊有可能丫。」仇九心想。

「美芳，三缺一呀，快Ｄ過黎。」美芳的媽媽叫道。





「得～黎啦！」美芳和仇九打個照面，就走開去了。

此時，呀文行近仇九。

「九哥，你好，我叫呀文，都係做廚，做西廚。我略有聽過九哥你個名號同事蹟。」呀文伸出手向仇九示好。

仇九也大方地和呀文握個手。「你好，有咩指教？」仇九直接問道。

「哦...唔係。頭先我唔小心聽到你話係天水圍返工有成兩萬幾蚊人工，好奇想黎八掛下姐。」呀文說。

「我呃個傻妹姐，得萬五渣嘛其實，不過希望你唔好同佢講，費事佢又傷心幾晚。」仇九不作隱瞞。

「老實問一句，其實佢欠家姐條數，係為左佢前夫而借，你真係打算幫人還？成三十萬喎。一家人，你唔還唔通家姐會搵人劈個細妹咩？」呀文見仇九直接，他也直接起來。





「唉，大丈夫有所為有所不為。我愛美芳，就要為佢分擔所有野。佢一日未還清條數，一日都抬唔起頭做人。我而家捱三年，三年後就有好日子過！美芳都會有好日子過！」仇九說道。

這一刻，呀文也不禁對眼前的真漢子敬佩起來。