楊門女將口中既美麗華酒店, 其實一早就改左名做「The Mira」, 由四叔個仔揸旗。 

富二代掌權事必然好大喜功, 要威又要型。 所以酒店無論係外牆以至到內籠都進行過一輪大翻新。短短一年,就由一間專做內地旅遊團既老土酒店, 搖身一變,成為一間專走型格路線既Business Hotel。 

「嘩, 呢度型左好多喎, 怪唔之得我地會提議來呢度開房啦。」發仔行入大堂之後讚嘆道。 

Cyber既燈光, 新潮既傢俱裝修, 甚至地板既大理石都「令」到可以反射女士既裙底。 

「車, 點變咪又係做番大陸人生意。」泥頭道。 





「依家出來遊埠呀? 嗱嗱聲搵個職員問下啦。」紅棍催促道。 

我環顧四周, 發現好多客人都用啲怪異既眼光昅實我地。 

咁又唔怪得佢地既, 五條友入面, 一個光頭, 一個無眉, 仲有一個紅毛。 如果大舊哂埋隻貓出來既話, 佢地有人報警一啲都唔出奇。 

「照我話, 去問下Reception最實際。」發仔道。 

無人有異議, 始終發仔係大學主修既係酒店管理,佢應該最熟門路。 





招呼我地既係一個留齊蔭既直髮女仔, 一睇個樣就知道係Fresh grad。 

「歡迎光臨The Mira, 請問有咩可以幫到你地?」直髮女既眼神流露出一絲猶豫, 可能係俾我地出位既造型嚇親。

「睇我表演啦。」發生胸有成竹咁行近counter。 

「小姐, 我想同你打聽一個人。」發仔chok左把賴有磁性既聲, 然後擺出佢平時自以為溝死女既無敵笑容。 

佢唔笑由至何, 一笑條女即刻彈開左兩步。





「請問…先生你想問咩呢?」 


「無, 我想問下相入面呢個人住緊邊間房者。」發仔keep住笑, 好明顯係唔記得左自己棚牙既慘況。 

直髮女忍唔住皺眉道:「唔好意思, 酒店係..」 

「唔可以透露客人既資料呀嘛, 我知吖。」發仔係佢未講完就插嘴道:「靚女, 睇你都係讀Hotel man出身家啦, 我算得上係妳師兄來家, 見在同門份上,不如我地暫時放低返工既面具, 開心見誠咁傾下計吖。」 

「真係好對唔住, 呢啲係客人既私隱…」直髮女左顧右盼, 有啲不知所措。 

「No No No~ 都話唔好咁拘謹咯, Relax~ 我地只不過係來搵朋友者, 唔係咩大件事, 妳講出來, 我一定會記得妳既好處家。係呢, 有無人同妳講過, 妳好似楊丞琳呀。」發仔繼續展開攻勢。 

「開心見誠呀…」直髮女細細聲咁講。 

「無錯啦, 琳琳乖,講俾哥哥聽。」 





「咁你行埋啲先啦...」直髮女怕醜道。 

當發仔將隻耳湊埋去啲既時侯, 直髮女變臉道:「乖你老母咩,我係驚經理聽到先同你玩咁耐喳。 你唔係幫襯既就咪撚係度扮型, 快啲同我死開啦, 崩牙佬!」 

我地幾個企係隔離, 忍唔住爆笑左出來。 

雖然問唔到咩情報,但淨係睇發仔食左舊屎味檸檬既柒樣都值回票價。 

此時, 我地身後有一把聲音響起:「喂喂喂, 你地班死仔仲係度既? 係咪特登等埋我食早餐,想聽賽後報告先?」 

我地轉過身, 異口同聲道:「彈彈波?!」