我要證明給Cynthia,我也是一個極有上進心的人﹗所以替她辦的事,必定要做到一百分……不﹗是一百一十分﹗
 
因此,明明這回事所花的時間可以用「分鐘」來計算,也硬要轉成以「小時」作為計算單位。
 
「咦?你啱啱唔係攤咗上床咩?做咩又對住部電腦?你就剩係識得日日對住部電腦打機,得返兩年就考試啦,生性啲,唔好成日都要我提你啦。」
 
相信這席話,作為子女的你們實會聽過不知上百遍。就連我,也不例外。
 
「我辦緊人生大事,係生係死就睇呢次架啦﹗」真是的,自己的功課又不見我是如此用功。
 


「又係咁,你睇吓你,咩事都留到最後先嚟做。你咁樣,第時邊到會有出色啦……」隨著房門的關閉,囉嗦聲慢慢減退。
 
係我閂門既,因為真係頂唔緊啦。
 
過了應該是一小時吧,總算是完成得七七八八了。呆看著這份報告,相信拿到大學可以直接換取到一個沒有博士也離碩士不遠的學位。
 
「麥俊傑,有時你都真係幾撚勁。」這句話,是真實出自當時的我。
 
「接招啦﹗」我懷著半點依依不捨的情緒把那嘔心瀝血的曠世鉅著發送出去。
 


「嘩,叫你寫幾句解釋你寫成篇文做咩?」她驚訝得要利用語音表示出她的意想不到。
 
「知你多野做呀嘛,想話等你唔洗做咁多。我可以幫你做埋份Powerpoint出嚟架﹗」我忍不住瘋狂重複播放著她的聲線,很可愛亦又不做作。
 
「唔洗啦,我都話唔想假手於人﹗你早啲訓啦﹗」這段錄音,溫柔得來又帶點感激之情,與上段話音有著微妙的關係。
 
「你夠未訓啦﹗今日就等我陪你做完野先訓啦﹗」
 
踢波角度嚟講,呢一句完全係大腳傳中,諗都唔諗就一野射過波俾佢。但係從現實世界嚟講,呢句野理應出自痴漢口中。
 


「我都慣咗啦。」
 
「慣咗唔等於係啱,我要迫使到你早啲訓覺﹗」其實我……恨不得一下子跳上床,等到太陽曬至腳踝才起來。
 
「好啦好啦,我訓啦。」Cynthia不禁舉手投降,我也暗暗叫好。
 
終於有得訓啦……
 
「咁……早抖啦﹗」嗯,讓我發個打鼻鼾的表情符號吧﹗
 
仆街。
 
我㩒咗打車輪再加個心心嗰個表情符號﹗打鼻鼾變咗做打車輪,點撚樣算好﹗
 
「對唔住,我㩒錯咗……」我還未有把話發出去時,Cynthia已早一步回覆了我。


 
是和我剛剛打的話,一模一樣。
 
就連嗰個表情符號,都係一樣。
 
呀媽,我得咗啦﹗
----------------------------------
「唔撚係呀嘛,佢真係咁樣覆返你?」肥正果然還是不太相信我的事跡,只好把對話記錄活生生的呈現在他眼前才肯閉嘴。
 
「冇理由既……佢有乜理由睇得上你呀……」他把圖片放大,好讓能查看我有否造假。
 
「有啲野,你唔恨得咁多架啦。」昨晚為她所趕的事,果真沒有白廢心機﹗
 
「你估條女係咪俾仔飛完之後,周圍搵水泡收兵?」加拿大仔又站在他專屬的角落,用著他的吉他演奏著一曲。
 
「條女很清楚收兵好過嫁人,真的身分不過女神,只要女神未夠開心,便集齊萬馬千軍……」