夾錢中左六合彩頭獎, 但keep飛果個唔見左...: (30)

吽! 

一駛入酒店範圍, 隻牛既叫隻就吸引左唔少人豔羨既目光。 

係佢地心目中, 呢種車入面, 坐既唔係啲好有錢既肥佬, 就一定係啲好撚索既名模。 

但當個車門好似鳥翼咁向上伸展之後, 我彷彿聽見眼鏡碎滿一地既聲音。 

「屌, 我旭唔撚到呀!」發仔不斷掙扎。 





負責幫我地泊車既職員, 眼見一團人肉逼左埋一齊, 當堂嚇到目定口呆。 

發仔對住個泊車仔吼道:「戇鳩鳩企係度做咩呀, 快啲幫手拉我地出來啦!」 

我索性打開埋個篷方便佢地落車。 

「嘩, 坐呢程車真係辛苦過做地盤。」紅棍拉拉筋道。 

「咪係, 我瘦左幾磅添呀。」泥頭道。 





「細聲啲啦, 我地個樣己經夠哂騎呢, 盡量唔好再引人注意。」大舊道。 

發仔行過去搭住泊車仔既膊頭道:「是但將架車開走得喇, 最好有咁遠開咁遠。」 

泊車仔躬身問:「唔好意思, 我好似睇唔到入面有車匙…」 

發仔隨口答:「你呢啲大鄉里真係唔識野, 依家部部車都係聲控家啦, 等陣你想熄車既話, 大聲講句粗口就得家啦。」 

泊車仔半信半疑道:「真係咁神奇?」 





「我個樣似唔似會呃鳩你吖?!」發仔E起棚黑白分明既牙道。 

「唔..唔會, 之但係好似仲爭少少野…」泊車仔卒一卒手指道。 

「要貼士喳嘛, 最多我俾撚哂成架車你咯!」發仔真心道。 

泊車仔碎碎念道:「有錢無品, 祝你含撚。」 

發仔道:「好彩你講得細聲喳, 再大聲啲架車會熄家。」 

泊車仔即時慌失失咁黯住個口, 就揸走左架車。

「好, 大家依家聽我講…」 

點知我一回頭, 就見到泥頭係酒店大門前面撩緊女仔。 





「係呀, 架車係我用啲散紙買既, 你鐘意既話送俾你吖。」 

「仲溝女?! 依家做正經野要緊呀。」我衝左過去屌鳩佢。 

「咩者, 我見人地企係門口咁悶, 咪同人傾下計咯。」泥頭轉個頭又同個女仔講:「係呢, 點解間酒店入面黑媽媽, 四周圍又掛哂蝙蝠仔咁得意既?」 

個女仔羞怯怯答道:「今晚係Batman之夜, 我地酒店無論係燈光擺設, 以至到員工既服裝, 都會以蝙蝠俠做主題家。」 

「怪唔知得妳著得咁性感啦。」泥頭色迷迷道。 

我抬頭一望, 整間酒店既外牆被一層黑紗布所覆蓋, 紅色既金沙招牌之下甚至有一個Batman既射燈Logo。 

「你件衫咁鬆, 入面有無打底家?」泥頭仍然纏住人唔放。 





換轉平時, 條女見泥頭咁既死樣, 好可能一巴就車落去。 

但林寶堅尼既威力真係非同少可, 就算泥頭只係架車度爬出來, 條女都好似對佢另眼相看咁, 到依家都仲頂得佢順。 

「哎呀, 我唔講住啦, 啲老細行緊埋來呀。」個女仔轉過身眼望前方。 

我地順住佢既目光, 見到一大班打扮成羅賓, 小丑等角色既員工, 大搖大擺咁走向賭場。 

「佢地好多都係賭場啲高層來家。」條女細細聲咁同我地講。 

「嘩! 不得了呀! 你地睇下行隊尾果個猫女郎。」發仔興奮道。 

我地一望, 幾乎忘記左呼吸。

烏黑亮麗既秀髮, 完美無暇的肌膚。 





雖然係蒙住面, 但猫女郎從羽毛眼罩所透射出來既眼神仍然銷魂之極。 

一身黑色的緊身衣令佢原本浮凸有致既身材更添一種魔鬼般既夢幻。 

而佢豐富結實既美臀則伴隨住性感撩人既步伐不斷左右擺動… 

縱使腦入面有如此豐富既形容, 但此時我講得出口既只有… 

「正撚到呢…」 

「大舊, 你又銀親我啦! 控制下啦!」紅棍道。 

「Bo Po Mo Fo 唔好講咁多, 我地快啲跟住條女後面啦!」發仔一個箭步就想向前標出。 





大舊一手捉住佢既後領, 道:「唔好專做埋哂啲無聊戇鳩野啦。」 

「仆街! 阻住人溝女會俾人切Jer Jer家!」發仔不忿道。 

只見果班人原本己經行左入賭場, 但經我地一鬧, 猫女郎竟然自己一個行番出來睇下發生咩事。 

「一定係我真誠感動左佢喇。」發仔眼放異彩道。 

出乎意料之外, 當猫女郎見到我地果陣, 竟然大聲道:「呀恆!」然後仲要張開雙臂衝左埋來。 

「我唔係發夢呀嘛?!」 

正當我合埋對眼, 準備迎接猫女郎溫軟既擁抱時, 我突然俾人一野推左落地。 

「屌, 無理由次次都係你家嘛。」發仔抱住猫女郎道。