「無啦啦多左幾個家姐同細妹 Season 2」: 計劃
雖然對於呢個「M」充滿疑問，我亦好想快d搵佢出黎，但係Ellie提醒我唔好心急。
Ellie話對方係呢個時候選擇放走Kathy可能係有原因，可能係對方計劃既一部分，目的係刺激我。
如果呢個真係對方既目的既話，我可以好清楚話你知，你成功左喇，我而家真係好嬲。
不過，而家更重要既係要點安置Kathy先好，我地幾個圍繞呢個問題討論左好耐。
Ellen佢地都話不如收留Kathy係佢地度先，但Kathy好似唔係好想打擾到我地。
加上如果收留Kathy的話，Ellen或者Anna既父母就有機會見到Kathy身上既傷，到時又會多事。
就係呢個時候，阿惠提出左一個建議。
阿惠：「俾佢留係度？新校舍個邊有間職員宿舍無人用，執一執就可以住架啦。
」大家聽完之後都呆左一呆，真係無人諗過呢個方法。
聖所羅王咁大，都唔會有人注意到Kathy架啦，加上學校長期都有人，安全問題應該唔需要擔心。
最後，Kathy亦都同意左，仲好多謝我地為佢做咁多野。
而家既佢同係學校個陣既佢直頭係兩個人，而家既佢無左個種女神feel，反而多左份親切感。
呢個應該先係真正既佢啦。
安頓好一切之後，我地終於可以返屋企。
估唔到打算搵阿惠食餐飯啫，居然會見返Kathy，世事真係講你都唔信。
呀，一陣返到去要打比二家姐，話佢知我已經搵到Kathy先得。
今次佢應該會讚我啦掛。
Sarah：「阿明~？
」我：「唔？做乜呀？」
Sarah：「無呀見你好似係聖所羅王走左之後就好開心咁，其實你係咪鐘意左Kathy？
」我：「痴線！！無！！絕對無！！
」聽到Sarah咁講，我即刻強烈否認，仲差d咬到自己條脷。
Sarah：「真係咩~~Yui呢？Yui你又係點諗？
」Yui：「我都覺得阿明好似好緊張個位Kathy咁…頭先阿明你見到佢滿身傷個陣好唔開心…
」我：「唉呀真係唔係呢，我會有咁既反應都好正常啫因為佢係我好朋友個妹，見到佢咁我梗係會擔心難過架，我真係唔係鐘意佢呀…
」當我想再解釋落去既時候，我地居然已經到左，Sarah一臉奸笑咁帶走左Yui，而我只好一肚委屈咁跟住佢地入門口。
但當我一入到去客廳，我又呆左了。
二家姐：「返黎嗱你地三個。」
二家姐…返左黎？
佢就咁企係我地三個面前，就好似平時咁。驚訝既人睇黎唔只我一個，Sarah一見到二家姐就衝左埋去攬住二家姐。
二家姐：「我地好似都好耐無見喇Sarah。」
Sarah：「你咁耐唔見人真係擔心死我啦二家姐，我以為你出左咩事啊！」
二家姐：「係啊？咁真係唔好意思啦要你擔心，不過我無事呀唔洗擔心。」
見到呢幕「姊妹重逢」實在令人感動，我都唔想破壞呢個美好畫面，所以我繞過佢地，自己一個走左埋去梳化度坐低。
係梳化度，有大家姐同我老母。
大家姐滿眼通紅，好似喊過咁。應該係因為見返二家姐又或者係二家姐同佢講過D乜啦。
二家姐返得黎，即係話佢已經搵到辦法或者擬定好佢之前所講既計劃啦。
我見到佢咁，忍唔住拍拍佢膊頭，安慰佢。
我：「無事架喇大家姐，已經無事喇。」
大家姐：「嗯…！無事喇，大家又可以一齊開開心心過啦。」
開開心心咁過，嗯，我都希望可以。
老母：「好啦講都講到肚餓啦，開飯啦！」
好呀，終於可以一家人齊齊整整食飯啦。
我以為可以喇，點知Uncle居然唔係度喎。
不過無所謂啦，呢餐飯大家都食得好開心。
佢地幾姐妹都一直圍住二家姐，成餐飯都講個不停。
羽晨，Sarah一直咁同二家姐講好多唔同既野，內容圍繞讀書，是非，屋企，咩都有，好似想將呢兩個月既事一口氣話哂比二家姐知咁。
平時cool到爆既二家姐居然聽到笑到合唔埋口，親情既力量真係強勁。
真係好耐都無咁熱鬧同開心喇，估唔到多返一個人既效果可以咁強勁。
開心既時光唔想佢咁快過，但偏偏過得特別快，餐飯好快就食完。
大家姐好興奮咁話要親自整下甜品，仲叫左Sarah，Yui仲有羽晨去幫手，至於二家姐就自己一個行咗去泳池邊，同以前一樣望住個池底。
係喎，我有野要同二家姐匯報，差D唔記得咗添。
我於是就走到佢身邊，同佢望住同一片風景。
二家姐：「係咪有野要同我講。」
咁快就知道我既意圖，二家姐真係厲害。
我：「係吖，今日我搵到…應該話係見到Kathy啦，佢比個條友放返出黎，仲滿身都係傷。」
二家姐：「係啊？咁就好好睇住佢先喇，遲D應該可以用得著佢。」
用得著佢？二家姐講野好似有D奇怪咁既？
我：「二家姐你…」
二家姐：「我已經準備好哂所有野，而家就只係等對方上釣。」
「兩星期後將會有一個Party，內容係以你個名命名既慈善基金，即係話當日你就係主角，條友知道的話一定會出現，到時就等個個女仔認人啦。」
慈善基金…玩到咁大？二家姐邊黎咁多錢？而且佢之前仲話會拖慢吞併進度，個度應該都要用唔錢…
我：「二家姐你邊度黎咁多錢…」
二家姐：「唔？我自己本身有d投資，再加上用Daddy D錢同問我既朋友借咪夠。」
「話時話，如果個日你搵到佢，你會點做。」
我：「首先一定會係狠狠咁打佢一身，之後先再問佢同我有咩深仇大恨。」
二家姐：「好，非常好。今次你一定要向人證明你唔係好蝦，等人地唔敢再黎騷擾你，咁你就可以過你想過既生活。」
唔…？
二家姐：「好喇，要講既野暫時係得咁多，你專心去考埋聽日個試先啦。」
佢講完之後就自己走左，留低我一個望住個池底。
池水明明好清澈，但我總係無辦法係度睇清楚池底既容貌，就同二家姐一樣。
佢頭先明明就係我面前，但我始終覺得自己睇唔清楚佢到底諗緊乜。
我唯一知道既係，佢返左黎，就係得咁多。