新婚前夕, 我穿越了時空: 十。一特別篇

呢件事係發生係我穿越返去10年前之前嘅時候

 (彷彿天和地在挑選我跟你) 電話鈴聲響起
「喂?」
「圓碌碌~」
「點呀~?君君?」
「出黎呀! 好悶呀!!」
「做咩呀? 你好得閒咩? 咁好搵我~」
竟然真係等到佛誕…當然我唔會比君君知佢搵我我有幾開心啦
「係呀! 我屋企人去晒旅行, 得我一個留返係度, 陪我食飯丫!」




「哦~~原來係搵我攝時間!」我扮嬲咁答佢
「咪講得咁難聽啦, 反正你都係一個人食飯嘅姐~咪當係我陪你食囉~」
咁都比佢諗到…你叫我點拒絕君君呢….
「咁你想食咩呀?」
「唔知呀, 你過左黎我屋企先啦~」
「嗯, 我半個鐘之後到~」
 
(叮噹)
「嘩! 你真係半個鐘就到架喎!」
「女神約喎~點敢遲到呀」




「口花花! 入黎先傾啦!」
君君開門嘅時候我已經留意到, 佢應該仲係著住係訓覺嘅衫,
一件有小小貼身嘅粉紅色短袖T-SHIRT 加埋條黑色嘅排球褲…完美咁展示出君君嘅身體線條…
雖然君君身材唔係特別出眾, 但係應有嘅都有, 而且又唔會過份誇張, 加上淡淡嘅香氣, 真係係男人見到都心郁啦!
「坐陣先啦! 晏小小先出去食野啦~最近開左間新嘅拉麵好似幾好味」
「嗯, 好呀!」
君君曲起腳坐左上梳化度, 然後拍一拍隔離個位
「坐啦~唔駛怕醜喎!」
我怕嘅其實唔係醜…而係怕我條理知線會斷….
我坐左係君君隔離拎左部電話出黎玩, 但係佢張梳化比較細, 所以君君隻腳輕輕踩住我大脾側邊, 然後問我




「你最近點呀? 」
「比較忙囉, 又要返學又要返工, 你知啦, LAST YEAR特別多野做架嘛, 我又唔似得你咁聰明!」我姑意窒左佢一下
「我本來都以為我自己聰明, 我讀左而家呢科之後先發覺我根本係最差個個…」
大佬呀…你讀嘅係腦神經科…個D根本就係天才讀嘅科…你差極都係天才裡面最差個個姐…
「你得嘅! 比D信心自己啦! 」我嘗試鼓勵君君
「你做乜唔望住我講野嘅?」 君君似乎有D唔開心
「你著到咁…你想我望邊呢?」 其實我內心係不知幾想由頭望到落腳…..
「你想望邊咪望邊囉….」君君好細聲咁講, 但係我當時聽唔到佢講咩
「吓?」
「咁你同人傾計就緊係望住人個樣架啦!」
我感覺到君君有小小嬲, 於是我望住佢
「對唔住呀~唔好嬲啦~君君你嬲就唔靚架啦!」
「我先冇咁小氣呀!」君君笑一笑咁講「你有冇搵女朋友呀?」
「冇呀, 你有介紹?」
「你唔係要等我個妹咩?」




「扯, 仲以為你有介紹! 咁你呢? 冇人追你咩?」
君君猶豫左一陣…
「有嘅….但係都唔知同佢夾唔夾….」
「唔試過又點知喎, 你對佢有冇好感先?」
「咁又唔係話冇, 不過都仲有其他選擇架嘛!」
「試下囉~唔岩咪飛左佢囉~」
雖然我好想同君君講 「不如考慮下我啦~」
但係我知我唔單止外表唔吸引, 又唔識講野去TUM佢開心, 更加比唔到幸福佢,
所以我唯有將呢句說話留返係內心深處…
君君好大力咁拍左我手臂一下
「唔制!咁我咪好蝕底!」
「你快D去換衫啦! 出去食野呀!」
然後君君就返左上房換衫。 望住君君行上房嘅背影, 我知道我唔多唔小有鍾意佢.... 
可惜我又冇勇氣同佢表白。 而且我唔想背叛君君對我嘅信任, 佢信我唔會做任何傷害佢嘅野先會可以係我面前放下所有防備,
我亦害怕失去一個咁好嘅紅顏知己, 所以只好將呢份愛意收埋係心底…




同君君食完飯之後幾日, 收到佢嘅短訊
「我同左個個男仔一齊啦! 你都快D搵返個啦! 唔好等我個妹啦!」
望住呢個短訊….我忍住就流出黎嘅眼淚…..回覆佢
「如果佢對你唔好, 一定要話我知…我會幫你出頭架!」
因為…我愛你