返到黎研發部, 可以話係返到黎現實世界, 對比起虛擬, 現實世界真係太現實, 唔可以做到天馬行空既事

呢刻真係好想快啲入返去繼續玩...只可惜身體唔容許...我覺得肚餓了~ 雖然VRT呢部機械可以傳送訊息比使用者大腦, 令到我地唔覺得有飢餓感, 但一回到現實, 全部感覺都會返晒黎, 呢樣亦都係訓練既一種, 同時間都需要適應

我地大家差唔多時間登出, 一出返黎望見大家原來既外貌, 哈哈~真係有啲唔習慣

雖然Apple係科技界黎講算係數一數二既大公司, 有實力又可以長期霸住業界龍頭第一位, 但佢地既canteen...係科技界亦都出晒名係美食沙漠, 無一個canteen係好食

「點解咁大既公司...啲野食都可以咁難食? 唉...」Zero嘆氣





「劍仔, 你唔洗理佢嫁, 佢每次黎食飯都一定講呢句」杰仔開口講, 我報以微笑

「係呢劍仔, 慣唔慣呀?」火火隊長問我

「um...可以呀, 其實又唔太難食既」可能平時我老母煮啲飯仲難食

「哦...飯還好, 我係問你入到去慣唔慣? 進度如何? 你知我地時間都唔算剩返好多啦」火火果然係一個好直接既人, 講野都係單刀直入

「我...」係我都未開口講之際, Alice已經衝口而出咁話「劍仔佢好犀利呀! 佢既悟性一定唔會比杰仔差!」





我眼尾望一望杰仔, 同樣杰仔眼尾都望一望我

「我......」老實講, Alice咁講完唔多唔少都有啲暗爽, 但始終我係新人, 又唔可以太串

「我都係撞彩姐」

「邊有咁多彩撞呀!」Zero好大力咁拍一拍我背脊, 好彩我無食緊飯

「我都知Steve親自搵返黎既人唔會咁簡單」火火坐直, 我feel到佢眼神中帶點欣賞既目光





Bobo就好似聽完唔相信咁, 可能佢覺得無可能有第二個杰仔出現...因為實在太難得

「咁你係咩屬性體質?」杰仔一如以往, 表情唔會大起大跌咁

「我果時感覺到風既元素, 所以我就試下集中去吸收, 有足夠既魔力既時候......」我未講完就比火火打斷左說話

「風呀? 咁你可以請教下杰仔, 呢度除左佢之外, 都無人熟習風屬性」

火火再補充「其實你地每個都了解下隊員既屬性同能力, 對打塔都好大幫助, 一係大家講下自己既屬性同專長? 咁我就講先啦, 我比較簡單, 剩係識用火, 其他半桶水都不如, 主要係團隊做輸出既角色」

Zero「我主要係雷屬性, 但其實呢樣就比較難吸收, 因為要係空氣中吸取大量微細既電流先會令自己技能同能力有提升, 所以依家副修水屬, 希望有幫助啦...另外我主要係做突擊, 收集下情報咁啦, 因為我儲魔力既時間可能比較長, 所以戰鬥果時都係打完一波再儲, 再打一波咁, 但唔好睇少我呀! 我啲爆發性傷害嚇死你呀, 哈哈」

Alice「我係隊伍入面唯一既補師~因為我係水屬性, 破壞力唔夠強, 防守力又唔夠勁, 所以學習輔助技能係比較易去發揮, 當然我都係做完先知, 被需要既感覺幾好啦~哈哈哈哈哈哈哈~~~」

佢又黎料啦...





Bobo「我...我係地屬性...攻擊手段都好需要施法時間, 所以要前面頂住啲攻擊...我先有機會出技」

杰仔笑道「哈哈, 劍仔唔好怪Bobo, 你地未算熟, 佢係怕醜啲嫁啦, btw 我係主力風屬性, 其次會用火同地屬性既隊伍主力打手, 當邊一方要支援我就會去補位...除左輔助能力低之外, 都未有野可以難到我既」

杰仔一路講, Bobo同Alice都用仰慕既目光望住佢, 雖然佢外表係唔出眾, 但的確講野有自信既男仔係幾charm

睇黎杰仔係一位男人公敵

「好啦, 劍仔你大概都知每個人都有一個職位在身, 咁屬性既專長就唔講咁多啦, 呢啲野無特定限制, 話唔埋你自己突破左都唔定! 不過點都好, 由基本學起係好緊要, 聽日無咩特別事, 你跟杰仔去學下技能控制啦, 風屬性有好處, 易吸收, 只係難用得好」火火交帶落杰仔做, 杰仔亦都好尊重隊長

食完飯之後, 我地每個夜晚都有個breifing, 係講返今日進度之類既事項

行緊去meeting room既時候, 火火同我地講「記住今日我地係入面講過既野, 記住記住! 得我地知就夠啦!」





我地互望一眼...微微點一點頭

Meeting room門一打開, 入面既唔係Steve, 而係Koey

「Koey姐~」Zero第一時間沖入去

Koey神息凝重「黎齊啦? 有啲野長話短說啦...」

「Steve朝早去左開會, 之後就失去聯絡啦, 到依家都未check到佢去左邊」Koey搖頭

「下...Steve一定唔會咁無交帶, 佢連去邊都無講低?」火火問

「無! 咩都無講, 剩係話要去開一個好緊要既會, 叫我留返係度睇住你地唔洗跟埋去」

「有無試過搵平時合作開既公司問過?」杰仔提議





「有, Andy同Suki已經搵左好耐, 未有一間話今日約左Steve開會」



究竟...Steve你去左邊?





 
已有 0 人追稿