新婚前夕, 我穿越了時空: 第四章

返到屋企, 咕碌媽已經係度煮緊飯, 見佢心情唔錯咁, 今日應該係同班師奶會一齊出左去買餸同講八掛,
好彩佢冇再追問我今朝講嘅野, 唔係我就有排煩。
食完夜晚, 我返入自己間房開始諗NIKKON 同我講嘅野, 而我亦了解到如果比人知道左我係10年後黎嘅呢個事實會有幾大影響…
所以我不停咁催眠自己我咩都唔知咩都唔記得, 我盡可能都唔好去做任何野影響到其他人嘅末來發展。
第二朝我比平時早起身返到學校, 一個人係籃球場度射籃, 順便清醒下自己嘅頭腦。 突然間有人係背後問我
「喂~打唔打返場1ON1 呀?」
我擰轉個身, 望住呢個問我打唔打1ON1 嘅人…雖然把聲唔同左, 個樣冇咁成熟, 但係我好肯定佢就係我最好嘅兄弟 –呀傑。 佢見我啤得佢咁狠, 佢提高佢嘅聲量, 問多我一次
「我問你, 打唔打返場1ON1呀?」
我抑制住自己個鼓想衝上去攬住佢, 同佢相認嘅衝動, 答左佢一句
「好呀」




但係我呢個人如其名嘅肥仔, 又點會夠呢個「原。籃球隊」嘅控球後衛打丫, 唔駛15分鍾我就比佢炒左2次7比0…
.正當佢打到冇癮之際, 其他嘅同學陸續返到學校, 於是呀傑好客套咁同我講
「喂, 我班FRD搵我去打波呀! 下次再打過丫!」
「哦! 好啦…」
「係呢…可唔可以借個波比我地打呀? 我LUNCH TIME攞返比你丫。」
如果我係第一日識佢當然唔會借, 但係佢係我10年嘅死黨, 以我認識佢嘅為人, 亦唔怕佢走數拎左我個波唔還。
我離開左籃球場之後. ,就直接去班房等上堂。
入到呢個空冇一人嘅班房, 我一如以往簡最後同角落頭位坐底。
角落角位嘅好處係除左可以偷望每一個班房入面嘅人做緊咩之外, 老師又唔多留意我, 仲可以同人零交流, 完美咁演繹出一個肥宅應有嘅生活模式。
同學逐漸返到黎, 望住班房入面嘅空位一個一個變少, 我亦開始期待緊坐係我身邊嘅會係個咩人呢?




由於係自由選擇座位, 大部份人都係老師入黎之前已經組成左佢地嘅圈子,
仲有幾隻厹仲已經MARK定左同邊D女坐
至於我呢...就係邊個坐我隔離都無所謂, 最緊要係佢唔好咁多野講, 可以比我安安靜靜咁趴係台度訓教就OK la。
反正上嘅係數學堂, 今時今日嘅我唔聽書都可以攞A。

(叮噹叮噹~叮噹叮噹) 上堂嘅鐘聲響起,
大部份同學都已經揀好左自己嘅座位, 而我就仲係度FF緊一陣有個好可愛嘅女仔會坐係隔離
老師已經開始點名,  可惜我隔離個位仲係冇人坐…呢一刻我終於體會到子華神所講
「成個巴士就係得返你隔離個位, 然後有個靚女情願企, 都唔錯你隔離個空位」 係一種點樣嘅心情…
就係我接受左今個學期孤獨終老, 施施然趴返係台度訓嘅時侯, 有人輕輕力咁推開左度班房門, 然後班房裡面傳黎一把好甜好溫柔仲好好聽嘅聲音




「唔好意思呀, 因為塞車所以遲左」
我好8掛咁抬起頭望一望呢個遲到嘅女仔, 依稀見到佢有係一位皮膚白晢, 烏黑亮麗紮住條長長嘅高馬尾,
臉型略帶小小BABY FAT同帶住副黑粗框眼鏡。 佢靜靜咁行埋黎我隔離呢個全班唯一嘅空位坐底左。
係近距離之下我終於望清楚, 原來呢個遲到嘅女仔竟然就係我尋晚係公園撞到嘅君君…
「早晨」 君君禮貌地同我打左聲招呼
由於今日已經發生嘅事已經同我記憶中完全唔同, 我嘅思考都仲係相當混亂..已經唔知應該比咩反應君君。 結果我淨係對住佢微笑, 點一點頭當打個招呼。
我發夢都唔敢想像, 我同全校公認嘅女神相隔竟然唔夠30CM, 更加唔相信呢D機會竟然會屬於我。
同時我亦好淆…好怕改變左嘅歷史會影響我同君君以後嘅關係, 唔可以再同佢做一世嘅朋友。
唔知係呢個時空, 君君係點睇我呢個肥仔呢? 佢會唔會覺得同我呢件油淋淋嘅野坐埋一齊好核突呢?
我今次應該點開口同佢打開話題好呢? 人地話歡樂嘅時光過得特別快, 原來15/16嘅時光過仲快, 當我仲煩惱緊一大堆問題嘅時侯, 連堂2個鍾嘅早上堂已經上完。
我執好野之後, 馬上狗沖返去CANTEEN 嘅角落, 打我嘅太鼓之達人。
打機嘅最大好處就係可以完全沉醉於自己嘅世界, 帶埋個HEADPHONE之後仲可以屏蔽埋身邊一切嘅嘈音,
而且一般人見到一個咁宅嘅肥仔亦唔會主動去騷擾佢。
太鼓之達人可以話係我其中一隻最鍾意玩嘅遊戲, 當年其中一件我最唔開心嘅事係當我開到鬼LVL 嘅時候, 因為唔小心跌左部NDS落水渠, 連GAME帶SAVE乜都冇晒…
所以今次我立定決心一定要玩爆埋個鬼LVL ! 正當我進入左呢個忘我境界嘅時候, 身邊突然傳黎一陣汗臭味打斷左我嘅集中力




我逼於無奈只好執埋D野搬位, 冇計啦... 肥宅就好似一隻過街老鼠咁, 人見人打, 根本就冇我嘅容身之處。
明明成個CANTEEN咁多位, 係都要得個屎忽埋黎做咩WO…
正當我起身準備走之際, 岩岩得個屎忽落黎個條友就嗌住我…