新婚前夕, 我穿越了時空: 第一章

 「今晚我地咕碌告別自由乾杯!」
呀傑用豪邁既語氣講出呢句之後, 我地就開始左呢晚瘋狂的一夜。 當大家都開始飲到七分醉既時, 我呢世人最好既兄弟–呀傑走黎撘住我
「你聽日就結婚啦, 真係唔後悔?」
我錯愕左一下
「點解要後悔呢? 彤彤都唔錯丫, 係有時會霸道左D啫」
呀傑繼續半醉半醒咁講
「你最愛個個係佢咩? 你最愛個個明明係…..」
佢都未講完就斷左片, 我拎起杯飲剩一半既大黑牌, 一邊望住呢個最佳損友苦笑
(仆街仔, 真係無野瞞得過你, 如果時光可以倒流返10年前既話…)
我一邊諗住呢個無可能既妄想, 一邊將手中既半杯黑牌一飲而盡….




個晚後尾發生左咩事, 我都唔記得啦, 剩係知道返到屋企就死屍咁訓著左…
 
正當我訓到矇矇矓矓之際, 我聽到咕碌媽把聲好似追數咁嗌
「起身啦! 遲到啦!」
我望一望個電話…「7:45AM」我即刻嚇到鳩都彈起埋, 死啦! 明明約左個化妝師6點半SET 頭, 7點半出車接新娘, 今鋪大檸樂啦, 結婚接新娘都遲到, 彤彤悔鳩我婚都似啦! 我用9秒9既速度衝去洗面刷牙換衫, 奇怪既係我明明尋晚出去搵呀傑之前已經掛好左套踢死兔, 但係就搵極都搵唔到係邊, 我急起上黎就問係樓下既咕碌媽
「媽, 我套西裝呢?」
咕碌媽比左個黑人問號既表情我, 然後「吓」左一下, 我好唔耐煩咁同佢講多次「唔好玩啦! 我尋晚掛左係度個套西裝呀? 我趕住去接新娘呀! 我已經遲晒到啦! 你掛左套西裝去邊呀?」
咕碌媽一路笑一路講
「你係咪訓到SHORT左呀? 定係岩岩落機唔習慣? 今日第一日開學, 你好快D換完衫落黎食早餐返學啦! 唔好一開學就遲到呀!」
我到呢刻都仲未冷靜到, 但係咕碌媽明明係最期待今日婚禮既人黎, 佢冇理由玩鳩我架….正當我諗極都唔諗明之際, 我決定打比我老死呀傑, 睇下而家到底咩情況。 我拎住個電話係度碌, 上下來回碌左2,3次, 電話薄入面出現左好多個我唔認識既人, 但係就偏偏搵唔到呀傑個名。然後我突然發現我手上面拎住部電話同我用開部係唔同型號既電話, 而且…而且…仲要係10年前既型號, 我打開電話裡面既日曆, 然後呆左咁望住個SCREEN, 上面既日子係….「2008年9月5日」…..




正當我仲LOAD 緊而家到底係咩情況既時侯, 咕碌媽 “砰” 一聲推開左我度房門, 對住我大嗌
「袁固陸, 而家幾點啦? 你仲未起身換衫呀? 你細佬都出左門口返學啦!」
我雖然仲未清楚究竟係咩一回事, 但係我眼前既呢個女人的確係十年前既咕碌媽…我入到廁所望住塊鏡, 見到鏡裡面既竟然係十年前既自己…..