「我到而家都未搵返我失蹤嘅媽媽同細妹。」
 
 
王胤瀅望住我,好奇咁問:「佢哋去咗邊度呀?」
 
 
「我都唔知,只係某一日返到去屋企嘅時候,就已經唔見咗佢哋,消失得無影無蹤,無聲無息。」
 
 


「你無報警咩?」
 
 
「報咗啦,但警察都完全搵唔到佢哋嘅下落。」
 
 
「咁佢哋臨消失前,有無話最後係做緊咩嘢。」
 
 
「阿妹話,會買一個生日蛋糕畀我。」


 
 
王胤瀅靜咗一陣,望住海然後話:「咁你以後過生日咪會諗起佢哋囉?」
 
 
我好似好耐都無慶祝過生日。
 
 
「同親人分開真係好慘⋯⋯」佢又講。
 


 
佢無啦啦數一數手指,但佢好似醉到睇唔清手指咁。
 
 
過咗一陣,王胤瀅話:「你有無方法可以帶我落去搵媽媽?」
 
 
「即使有,我都唔會帶人落去。」
 
 
「點解呀!?」
 
 
「其實去陰間係一件好危險嘅事,唔係妳諗到去旅行咁。」
 


 
「即使危險我都唔驚。」
 
 
「妳哩個狀態,我實在唔敢諗落到去會點,再講⋯⋯妳哋啱啱先見完面,諗唔到有咩需要再見。」