新婚前夕, 我穿越了時空: 第六章

「我返黎啦!」
「你沖涼先啦! 就食得飯架喇!」
「媽, 聽日你得唔得閒呀?」
「做咩呀?」
「我想….」
「你又想買咩呀!」真係冇野瞞得到我舍咕碌媽…
「係呀, 我想學打羽毛球, 所以想去買塊球拍呀」
「你又想學打羽毛球呀? 固仁岩岩先問我攞錢去買球拍! 我邊有咁多錢呀? 你兩兄弟SHARE塊拍用啦!」
「呀媽….羽毛波唔同士碌架呀…邊有得SHARE CUE GA…..」
「你地自己傾掂佢! 總之屋企就冇咁多閒錢養你地啦!」 




我知道就NUR落去都唔會有結果, 我唯有去沖涼同第個機會再去叫呀媽資助我…
我沖完涼冇耐就已經開得飯, 同時固仁都已經買完球拍返黎 
「仁仔, 你幾時開始打羽毛球架?」
「關你咩事?」
「冇….呀媽話比錢你買左塊拍, 想問你借黎用姐…」
「你唔駛諗喎, 你要去羽毛球學會打波咪借佢地D拍用囉」 
咪住…點解佢會知我去羽毛球學會既….唔通佢都係個度? 於是我細細聲問固仁
「你都遞左入伍申請表?」
「咁又點呀?」
「為左君君?」




「小! 都話唔關你事咯! 再嘈都係唔會借拍比你用架啦」
我FEEL到固仁好似唔係好想講呢個話題, 但係我決定拋磚引玉…
「係呀~~? 我同君君同班, 佢就坐我隔離, 仲諗住可以幫你收下風TIM, 睇黎可以慳返啦~」
「你同君君同班? 讀咩呀? 佢點會坐係你呢個圓碌碌嘅野隔離貶低自己身份架?」
「讀數學囉~ 你知我數學不嬲都麻麻架喇….所以咪痴住個學霸, 有唔明都可以問呀嘛!」
「呀哥, 如果你同君君去溫書叫埋我得唔得呀? 最多我借塊比你用啦!」
我呢招拋磚引玉果然有效, 少年你真係太年輕了..我隨口講下你就失晒方寸,
既然而家個勢係我個邊, 當然就係食盡架喇!
「睇下點啦~ 你又唔話我知你想知佢D咩, 咁我又點幫你收風呢?」
「總之咩都想知啦! 最好你就可以介紹佢比我識! 」




「咁介紹比你識我有咩著數先?」
「妖! 你自己想溝君君咪講囉! 你最多咪做第四萬零一個!」
望住我細佬氣急敗壞咁原來都幾好玩架喎, 但係難得有機會重新黎過, 我真係好想修補同細佬之間嘅關係,
而且君君亦唔係我嘅目標, 所以我不妨賣個順水人情比佢
「第四萬零一個都有佢既方法令女神開心既! 總之我有信心可以幫你溝到君君啦!」
 返到房之後, 我開始擬定應該點去接近君君,
孫子兵法有云:「能打, 裝作不能打, 要打, 裝作不要打」
肥仔想埋女神身最簡單嘅方法莫過於將自己最弱嘅一面係女神面前展示出黎, 進而激發起佢地內心深處嘅母性。
再加上我係大部份女女心目中都係人畜無害嘅宅男, 反而可以更容易令D成日比厹纏身嘅女神放下戒心。
今次幫細佬嘅同時, 又可以為自己接近珊珊鋪路, 真係一石二鳥之計~~ 哈哈哈哈!!
正當我沾沾自喜, 擬定完接近君君嘅計劃之際…我突然諗起樣好大鑊嘅野
「仆街…呀傑都係想溝君君架喎…今次夾左係親兄弟同契兄弟中間…我應該點做好….而且我咁樣做即係改變末來, 係連鎖反應下我嘅未來又會發生點嘅變化呢…」
每次諗到D麻煩野我就會好想訓覺, 當我準備去沉思嘅時候, 電話突然收到個唔識嘅人傳黎嘅短訊
「HELLO, 訓左未呀?」
我猶豫左一陣, 最尾都係決定回覆




「未呀, 請問你係…?」
「我係君君呀! 唔好意思呀, 咁夜TXT你」
「唔緊要, 反正我都未訓, 做咩呀?」
「冇…其實係想問下你...有冇興趣幫手做羽毛球學會嘅COMMITTEE」
「做COMMITTEE 有咩要做架? 我咩都唔識, 你唔介意我做增加你地嘅工作量咩?」
「其實都係D 好簡單嘅野, 都係幫手睇住個場, 負責SET TIMER同登記邊個借左拍咁架咋!」
「嗯….可唔可以比我考慮下先呀? 我聽日答你丫」
「可以! 不過你要盡快答我呀! 因為我要將個COMMITTEE 成員名單交上去比學生會同負責老師。」
為左可以更順利咁接近君君, 我決定應承佢做COMMITTEE! 不過,
雖然我係會應承幫佢手, 但係點都要吊返高小小黎賣, 所以我決定已讀君君, 由佢等下先。
同時, 我腦裡面浮現出一個疑問…點解君君個個唔搵, 係要搵我幫手? 

PS. 早2日紙言個SERVER 好似壞壞地, 所以UPLOAD唔到..SORRY- -