新婚前夕, 我穿越了時空: 第五章
「喂! 你漏左野呀!」
當我準備走嘅時候有個人嗌住我我知道係冇可能嘅事, 因為我唯一係書包拎左出黎嘅就只有我手上嘅呢部NDS,
所以我冇理佢繼續搵其他位繼續打埋個關鬼級。
我岩岩坐底冇耐, 又聞到個陣汗臭味, 係呢個MOMENT, 我真係要爆啦! 我就除低我個HEADPHONE, 同佢講
「成個CANTEEN咁多位點解你一定要坐我隔離呀? 你想點呀?係咪肥仔好蝦D?」
「還返個波比你呀! 同你講好左LUNCH TIME我黎搵你架嘛, 唔阻你啦~走先啦」
原來個條成身汗臭嘅友仔係呀傑, 我完全冇左件事唔記得佢話過LUNCH黎搵我我好唔好意思咁同佢道歉
「SORRY呀, 我冇左件事呀! 唔該你呀! 我頭先因為好努力咁諗緊D野, 所以脾氣差左D」
「唔緊要, 我叫左你幾聲架喇, 但係你都唔冇反應, 所以咪行過黎搵你LO」
佢望一望我手入面玩緊嘅遊戲繼續講
「我都好中意玩呢太鼓架, 可惜我玩得唔好, 下次我地一齊打丫」
「好呀! 我岩岩先轉黎呢間學校, 成日都一支公悶到乜咁…我叫袁固陸, 你可以叫我圓咕碌架」
「我叫呀傑, 你有咩唔明就問我啦!」
望住我呢個 “失左憶”嘅老友, 我心裡面其實諗緊:「我梗係知你叫呀傑啦, 我仲同你FRIEND過打BAND TIM」
但係我冇講出口, 因為我唔敢想像呀傑會有咩反應,我只可以好似HI BYE FRIEND 咁同呀傑講
「好呀! 唔該晒你呀!」
我同呀傑交換左電話同FACEBOOK之後就各自返去自己嘅課室。高中嘅時間過得特別快, 上堂合埋眼冇耐, 一 擘大眼就已經落堂。
我係一個不折不扣回家社社員, 係我嘅小學, 中學同大學生活都係一丁友上孤獨上學, 放學後亦唔會參加任何嘅課外活動直接就返屋企,
難得有一次重頭黎過嘅機會, 我決定要做出一D改變, 就係參加學會活動!
當時嘅我萬萬估唔到, 我嘅呢一個決定竟然會改變左我以後嘅人生…
我一早就係學校嘅學會簡介度見到個我幾有興趣嘅學會, 登登登登,
呢個就係羽毛球社。 所謂心動不如行動, 我決定去體育館度報名參加羽毛球學會!
之於點解我呢個肥仔會對羽毛球有興趣呢? 其實原因好簡單
就係我聽人講好多女女打羽毛球, 咁我就可以早D識到多D女女, 增加一下自己同女女相處嘅心得!
另外一個原因就係…羽毛球場比起其他球場細, 感覺上行2步就可以打到個波,
比起踢波打籃球呢D比賽跑得快嘅活動, 羽毛球好似比較適合肥仔去打。
由於我比較遲黎到體育館, 當我去到嘅時候已經塞滿晒人…而且人多得好唔正常…
由我踏入體育館個刻起, 我就已經感覺到唔少鄙視嘅目光, 就好似係度同我講緊
「呢個肥仔係度做咩呀?」「呢度已經夠多人架喇! 個場又唔係大, 而且又熱又焗通風又唔好…仲要得個移動臭油池入黎, 想臭死人咩?」
你估我想肥嘅咩? 我由細到大都圓到好似個波咁, 試過好多次減肥都唔得,
每次做完運動反而仲食多左野…加上肥人一向體溫都比較高同容易有汗臭味, 我已經每次都噴止汗噴霧同除體臭噴霧GA LA…點解仲要嫌我臭喎! 公平咩?
每次受到當我覺得比人鄙視嘅時候我都好想喊, 好想逃離呢個鬼地方,
於是我就開始自我封閉, 唔願意去同其他人交流。
亦因為咁, 我一直都成為被同學欺凌取笑嘅對象, 久而久之就形成左一個比較自卑同內向嘅性格。
「圓咕碌」係我岩岩想轉身調頭走嘅時候, 特然聽到有人嗌住我
「呢邊呀! 圓咕碌!!」
原來係呀傑係度嗌住我
「呀傑你點解會係度嘅? 你唔係打籃球嘅咩?」
「你唔知架喇, 呢度咁多人梗係有某D原因嘅」呀傑懶神秘咁講
仆街, 唔通佢地都係為左食女…呀唔係, 係識女先入黎打羽毛球?
我詐傻問呀傑「咩原因呀? 打羽毛球之嘛」
「你唔係唔知嘛? 你入左會未架?」
我仲完全唔知點解呀傑會咁驚訝嘅時候…佢已經繼續講
「你填完張入會申請表交去比負責人你就明架喇!」
「但係我都唔知負責人係邊…」
「佢地E家係活動室入面呀, 你快D填完交入去啦」
呀傑指一指體育館嘅角落其實個張所謂嘅入會申請表都係係咁易填個名,學生證號碼,EMAIL 同電話號碼, 於是我秒速填完就交去活動室。
「你好呀, 我係黎交入會申請表架」
「好, 填好之後放底就得架喇~記得填埋緊急聯絡人嘅電話喎!」
點解…點解…負責人係君君??
「咦!? 你咪係今朝坐我隔離位個個?」
「吓?」我估唔到君君會記得我
「今朝上數學堂個時我坐你隔離架!」
「哦…」
「好多謝你參加我地個學會呀! 我都係今年先接手做會長, 冇諗過會咁忙GA! 如果有多D人幫手就好喇! 呢度每15分鐘就會轉一次場, 4上4落, 如果你要球拍可以問我地借架! 去玩得開心D 啦!」
我估唔到君君會記得我呢D咁唔起眼嘅人...交完張FORM我返返去呀傑隔離, 呀傑對住我奸笑
「交完張入伍申請表啦?」
「入咩伍呀…我係想做下運動減下肥JA!」
「咪扮啦~ 大大方方認左去啦~呢度十條仔著左十一個都係為左君君先入會」
「你都想溝君君?」
「都話左你架啦~ 仲唔認係想溝君君?」
「都話唔係咯!」
「唔認算! 打波」 呀傑用好不屑嘅語氣講
我真好想同呀傑講 :「我連第時君君會同邊個結婚都知道呀!」
而且我真想溝嘅唔係君君…我比較想溝嘅係...君君個妹 –珊珊
雖然珊珊同君君係孖女, 但係佢地兩個嘅性格就完全唔同,
君君係一個性格比較外向而且聰明, 全身散發住一種女神氣質,
而珊珊就比較內向, 仲有D天然呆, 成日都傻下傻下, 總之就係人見到佢都會想保護佢個種啦!
完左學會活動之後, 我同呀傑一齊離開學校。
呀傑同我住得好近, 於是我地就一齊行路返去, 係途中我地會經過一間麥當當, 呀傑提議入去飲杯野, 搵左位坐低之後我問呀傑
「其實你打籃球咁勁, 點解你唔去參加籃球隊嘅?」
呀傑好大啖咁啜左啖可樂, 然後有小小唔開心咁講
「我以前係籃球隊架…不過升左高中之後, 因為體格差異, 根本打唔過班黑白鬼, 就算比你入到隊, 都只係係場邊打氣…咁打校隊黎有乜意思?」
「你真係甘心放棄?」
「唔甘心又可以點?有D野唔係你話唔甘心就可以改變。」
呢句野真係好中...好到位…的確好多野都唔係唔甘心, 努力就可以改變,
但係唔試過又點知WO…係激戰入面, 張家輝講過一句好經典嘅對白, 我於是同呀傑講
「你唔試過又點知喎! 怯, 就輸一世架喇!」
同時都係提醒我自己講, 今次, 我一定要同珊珊講出我心入面想同你講嘅說話!聽完呢句,
呀傑窒左窒, 佢好似唔多想繼續講呢個話題
「咪咁認真啦! 你覺得君君點呀?」
呀傑你個衰仔真係對君君有意思…但係我又唔可以將個殘忍嘅真相話比佢知…我只可以好 “旱”咁答佢
「君君…幾靚女丫」
「係呢!! 我覺得佢好似蔣雅文架!」
「你都成個李逸朗咁丫!」
「你都覺呢!」 呀傑好唔知醜咁認
「你諗下好啦! 你想溝君君, 你問過…」講到呢度我心知不妙, 差D就爆響口…
「問過咩呀? 佢有仔咩?」呀傑咬住我唔放
「問過我未LO!」 我急急腳補返句黎掩飾
呀傑"嗤"一聲笑左出黎大笑左出黎
「咁呀圓咕碌先生, 你比唔比我溝呀君君呢?」
「唔比!」 仆街…係呢個時候冇得縮TIM..
「都話左你入會係想溝君君架LA! 講明先呀, FRIEND 底都冇情講架! 都差唔多啦, 聽日返學校再傾啦!」
於是我地就離開麥當當各自返屋企, 可惜佢唔知道嘅係…蔣雅文最尾嫁嘅唔係李逸朗……