新婚前夕, 我穿越了時空: 第三章
記得第二堂係上FOOD & NURTRITION, 係堂輕輕鬆鬆鄧梓峰既堂黎…一入到班房, 對住一班比我細2年既小朋友, 真係唔係幾想上堂…我如常坐係班房最後面既位置, 然後一個熊一樣既背影就得左係我門前坐底, 我記得佢叫EDDIE, 係我第一個係呢間學校識既人, 雖然同佢唔熟, 但係印象中佢係一個好好既人。上堂既時侯, 個老師就係咁將D NOTES寫左係個黑板上面叫我地抄, 我唯有硬住頭皮同前面個人講
「唔好意思呀, 我抄唔到D NOTES, 可唔可以借你個份比我抄呀?」
當然我亦都冇心去抄啦, 但係個個係度抄自己唔做野又好似好怪咁… 當我問完前面個位熊一樣既同學(EDDIE)之後, 佢隔離位坐住個細粒D, 黑黑實實既男仔, 我記得佢叫JON, 同EDDIE 係朋友, 就同我講
「我借我個份比你抄啦, 佢(指住EDDIE)D字好樣衰, 正常人係睇唔明架」
「好呀, 唔該你, 我叫袁固陸呀, 你地叫咩名呀? 下次都一齊坐丫」
黑黑實實個男仔笑笑口咁同我講
「我叫JON」 指一指佢隔離幾高大下個男仔 「佢係EDDIE, 我同佢由GRADE 1 已經識架啦, 佢份人好木獨架。」
就係落堂之前個老師就叫我地搵4個人組成一組做黎緊一年既活動, 就係咁, 我同EDDIE, JON 仲有一個叫CAROL既女仔就成為左呢一堂既PARTNER啦。
係外國讀書就係輕鬆, 1日得4堂, 每堂都係1個鍾左右, 完左第2堂之後就已經係LUNCH TIME, 我亦都照預約左既時間去搵 NIKKON, 岩岩去到校務處, 就見到佢拎住D 書行緊返OFFICE
「你黎左喇? 你未食LUNH架喇? 你等我一陣, 我放低D書同你一路食野一路傾」
「嗯, 我地可唔可以去個靜D既地方傾?」
「冇問題, 跟我黎啦」
NIKKON 帶左我去學校對面既一間咖啡室度坐底左, 叫左2份三文治, 佢問我
「你話有D好不可思議既事發生左係你身上, 到底係咩事呀?」
「我講出黎我怕你會以為我有精神病…唔比我繼續讀書…」
「唔會, 出左學校我地只係朋友, 唔會涉及任何學業上既問題」
「咁我講啦…我係由10年之後黎既..」
NIKKON 嗤一聲笑左出黎, 然後佢話
「你話你E家係10年之後黎既? 即係咩意?」
「我知係好難令人相信, 但係你眼前既呢個我, 係10年前既我, 但係係個肉體入面既我, 就係由10年之後既穿越返黎」
「你肯定係講緊笑, 呢D會唔會只係你既幻想, 或者你有冇証據可以証明你講既係事實?」
「呢個唔係幻想, 我可以証明比你睇, 你今日係第一次見我, 係咪?」
「冇錯」
「但係我就係10年前聽過你講你既故事, 你總共識得講8種唔同既語言, 你爸爸媽媽係唔同國家既人, 所以你由細個開始已經對點樣教語言好有研究, 你教我地學校既第3,第4, 同第5 級既ESL課程」
「無可能….你點會道呢D….」
「我仲知道你今年教我個班既課程入面會用到DISNEY套冰河時期」
「無可能…你真係係10年之後黎既?」
「我都唔知, 我既肉體係16歲, 但係我既記憶同我既精神都係26歲既時侯黎既, 我都搞唔清楚點解會咁…我應該點做先返到去我原本既日常生活…?」
「嗯…D咁不可思議既事竟然會發生係你身上…我都唔知點可以幫到你, 但係既然你黎左呢個時代, 你應該好好去享受多次呢種年輕既滋味, 如果可以既話我都想返返去16歲既時侯, 哈哈!」
「你都講得岩既….我而家除左以16歲既身份生活落去都冇其他選擇….」
「不過我提醒你, 你千祈唔好比其他人知道呢件事, 唔係你一定會好麻煩, 好好地做返而家既你, 繼續扮演一個16歲既學生, 有咩事你可以隨時黎搵我傾 OK?」
「嗯, 唔該晒你先, 我都係時侯要返去啦」
下午既2堂話咁快就完左, 3點就放學, 又冇野做既生活雖然係優哉悠它哉, 但係突然之間變成咁又有D唔習慣, 返到自己間房對住空無一人既房間真係覺得好孤單…咁又係既, 10年前岩岩同屋企人由香港搬左黎呢個陌生既城市, 朋友又冇, 目標又冇, 當奮鬥左10年, 準備成家立室之際竟然所有野都要由頭黎過…究竟個天係咪玩我…一諗到呢度, 我既眼淚終於都控制唔住流左出黎, 我攬住個枕頭一路係度喊, 一路又怕細佬聽到我喊…過左唔知幾耐, 我突然聽到呀傑把聲係腦裡面響起
「你最愛個個係佢咩? 你最愛個個明明係…」
呢句係我腦海中閃過既說話話將我由絕望悲傷之中拯救左出黎, 無錯, 既然返左黎10年前, 咁呢十年黎所有既遺憾, 所有後悔過既野我都可以做野去彌補去改變佢地。 為左轉換一下心情, 我行左去屋企附近個公園度坐底左, 係度諗究竟呢10年黎我覺得最後悔最遺憾既事係咩…正當我係度思索緊呢個問題既時侯, 突然傳黎 “噫—噫–“既打千秋聲, 我望向千秋個邊, 竟然比我見到君君。君君係我地學校既女神, 唔單止人靚冇架子, 成績又好, 人緣又好, 最難得既係咩, 係佢唔似得D港女咁收兵, 試過有幾條仔想溝佢, 佢一句SAY NO拒絕左佢地。無論班厹點獻殷勤, 呀君都唔會接受,佢簡直係一個高貴脫俗既存在。我本來想行上前同佢打招呼, 但係係呢個時侯佢根本未識我, 甚至唔知道我既存在…我只好靜靜地係佢面前經過, 慢慢咁行返屋企。