Ellen:「唔係吖,我想選學生會咋嘛。」
 
大佬呀你唔好咁痴線啦好嗎..你到底知唔知咩係低調架…
 
我:「你對學生會到底有幾大既執著啊…」
 
Ellen:「咁上次輸左比阿明你我唔甘心吖嘛,同埋做學生會會長一直都係我心願黎~」
 
「之前就話阿偉霸住我無得做,而家有機會我梗係要搏多次啦!」
 




我:「你係咁想做會長你上年就同我講啦,我比你做咪得囉。」
 
Ellen:「咁又唔得喎,因為我都想做阿明你背後既女人~」
 
頂,佢突然間咁講,搞到我有小小感動添。
 
算啦唔好阻佢啦都係,反正選學生會都唔係咩壞事黎既,話過要好好享受架嘛。
 
我:「好啦好啦你即管去選啦,最多我同Sarah佢地到時投你一票啦。」
 




Ellen:「哇你就想呀淨係投票,我要你地做我助選團架!」
 
仆街…玩到咁大?
 
Ellen:「支持下我啦好唔好…?」
 
唉我最頂唔順女人擺款喊樣出黎架啦…明明你平時都唔係呢type人黎…
 
我:「得啦得啦你話點就點啦,時間唔早啦返去上堂啦。」
 




Ellen:「好啦咁我地一陣再見啦,Bye Bye~」
 
時間的確已經唔早,其實已經8:05分,只係可能因為仲係開學頭幾日,無老師催我地快d返課室。
 
於是我係送走左Ellen之後決定慢慢行,順手當觀下光咁。
 
呢間學校的確無聖所羅王咁大,好快就行哂。
 
我留意到每個班房入面既人都好開心,同早幾年既我完全唔同。
 
係呢度有特殊氣氛吖定係聖所羅王太特殊呢?屌傻既都知答案啦。
 
算啦返班房啦,好似行得太耐,不過Miss Leung咁好人,應該唔會鬧我既。
 
咦有人係天台個層行緊落黎既..?仲著住校服既…即係學生黎?




 
哇原來係lulu黎!?尋日開學都無見過佢,等我而家去同佢打聲招呼,俾佢知道我都黎左呢度先。
 
咦?邊個搭我膊頭?唔通係訓導主任?
 
晨:「唔好去搵佢啦,俾佢一個人靜靜地過埋呢個Form 6啦。」
 
嚇得我,原來係晨哥。

唔知係咪已經習慣左,晨哥既神出鬼沒已經嚇我唔到。
 
嚇到我既反而係佢講既野。
 
我:「你指既係…」
 




晨:「唔好比佢有機會勾起回憶啦,佢而家都只不過勉勉強強返到學架咋。」
 
我:「唔係…我意思係lulu佢發生左咩事?」
 
晨:「啊係喎你唔知道架喎…Cherry你知道邊個黎架可,魯路修女朋友。」
 
我:「知,好靚個個嘛,之前都有見過兩三次。」
 
晨:「佢去左外國讀書了。」
 
我:「即係佢dup低左魯路修一個人…?」
 
晨:「都可以咁講既,所以唔好俾佢再諗起上年既事啦,佢而家好脆弱。」
 
我:「明白明白…」




 
如果我有朝一日失去左佢地任何一個,或者失去哂佢地,會唔會好似lulu咁呢…
 
或者可能更嚴重啦…
 
晨:「喂阿明,你個邊還好嗎。」
 
我:「吓,尋日咪話左幾好囉,做乜又問多次?」
 
晨:「無,因為今日我聽到好多人提Form 5,以為佢地係講緊你啫。」
 
我:「我估唔會係講緊我地掛…啊我都要返去班房啦,有機會再講啦。」
 
晨:「嗯,走啦。」
 




我就此別過晨哥,返左去自己班房,哇屌做乜個個圍住哂係一度?仲要個個都笑得咁開心既?
 
「又有一個插班生呀,今次仲要係個靚女。」
 
邊個係度講野…?
 
我周圍望望,最後比我搵到有個男仔坐係度,托住個頭咁望住我。
 
我:「又有插班生?eh…你係?」
 
浩賢:「叫我浩賢啦阿明。我都會入日化soc架。」
 
我:「啊你好呀浩賢,咁…以後就一齊玩啦。」
 
浩賢:「好呀。黑仔同阿希佢地兩個都係堆人入面,你入去搵佢地啦。」
 
我:「哦好呀唔該你。」
 
就係我準備行入去堆人羣想話睇下入面到底係咩環境既時候,人羣突然分開左兩邊,好似當年摩西分紅海咁。
 
呀仆你個街又真係有個摩西行出黎架喎,不過今次呢個摩西真係有西,係個女仔黎。
 
無錯,就係個個插班生。
 
「Hello阿明,我地第三次見面啦。」
 
此話一出,全班即刻起哄。