【短故寫自己野】因為果個女仔，我開始寫故: 6.對話

「可唔可以幫我拎...果本書呀？」

思晴指住櫃邊既一本書


「呢本？」

「嗯」






我拎出呢一本叫「多情浪子痴情俠2」既書，交到思晴既手上



「唔該...咦原來你都有睇書架？」思晴問


我難為情地回答

「呃..少少啦..今日要交閱讀報告呀」






「哦....咁你搵到書未呀？」


「未呀，想借既Q版特工無哂..」我繼續搜索適合既書


「咁不如借呢本丫..」





思晴拎起面前既書:「倪匡既藍血人，幾好睇架」


「倪匡....即係衛斯理？」


思晴點一點頭:「嗯，我好鐘意睇呢種既小說架，有啲科幻又有啲冒險咁」



「哦...咁唔該哂啦」



借完書之後，我地兩個一齊返上五樓





「丫..上次省到你既事..唔好意思呀」


「唔緊要，我冇放響心度呀」

思晴再講:「不過我今朝聽人講，你地足球隊好似..出左局喎..」



「嗯...16強輸左啦」

我仰天嘆氣:「所以依家一個星期先練一次波，悶死啦」






「你無..其他興趣既咩？」


「有既..打機、睇漫畫、彈下結他咁啦..」


「你都幾多興趣架喎，咁唔駛驚悶啦」

「哈哈..都係既...」

思晴比我想象中健談


「係呢？你叫咩名呀？我叫林思晴呀」





「我叫郭煒靖」


「哈哈，郭靖！」

思晴聽到就笑:「咁..遲下有機會再傾下啦，拜拜...」


屌，郭靖有咩好笑呀？我都想有個黃蓉呀


我用lunch time之後reading section既15分鐘，粗略地睇哂本藍血人

再響化學堂寫好哂500字既閱讀報告，400字鳩吹加100字對倪匡先生既崇拜






「周sir，做好啦」


「睇過..」

周sir睇一睇我份閱讀報告

「..今次算你啦，下次唔好再咁遲交啦！」


響林思晴既幫助下，成功靠住藍血人交到功課

不過估唔到，林思晴呢個女仔都幾健談