「無啦啦多左幾個家姐同細妹 Season 2」: 希望
Ellie既事，我諗佢暫時都無辦法䆁懷住。
佢幾乎每日放學都會去醫院，有時我都會一齊去。
而家我都無再諗佢到底原諒左我未呢個問題，好似已經唔再重要。
佢需要既話，我就會係佢身邊陪住佢，咁就已經夠。
至於學校個邊呢，因為我應承左阿希會幫佢搵人一齊跑，所以呢幾日係學校我都係同佢四處奔走。
就係今日，我終於氹掂一個男仔肯一齊參加，不過係有條件既，就係跑完之後佢要同Sarah影相。
當時我唔知點解無諗咁多就應承左，過多陣已經開始後悔，但又唔可以反口，所以我lunch個陣就同左佢地講。
開頭我以為佢地會鬧我喇，點知居然無喎，佢地幾個仲笑我添。
Sarah：「我無乜所謂呀，都係影張相啫，幫到你既話我ok吖。
」我：「Sarah…
」Anna：「你就好Sarah，係學校咁受歡迎，我係學校被人當係男人婆，叫我Anna哥咋。」
Ellen：「我諗咁都係受歡迎既一種啦哈哈唔好咁介意啦Anna，不過真係好喇阿明，咁樣你地就可以參加個接力。」
我：「係呀，到時你地會同我打氣架可？」
Yui：「嗯，我一定會！
」Ellen：「唔得wor我係學生會主席，我一定要公平架喎，你叫Ellie幫你打氣啦，Ellie可？
」Ellen突然將話題掟比專心食緊野既Ellie，唔只係我，大家都注意緊Ellie，想睇佢有咩反應。
Ellie佢聽到之後就放低左手上既餐具，抹左一下嘴。
Ellie：「會啊。
」嘩短短兩個字已經令我開心到想跳起，真係神奇。
食完lunch，我地六個就開開心心咁一齊返學校，Sarah同Ellen仲夾住Ellie，三個人彈下彈下咁返學校，而Yui就一直好怕羞咁係佢地旁邊行。
呢D野Yui仲未夠膽做呀..？哈哈。
仲有最後既Anna，就係我旁邊同我一齊慢慢行喇。
我：「練跑練成點呀Anna姐，下星期就陸運會喇喎。
」Anna：「哼，我同你講我而家係最佳狀態呀，上年參加唔到陸運會今年一定要跑返夠本先得，我要拎最佳運動員！
」我：「哇鬥志高昂喎你，期待你既戰果！
」Anna：「咁你又點呀傻仔明，你準備成點？」
我：「我？我唔洗練喇，志在參與。
」Anna：「我唔係講陸運會呀，我係話聽日個慈善基金晚會呀。
」我：「聽日！？
」我拎電話出黎睇下，原來真係聽日，我原來真係可以完全無左回事。
Anna：「唉你個傻仔…都唔知好嬲定好笑…不過你加油啦，我聽晚屋企有事黎唔到架啦，希望你順利喇。」
我：「嗯，一唔會令你失望。
」Anna：「係先好講呀你。
」哇原來聽日就係…時間突然過得咁快既。
應該要去搵二家姐喇。
真係奇怪，呢一刻我既心情居然比平時都更加平靜。
雖然成個腦都係呢件事，但並無緊張感，只係諗「終於都到呢一日」。
真係奇怪呢我呢個人。
今日放學Ellen主動提議話不如一齊返去我屋企，話最近好似好耐無成班人一齊玩咁。
我當然無所謂啦，仲要連Ellie都話好，我邊有可能話唔好！
我地六個開開心心咁返屋企，應該又會黎一場大富翁大戰架啦我諗。
我今次做Banker睇佢地玩算喇。
Anna：「咦做乜會有架車泊左係你地屋企門口既阿明？」
車？係喎真係有部車喎仲要係我未見過既，唔通有客人黎左搵Uncle？
我：「可能有客人黎左喇，咁你地一陣玩個陣記得唔好咁大聲喇，失禮架。
」Ellen：「喂咁你即係話我地平時好大聲好失禮你啫，吓！好大聲咩而家！
」Anna：「喂呀唔好係我耳邊大叫喇，聾喇我。
」哈哈，Anna講出我既心聲。
雖然架車係好令人在意，但總無可能傻左係度望住佢架，反正入去問下蘭姨就知喇。
不過原來跟本就無咁既需要，因為我地行到去客廳就已經見到兩個正常唔會係度出現既人。
一個係阿惠，另一個係Kathy。
我：「咦點解你兩個會係我屋企既？出面架車係你地架？
」阿惠：「Yo~大佬明~~係你二家姐叫我帶佢黎架。
」二家姐叫阿惠帶Kathy黎屋企做咩？話時話，Kathy身上既傷好似…
我：「Kathy你D傷…
」Kathy：「多得阿惠呢排照顧，已經好得七七八八，多謝關心。
」我：「哦咁就好喇，你地話係二家姐叫你地黎，咁點解你地仲會坐係度，唔去搵二家姐？」
阿惠個衰仔，會唔會打緊Kathy主意呢。
阿惠：「咁係因為…」
大家姐：「阿May咁岩出左去啊，所以我叫阿明你兩個朋友坐係度飲住荼等囉~
」大家姐捧住一盤cake，由廚房既方向慢慢行出黎。
大家姐：「我整左蛋糕呀~~大家一齊黎食呀~
」入得廚房，出得廳堂，大家姐將來一定會係一個好老婆啫哈哈，唔知將來邊個咁有福氣可以娶到大家姐呢。
邊個都好喇，唔係上次條仆街就可以。
但二家姐出左去呀…？真係可惜呢，唔緊要喇一邊食住蛋糕一邊陪佢地玩大富翁喇，二家姐應該好快返架啫。
我地咁多個人係飯廳邊食蛋糕邊講是非，Ellen仲要講到鬼死咁大聲，岩岩係車度仲話自己唔大聲wor。Ellen同Anna不停咁同阿惠仲有Kathy大䜕有關我地學校既野，講而家好忙好忙之類，Ellen仲不忘同阿惠討論有關聯校活動既野。
至於Ellie，Sarah仲有Yui呢，食到一半就掛住請教大家姐，問咁好食既蛋糕係點整，氹得大家姐好開心。
Kathy聽到佢地不斷講學校既野，表情有D…我都唔識點形容，佢好似聽到唔多開心咁囉。
係喎，如果今次件事順利解決，Kathy又會去邊？
我：「Kathy，過左聽日之後，你有咩打算？會唔會返返學？」
我問完之後，大家都靜左望過黎，就連原本嘈到拆天既Ellen都即刻靜左。
不過今次沉默無維持好耐，Kathy好快就答左我。
Kathy：「仲未有諗過，可能會返去搵我屋企人都未定。
」我：「哦…可以既話，返黎陸運會同大家一齊玩吖，過幾日就係，阿希佢地一定好想見到你。
」Kathy：「哦…都可以既我諗，不過呢D野都係遲D先算喇…」
我：「咁當你應…」
講到一半，就聽到開門聲，大家都期待既二家姐終於出現。
佢著住一套黑色緊身裙，配上一件大䄛，相當美艷動人。
二家姐：「哦？乜咁多人係度既？」
大家姐：「你係咪叫左阿明既朋友黎呀？人地等左你好耐喇。
」二家姐：「啊係，Kathy吖可？你今晚就留係度住，至於阿…阿惠！
唔該哂你帶佢黎，你隨時可以走。」吓！？Kathy今晚要係度住！？點解呀？
二家姐並無解釋原因，只係走埋黎餐檯，見到檯上既蛋糕，想話拎一件黎食，但係被大家姐阻止。
大家姐：「唔講清楚無得食！
」面對住大家姐既威逼同蛋糕既誘惑，二家姐亦只能就範。
二家姐：「Kathy聽日要同我地一齊去慈善基金晚會，到時要佢認出邊個係始作俑者，但如果佢同我地分開去會場既話可能會係入場既時候比對方發現，所以我就叫佢黎呢度住一晚。
」聽落合理，但好似有D無情，當Kathy係工具咁。
之後大家姐亦無藉口繼續扣起件蛋糕，唯有乖乖咁供手交出蛋糕比二家姐，二家姐接過就帶住去泳池邊，自己對住池景慢慢品嚐件蛋糕。
大家姐：「好喇好喇大家唔好理佢喇，不如我地玩下game？我淘寶買左個桶叔叔呀~我而家就去拎！
」淘寶？大家姐識淘寶？
大家姐講出淘寶呢個字詞，令Sarah佢地大所困惑，開始低聲討論。
我同阿惠仲有Kathy對望，苦笑左下就算。
大家姐帶黎既桶叔叔，為大家帶黎不少歡樂，笑聲充斥成屋，就連老母同蘭姨都被吸引過黎一齊玩。
就係呢個時候，大家姐再拎多一個出黎，原來佢唔小心買左人地批發一箱，有成廿幾個。
不過唔緊要喇，大家開心咪得。
趁大家開心到忘哂形，我搵到個時機去交下水費，途中經過泳池，見到二家姐仲係度，衫都未換傻左咁望住個池底。
出於好奇，我行左去睇下佢咩事。
就算我入左去，佢都係無發現到我。
我：「二家姐？
」佢終於注意到我，但都係呆下呆下咁望住我，好似岩岩訓醒既細路女咁。
死喇，而家反而唔知點好添。
我：「你頭先…去左邊度？約左人玩？
」二家姐：「啊…唔係…我去左會場睇佈置同check聽日既流程表。」
原來佢係忙緊件事，唉我仲掛住玩，真係慚愧慚愧。
二家姐：「你唔洗擔心咁多喇，我幫你安排好哂，你聽日只要個人出現係個度就可以。」
我：「嗯…希望聽日就係最後，真係可以解決哂啦。」
二家姐：「最後呀…？都係既，做呢D野真係令到個人好…攰…
」個攰字一講完，我就發現佢已經訓著左。睇黎佢為左件事都四圍奔波，早已身心俱疲。
我唔想再嘈醒佢，所以問蘭姨拎左張被，輕輕搭左上二家姐，確保佢唔會冷親之後就轉身走。
走既時候聽到佢發開口夢，雖然聽唔清楚佢講乜，只係聽到個明字，睇怕都係鬧緊我。
不過咁代表佢應該真係訓得好淰喇。
辛苦你喇，二家姐，要你幫我做咁多野。
多謝你。