《我係窮郵差，專門幫陰陽相隔嘅親人送信》（書局上架中）: 5

每到夜晚八點，每個人都返晒屋企嘅時候，我仍然一個人喺郵局，正式我嘅送信工作。
 
 
陰間、黃泉、地府，無數嘅名字，一個人死後去嘅地方。
 
 
一個車水馬流、古色古香嘅地方。
 
 
哩個地方嘅時間，好似永遠都停喺某一個點，永不前進。


 
 
只係喺哩度生活，並唔係想像中咁憩靜寫意。
 
 
到陰間送信，只有兩條守則。
 
一， 永遠唔好入人哋屋企。
二， 信只能送一次。




否則後果嚴重。


我望一望我綠色嘅制服，已經染成橘黃色。


半個天空，都畀巨大嘅夕陽佔據，好不耀眼。




我帶住孟生生封信，仲有信嘅附件，穿梭喺哩個繁盛嘅古舊城市，向孟太太嘅住所去。


哩個城市，有一條長河貫穿喺成個城市中心，四周嘅房屋都係依河而建，密集而不見盡頭。長河，因黃色嘅河水而因以名之名為黃泉。


好快咁，我已經按照地址，嚟到孟媽住處嘅門口，佢就住係遠離河邊嘅一間小木屋，木屋隔離有塊好大嘅梯田。


㪣一敵門，孟媽應聲而來。


「請問你係？」




孟媽係一個頭髮花白、皺紋滿臉、身材矮小嘅女人。佢見到我個樣係好驚訝，一嚟驚訝有人搵佢，二嚟見到陽間嘅人。


「孟媽你好，我係人間政府派嚟嘅郵差，受親人委託，今次嚟係送一封信畀妳。」


「信？邊個⋯⋯送信畀我？」孟媽問。


「係妳個仔，孟生。」


「阿宗？」




我將信小心翼翼咁交畀佢。


孟媽接過之後，有啲遲疑咁拆開封信。
 
 
「媽，
 
 
有一個自稱係信差嘅人，話可以幫我送信去陰間。我唔知哩封信係咪真係可以去到你手上，但如果真係可以嘅話，希望你可以原諒我，睇一睇呢封信。
 
 
媽，我已經無再做嗰份工啦。我同Mandy分開咗之後，由地盤工人做起，升職好快，而家都叫生活得唔錯。
 
 


對唔住，一直要你為我擔心。對唔住，一直怪你令我讀唔好書。
 
 
對唔住，當你有老人痴呆症嘅日子，都係得你自己一個人。
 
 
媽，當你唔喺度之後，我先發現原來有一個人煲湯畀你，係幾咁幸福嘅一件事。
 
 
亦都係當你唔喺度之後，我先發現原來自己今世都無好好孝順過你，以為畀下家用就叫孝順。
 
 
太多太多對唔住，如果你都可以試下我煲畀你嘅湯就好⋯⋯
 
 


我只係想講，我好有幸今生做你嘅仔，多謝你。
 
 
兒子
孟宗上」
 
「孟生話喺人間見返妳。」
 
 
「吓？」
 
 
「我諗佢係因為太過掛住妳，所以腦海先咁樣嘅幻覺。」
 
 
「哩個傻仔⋯⋯」
 
 
「信嘅附件就係一碗湯。」我拎起手上嘅袋，入面係一個保溫壺。
 
 
孟太苦笑一下話：「陰間嘅人，點會食到陽間嘅野。」
 
 
「我明白。」我交碗湯畀佢講：「不過職責上，我都係要畀妳。」
 
 
孟太望住一碗佢飲唔到嘅湯喊，但佢嘅淚，係笑住而流。
 
 
每當我由陰間返去人間時，都總會夢到以前嘅人。
 
 
回憶，總係唔走。
 
「生仔，你有無拖住你個妹㗎？」媽媽個樣後生咗好多，佢帶緊細個嘅我哋去街市買餸。
 
 
我嘅小學同妹妹嘅幼稚園好近，只係隔一個公園咁遠。
 
 
媽媽放工之後，就會過嚟接妹妹，然後再接我放學，然後帶住我哋兩個去附近嘅紅蘋果街市買餸。
 
 
我同阿妹，就會坐係街市嘅熟食檔，睇住數碼暴龍01，飲住一枝當時對我哋嚟講好大嘅玻璃樽可樂。
 
 
「拿，大佬記住拖實阿妹呀。」阿媽總會咁樣吩咐我，因為阿妹成日都好鍾意亂走，唯有叫我拖住佢，廢事佢唔見。
 
 
我總係會覺得好煩，因為拖住佢，我會成日都睇漏一啲數碼暴龍嘅畫面。
 
 
特別係亞古獸進化呀！佢進化我就覺得滾動到不行。
 
 
「亞古獸進化⋯⋯」當進化嘅音樂響起時，阿妹無神神扯住我嘅衫袖。
 
 
「大佬⋯⋯」
 
 
「咩呀？」
 
 
「好飲。」佢指住可樂話。
 
 
「⋯⋯咁妳繼續飲啦，唔好阻住我睇電視。」
 
 
隔咗唔夠兩秒，細妹又再拉拉我衫袖。
 
 
「大佬⋯⋯」
 
 
我睥住細妹問：「又做咩呀？」
 
 
「有水呀⋯⋯」佢望住可樂樽同自己隻手話：「點解有水走出嚟嘅？」
 
 
「因為神說有水咪有水囉。妳唔好再問嘢、再講嘢啦，好無？」
 
 
跟住落嚟嗰一分鐘，佢都好安靜，真係好聽話完全唔講嘢。直至數碼暴龍嘅片尾曲響起，我轉頭一睇，先發現⋯⋯
 
 
咦⋯⋯人呢！？
 
 
「我唔係叫你拖實佢㗎咩？」媽咪好激氣、嬲到塊面都紅晒，但更多嘅係擔憂細妹。
 
 
我哋急急腳咁喺街上四周圍大叫細妹嘅名，到處尋覓，當我望到媽咪想喊嘅樣，我嘅內心都好自責。
 
 
「細妹，你係邊呀？」
 
 
「唔該，你有無見過一個五歲嘅小妹妺？」
 
 
尋尋覓，我哋搵咗好耐，媽咪急到想報警之時，我就指住遠處：「細妹呀！」
 
 
我哋終於喺天橋底搵返佢。
 
 
「妹！！！妳做咩自己一個亂咁走呀？」媽咪攬住細妹話。
 
 
細妺話：「有人跌咗玩具⋯⋯」佢攤開手，係一隻亞古獸嘅玩具，佢遞畀我話：「數碼暴龍⋯⋯哥哥鍾意。」
 
 
每次由陰間返嚟，每次嘅畫面都更深刻。
 
 
媽⋯⋯細妹，你哋究竟去咗邊？
 
 
孟媽喺我臨走前，交咗一封信畀我。
 
 
我之後將哩封信轉交返畀孟生。
 
 
信上面寫咩，我真係唔知道。
 
 
喺某一日嘅早晨，我又咁啱搭嗰一條線嘅小巴。
 
 
「司機⋯⋯一個人。」
 
 
孟生精神奕奕咁上車，我哋對視之後，相互而笑。
 
 
「你好似好精神咁。」
 
 
「嗯⋯⋯近排終於都瞓得好。」
 
 
「今次入一個人嘅錢嘅？」
 
 
「自從嗰次後，我已經見唔到佢。」
 
 
孟生同我講，取而代之嘅係天空上面，多咗一粒星星，跟隨住佢，閃耀地發亮。
 
 
我覺得，哩個都係佢嘅幻覺。
 
 
我覺得。