萬事居備,只欠東風。
 
所謂東風,就是cynthia。
 
我躲藏在五樓走廊的一端,等待著女主角的出現。
 
你問我點解唔光明正大咁出現?
 
因為我怕cynthia會因此而感到煩擾。
 


「好攰呀,我今日完咗之後唔同你地去自修室啦,我想返去訓陣。」cythnia的聲音從走廊另一向傳出,而她的身影也出現在我眼前。
 
「喂,我同mary去個廁所洗個臉先呀。」這不就是天助我也嗎?就連阻事的旁人都消失,恐怕上天也因我的堅毅不屈的精神所動容。
 
咦,點解……佢行得愈嚟愈快既?
 
「cynthia﹗」我大聲叫道,誰不知她的步伐竟然加快﹗
 
難不成……她看見了我,然而加快腳步?
 


她想避開我。
 
「送俾你架……」我三步併著兩步,總算是追到了她。
 
「……」cynthia未有正視過我,目光盯著我親手造的環保袋。
 
「呢個袋,我……」話都還未說罷,cynthia竟隨手接過環保袋,轉過頭便衝進班房。
 
「咁我地不過考完個mock之後去食啲野先啦﹗」cynthia的朋友此時剛好踏出洗手間,並於我身旁走過。
 


所以……她是接下了我送的禮物嗎?
 
我有算成功了吧?
 
老天還真的待我不薄,再給我一次機會﹗
 
「所以你約我出嚟食飯,就係為咗講呢啲野?」這種值得高興的事,總不能只有我一人獨享。
 
而我第一個想到的人,就是肥正。
 
「唔係我唔想死咗條心呀,係佢條心根本仲響我到,死唔去﹗」我很久未有像這樣的開懷大笑。
 
「唉……我都唔知應該開心定唔開心好……」
 
此時,肥正的電話突然響起,見他的臉色一變便知道來電者應是一位肥正未有預料到的人。


 
「喂。」肥正的發音都變得慎重起來﹕「有啲咁既事?明白明白……」
 
「係呀,佢響我隔離,你想我直接咁同佢講?」
 
肥正與電話另一邊的人所討論的話題,正是我。
 
「我都唔知點開口喎……嗯,我諗諗佢啦。」說罷,他就掛了電話,凝視著我但未有答話。
 
「做咩呀?」
 
「其實……舊既唔去,新既又點會嚟呀?啫係你響個花園入面行,唔可以因為見到一朵好靚既花就停咗響到架,話唔定之後既花仲靚呢!」
 
我最討厭,就是轉彎抹角的說話技倆。
 


「啫係呢……啱啱kitty打俾我,就話cynthia同佢講,叫你以後都唔好再煩住佢……」肥正聲線變得愈來愈小,但主要意思我總算是有聽到。
 
Cynthia斬釘截鐵地表明,拒絕我。
 
「都係時候move on架啦。」
 
「點解?」我低著頭,手中的筷子激動得握斷為二。
 
「又話可以做返朋友既?點解最後都係咁?點解佢連我最後一個機會都抹殺?點解呀?」
 
「我諗……佢話咩再見亦是朋友都只不過係客套話,同埋……我估佢都係唔想你誤會先咁講。」肥正趕緊安慰道。
 
「誤會?佢一直以嚟所做既野都係俾緊一個又一個既假希望我,咁嗰啲又係咪誤會?點解我連我做錯啲咩都唔知就判我死刑?」
 
當下的心情,不光是傷心,更是怒氣沖沖。


 
「兄弟,係時候放低架啦。」
 
「你收聲﹗」
 
基本上,當一個人失去了常性之時,任你說的話再有理據,也不會聽得進耳。
 
肥正深明這道理,因此未有說什麼,反而給予了我一個私人空間,好讓沒有人打擾著我平復心情。
 
他離開了。
 
不說一聲的離開,就連簡單的「再見」也沒說。