佢就咁出現係賽道,慢慢咁向美食攤位,亦即係Sarah佢地個邊行。

因為距離唔算遠加上我應該有寫輪眼,我睇到佢手臂有好多傷痕,行既時下仲拐下拐下咁,可能整親隻腳。

但呢D都唔係首要問題,第一個要諗既問題應該係…

點解佢會出現係度?明明之前失左蹤,點解會咁突然出現係呢度?

阿惠:「喂阿明你咁既樣既,你識得條友?」





我:「佢咪就係我岩岩講話阿樂個妹囉!」

阿惠:「屌呀!你又話佢失左蹤既,點解佢會係度架?嘩仲仆低左喎!」

我:「屌我叉知咩,落去睇下好過係度9up啦!」

我講完就dup低個飯盒,開始跑落去賽道。

當我同阿惠落到去個陣,已經有人圍住左Kathy,就係Sarah佢地。





不過,佢地都分成幾派人,Sarah同Yui係即時照顧Kathy,至於Ellen同Anna佢地就企係旁邊,皺哂眉頭嚴陣以待咁。

我:「喂佢做乜呀點解無啦啦仆街既?」

Sarah:「唔知呀,我地注意到佢個陣佢口upup咁行緊埋黎,之後就突然暈左喇。」

Ellen:「呢個唔係重點囉好唔好,佢點解會出現係度先係重點。 」

Anna:「佢之前明明…」





Ellie:「唔係講呢D野既時候,你地睇下佢滿身都係傷,至少送左佢去醫療室先啦。 」

岩,都係Ellie夠理性清醒。 

之後我地幾個合力將Kathy帶返去學校醫療室,交畀醫生處理。

醫生初步檢查過之後話Kathy並無大礙,只係餓到暈左,不過佢提醒我地話Kathy身上既傷並唔尋常,問我地有無需要報警或者搵社工。

我地幾個考慮左一陣之後決定都係等Kathy醒返先算,因為我地有好多野想問佢。

如果警察佢地係我地問到D乜野出黎就帶走左佢的話咁就麻煩啦。

睇黎返到屋企都無乜時間溫書架啦,趁佢未醒就溫陣先啦。

於是我打開課本,開始係醫療室溫習。





「佢而家受左咁多傷,就唔好咁快追究佢啦,等佢好返先問啦。 」

「喂你地係咪唔記得左佢個陣搵人打阿明打到幾傷呀? 」

「唔好嘈啦,Ellie都有分析過佢可能只係比人煽動利用啫。」

唉,好嘈,咁叫我點樣溫書。 

我合埋本書,望一望坐係我對面既阿惠,佢擺出一款佢都無計既樣。

唉,去隔離房溫吧喇。 

Kathy:「救我… 」





佢又發開口夢啦,由頭先開始佢就一直係度講「救我救我」咁。

佢到底經歷左D咩搞成咁啊…

我無理到Kathy既發開口夢,自己一個靜靜咁離開左醫療室,去旁邊一間房繼續溫書。

起初我仲聽到佢地幾個係度嘈,但過左陣就無哂聲氣,應該係比人鬧過啦哈哈。

嘩,死喇好難呀溫唔溫得切架。

我一直埋頭苦讀,自己都無留意到底溫左幾耐,直至有人放低一盒朱奶係我面前。

係阿惠。

阿惠:「飲包野先喇柒頭。」





我:「多謝喎柒頭,係喎而家幾點呀?」

阿惠:「都差唔多五點半喇,做乜。」

嘩我唔覺唔覺都溫左幾粒鐘架嗱?Kathy仲要咁耐都未醒?

我:「佢地幾個呢?佢地除左訓著左之外應該無可能可以靜咁耐架。」

阿惠:「哈,你真係了解佢地,俾班訓導鬧左一輪之後我就帶左佢地去學生會室,叫佢地自己玩。」

我:「哈哈,你真係醒目。」

我以為對話就咁就會結束啦,所以我打算繼續溫書,點知阿惠仍然繼續望住我,笑笑口咁。





佢應該有野想講?

我:「有野想講?」

阿惠:「所有野結束之後,你會點處置個女仔?話哂佢都搞過咁多事出黎,仲要針對你。」

我:「可以點處置啫,我又唔係法官,你係咪傻架。」

阿惠:「唔係吖我意思係你會唔會報警之類…」

我:「應該唔會啦,始終佢都係受奸人煽動利用架啫,加上佢又係阿樂個妹,我地個陣同阿天咁frd,無謂趕盡殺絕啦。」

阿惠:「真係似你既作風,你仲記唔記得你上年同阿傑打仗個陣…」

阿惠既說話講到一半,就有人開門走左入黎,黎既人係一個學生。

「學生會會長,個女仔醒左喇!」我同阿惠一聽到呢個消息之後都即刻放低手頭上既野,走過去隔離房。

明明我地既距離更近,但Sarah佢地居然快過我地去到醫療室,我同阿惠入到去既時候,Yui已經照顧緊Kathy,幫佢抹緊手腳。

而Kathy則係一臉不情願,擰咩臉唔肯望我地任何一個。

無人開聲講野,同頭先Kathy未醒既情況完全相反,間房靜到不得了。

頭先張牙舞爪,好似要煎左人層皮既Anna同Ellen都係唔出聲。

沉默,係由Kathy佢自己打破,係Yui幫佢抹身個陣擦到佢傷口,佢忍唔住「啊」左一聲。

Yui:「唔好意思啊我係咪整痛你… 」

Kathy:「唔緊要,係我唔好意思就真… 」

Sarah睇準呢個時機,打蛇隨棍上問點解Kathy身上有咁多傷痕,真係聰明。 

Kathy並唔肯答,尤其係同我對望左之後,佢又再自己望住幅牆,好似仲眼有淚光。

我:「我地係想幫你,如果我係令你唔肯講理由既原因的話,我可以離開,你就話比佢地聽啦。」

我都已經做好準備走人,大家都用一個「唔好走」既眼神望住我,但係最後佢留住左我。

Kathy:「等陣。」

聽到佢叫住我,在場所有人都即刻望過去佢個度。

Kathy:「你係岩既,我比佢呃左,仲要呃左好耐同好徹底。我真係蠢到無可救藥,居然走去害阿哥最好既朋友。」

「係個日被你地拆穿我身份之後我先知道,你地根本就無害死我阿哥。」

佢雖然仍然無望住我地任何一個,但我都見到。

佢既眼淚,正係度不停流緊。
除左喊,佢仲不斷細細聲咁講對唔住。

見到佢咁既表情,同埋佢身上既傷,我個心就好唔舒服。

本來想問既野,而家一樣都問唔出口。

我而家就只係識企係度望住佢。

好彩既係,我身邊有比我有用好多既人,Anna就係其中一個。

佢走左埋去,用紙巾幫Kathy抹走佢臉上既眼淚。

Kathy:「點解…我明明對你地做左咁多過分既野,你仲肯…」

Anna:「唔好誤會,我咁並唔係原諒左你,我而家只係幫朋友照顧佢個妹啫。」

Anna咁講完之後Kathy終於忍唔住,係醫療室度大聲喊出黎。

唉,我真係唔識應付呢D,好怕女仔係我面前喊,唯有擰咩臉先啦。

多得Sarah佢地拼命去安慰,Kathy只係喊左一野就平靜返,仲開始食野,佢好似餓左好耐,一見到野食就狼吞虎嚥。

我一句野都無講,只係係一邊望住。

知道左佢係阿樂個妹之後,望住佢就會令我諗起阿樂。

到底係咩人會諗到利用阿樂個妹咁惡毒…

阿惠:「見到你而家咁精神,介唔介意話我地知你到底發生咩事?點解你會滿身傷咁出現係運動場既?」

「啊,等我自我介紹先,我叫阿惠,都係你阿哥阿樂既朋友。」

啊,阿惠幫我問左添,衰仔仲搵到位自我介紹。

Kathy:「嗯我知道你係邊個,佢有俾過你地所有人既相我睇…其實我唔係有心走黎呢間學校,我係比佢dup低…」

「佢今日一早就叫人車我走,我當初仲以為佢終於肯放過我,點知佢既人載到我去山邊就叫我落車,係山邊馬路dup低左我。」

「我無其他辦法,經過既車又唔肯停低載我,我咪唯有行,之後仲整親隻腳先行到黎呢度,見到呢度有人聲咪入左黎…」

Ellie:「但係你身上既傷唔似係行黎呢度個陣整親架喎…似係…」

Kathy:「啊,係佢打既…係個次之後我聯絡佢仲同佢見面,打算三口六面問清楚左佢件事既真相到底係點。」

「開頭佢都係繼續同我講佢既版本,話你地有份害死我阿哥,仲話你地係想甩身先講成咁。」

「佢知道我被你地識穿左身份,話為左安全起見,安排左我去佢既地方度住。」

「開頭我都仲信佢,但當我發現我係佢個度住其實係比佢監視之後我就開始懷疑。」

「我偷偷咁聯絡外面,但比佢發現左,之後我地攤牌,佢就好似變左另一個人,唔係,應該話露出佢既真面目先岩,唔比我走,仲開始打我話我無用,話佢佈左幾年既局唔會因為我而失敗。」

Ellen:「咪住先,你係咁講佢佢佢,咁其實呢個人係邊個?話我地知佢個名等我地有線索都好吖。」

Kathy:「其實我都唔知佢全名係乜,佢只係稱呼自己做M,單一個英文字母M。除此之外我就唔知喇。」

呢個「M」到底係咩人?愈聽愈想知道呢個「M」既身份,我好想搵佢出黎。

或者我搵到佢出黎之後,我會忍唔住打佢一身。

但幾年前我都仲未叫做出名,連Sarah都未識到,點解佢就已經要對付我?