夾錢中左六合彩頭獎, 但keep飛果個唔見左...: (24)

「呵呵，有朋自遠方來，不亦樂乎。」呀伯捋鬚微笑道。 

「紅棍你講得岩, 呢位呀伯咁惡啃既野都可以飲到笑淫淫，真不愧為鳩人。」發仔肆無忌憚道。 

「小兒無知，無怪無怪。」呀伯慈祥笑道。 

「敢問老翁，此酒是何來頭？」紅棍突然講起文言文。 

「不識盧山真面目，只緣身在此山中。」呀伯徐徐低吟道。 





「伊伊哦哦，都唔知up乜春。」發仔不耐煩道。 

紅棍舉起手制止發仔，道：「還請老翁指點迷津。」 

呀伯企左起身，緩搖電風扇道：「凡飲盧山真泉，必現真我性情，率性而為，唯酒力一過，即忘憂棄思，宛如南柯一夢。」 

「言下之意，即是點撚樣？」發仔有樣學樣道。 

「屌你唔撚識就唔好講啦。」紅棍串左發仔一下，解釋道：「呀伯係話, 一飲左呢枝酒就會露出自已既真面目，但到第二朝醒返就會咩都唔記得哂呀。」 





發仔唔服氣道：「我咩唔識啊，常言道，講野文皺皺，一世聞賓周...」 

我無佢地咁好氣，於是便打算拉Phoenix埋一邊傾下密計。 

但當我轉過身既時候，就聽到呀伯指住我個頭驚呼：「此子厄星蓋頂，實乃大凶之兆!」 

「大胸? 邊個大胸? 」發仔有意無意望左Phoenix兩眼。 

我睥左睥發仔，問呀伯道：「大師何出此言？」 





呀伯端詳左我個後尾枕一陣，然後道：「小兄弟最近是否諸事不順，惡運連連？」 

我猛點頭到：「係呀，你點知家？」 

呀伯嘆左口氣，道：「一切緣起於小兄弟紋於後腦之古怪洋文。」

我立即恭敬道：「求大師指點。」 

呀伯道：「盤纏一來，金口自開。」 

屌，唔使紅棍解釋我都知呀伯要錢先肯講，於是問：「咁你要幾多啊？」 

呀伯道：「本道有一破咒之法，唯獨價格不菲。」 

我心急道：「開個價來聽下。」 





呀伯屈指一算道：「兩萬現金，足見誠心。」 

我衝口而出道：「兩皮野咁貴？！我依家無咁多現金係身喎...」 

呀伯微笑道：「銀聯銀通，無師自通。」 

我心中盤算道：「如果真係俾佢作一作法就可以消災解難兼且搵番孱仔既話，呢兩萬蚊絕對值得投資。」於是就問紅棍：「喂，借住張黑金卡來先，遲啲還番俾你。」 

發仔驚訝道：「唔係掛，條友鳩up兩句你真係信？！」 

原本以為紅棍都係咁諗，無料到佢竟然話：「好啊，呢位老人家應該真係有啲料到既。」 

果然英雄所見略同！ 





如是者，呀伯攞左張卡，「咔嚓」一聲過左機之後，就行左入內室準備。 

無幾耐，佢捧住左一盆紅水同一枝毛筆出來。 

「此乃硃砂聖筆，能諸百邪。」呀伯莊嚴道。 

「明明上面個牌字名係寫住小蒙恬....」紅棍再次封住發仔個口。 

「跪下！」呀伯對住我喝道。 

我依言雙膝落地咁跪低左。 

呀伯半閉住隻眼，一邊低吟經文，一邊係我身邊遊走。 

突然，我感到後腦一涼。原來呀伯係我個頭度劃左兩筆。 





「禮成。」呀伯合什道。 

「下，咁簡單家喳？！」我覺得有啲兒戲。 

回頭一望發仔同紅棍，只見佢兩個好辛苦咁係度忍笑。 

「做咩啊？」我不禁問道。 

「你自己照下塊鏡先啦。」發仔好辛苦咁講。 

我望向近門口既一塊直身鏡。 

我屌！ 





原來呀伯只係用紅筆將U同埋C既斷口位連埋，令我後腦既FUCK字變左做個FOOK字! 

「佢無昆你吖，你依家真係變左褔頭呀！」發仔大笑道。