「無啦啦多左幾個家姐同細妹 Season 2」: 挫敗
偏偏…要係我心存僥倖既時候你先要走黎破壞我既希望？
有無犯規？？？佢有無踩界又或者行咗出圈之類？？？
我好似癲咗咁，搏哂命去尋找新既希望。希望仲可以有機會可以黎絕地大反轉。
可惜既係，無。佢無踩界，亦無行出圈，一切都係跟足規矩，完美既。
係老師裁定成績有效既時候，我差D就跪咗係地下。
真係始終都贏佢唔到…？差個少少都係贏唔到？
哇…一個陸運會居然可以同時令自己體會到天堂同地獄，仲要咁短時間內，真係好玩！哈哈！
男師兄甲：「喂，唔好唔開心啦，你已經做得好好架，對手係晨哥，輸都係無何奈何既事，唔好咁介懷啦。
」因為對手係佢，所以輸咗都無問題…？唔應該係咁架…
而家既我應該無論對手係邊個都好都要打敗佢地，去爭個全場總冠軍比Anna先係架…
唔可以用「對手係晨哥」作為比自己開脫既理由啊…明明我頭先仲好威咁同自己講今日自己一定要贏，點知轉個頭就即刻輸咗比佢…
我好想發洩，只好握緊自己既拳頭，握到好用力，用力正正就咒罵緊自己既無力。
最後，都再無人可以超越到晨哥既成績，佢拎到冠軍，而我就係亞軍。
宣布完成績之後我仍然企係原地無走到，抬高頭望住個天，任由雨水拍打我塊臉。
輸咗一場啫，點解我會有咁重既挫敗感，好似已經輸埋其他比賽咁。
啊…睇怕我真係拎唔到全場總冠軍喇…點面對Anna好呢…
「喂，你就係得咁多實力？」
邊位呀…唔好煩我啦俾我靜下啦唔該…
我無理呢個不解人意既同學，繼續自己望住D雲。
點知過咗無耐，我居然被人用掃堂腿掃低。
邊個用我既必殺技！？
我即刻望住到底係邊個仆街用咗我既必殺技，點知就見到晨哥。
原來就係佢用我既必殺技…哈哈…
晨：「喂喂喂，認真架你？輸咗一場就喊？唔係吖化？
」喊…？我喊緊咩？我摸摸自己塊臉，係摸到有D水珠，但唔知到底係眼淚定雨。
晨：「心存僥倖，打算倚靠運氣既話係無可能贏到我，仲會連其他人都贏唔到。」
「如果你真係想贏我，想贏比賽拎全場總冠軍既話，就同我做好心理準備，認認真真面對每一場比賽，唔好諗其他無謂野。
」我無盡力？我盡力到無得再盡啦，仲想我點？俾埋條命你好未？
晨：「我唔會放水，你應該好清楚，就算我知道你係要氹女朋友都好我都唔會。
」佢講完就同lulu幾個人一齊行返去看台，留低我一個。
我…要…贏佢。
望住佢離開既背影，我心入面就燃起咗前所未有既鬥志。
俾人咁樣挑釁仲唔嬲既話，真係唔係男人黎。
我好想贏佢，唔再只因為我要拎全場總冠軍比Anna咁簡單，而係因為我自己都好想可以贏到佢，嬴呢個心入面一直都遙不可及既存在。
仲有100米，400米，跳高同跳遠四個項目…一定要贏到佢…
Ellen：「阿明！！
」唔？Ellen把聲？
我望過去，見到Ellen Ellie兩姐妹擔住把遮跑緊過黎。我見到之後都慢慢行過去佢地個邊。
一行到埋去Ellen就用雙手捉實我係咁搖我，仲不斷問我做乜事，表情仲好驚咁。
Ellen：「咩事呀阿明！？發生咗咩事？係咪整親邊度？
」我：「無呀，做乜咁問？
」Ellie：「我見到你一個人企係度淋雨，以為你有咩事，所以咪去搵家姐一齊黎睇下你。」
我：「哦，原來係咁，無呀我輸咗比晨哥，所以咪想一個人靜吓，思考下人生咋嘛。」
「你地會唔會都覺得我輸咗晨哥係一件好正常不過既事？
」佢兩個聽我咁講之後互相對望咗一下，但就係呢下就已經答咗我。
我：「哈哈，不過今次我點都要贏到佢。」
講咗我就係佢地身邊行過，準備去跳遠個邊練習下。
但行咗兩步，佢兩姐妹就一人一隻手捉住咗我。
Ellie：「一次既挫敗會係成功既原動力，加油，去挑戰下無壞，我都想睇到你贏晨哥。
」Ellen：「不過唔好太衝動啊，比賽固之然重要，但友誼先係最重要，唔好為咗比賽輸咗友誼。
」我：「如果我贏到既話有乜獎勵先？
」Ellen：「未贏到就想要獎勵，到你贏到先算喇。唔好再係度淋雨啦，遮你返過去先啦。」
Ellen講完就拉咗我埋去把遮度，三個人用一把遮返去。
去到跳遠場地個陣，晨哥已經係個度熱身，望都無望過我地。
佢仍然係認真mode，氣勢好嚇人，但今次嚇唔到我，我反而覺得咁仲好。
要挑戰就要挑戰出全力既佢。
「男子甲組跳遠預賽而家正式開始。」
Round 2，Fight!
今次我比起鏢槍個陣更加冷靜同沉著，專心應付比賽。
跳遠比起鏢槍更加多人參加，好多熟悉既面孔都有參加，例如阿希，黑仔，諾賢，仲有上年幫過我既Dickson，十四佢地。
佢地全部都係晨哥附近談笑風生，見到我仲向我揮手。
Ellen：「咁我要返去做野先啦，比賽要加油呀知唔知？
」我：「我會架啦，Ellie你都一齊返去啦。
」Ellie：「我都無野做，可以留係度幫你打氣架喎。
」我：「唔洗啦，呢度全部都係男仔，你一個女仔係度會好奇怪，我收到你既加油架啦，我會出盡力，用盡一切去爭勝。
」就係咁送走咗Ellie同Ellen，可以自己一個專心係呢場比賽入面。
競爭大咗，但我都唔怕。而家既我唔會怕輸，只會諗點樣可以做得更好。
要贏既話，就唔可以有怕輸既心態。尤其對手係佢更加唔可以驚。
老老實實，跳遠跳高真係唔算係我強項，以前玩都係三甲不入。
但係我覺得而家既自己可以贏，學哈姆太郎，呀唔係，係古萊哈姆先係，今日既我係凌駕於阿修羅之上。
一定唔會有問題既。
係就輪到我既時候，黑仔佢地走咗埋黎撩我傾計。
黑仔：「喂阿明，聽隔離班既人講你頭先鏢槍拎到銀牌喎，勁啦咁快就有牌進帳。」
阿希：「仲好似只係輸比晨哥少少，睇唔出原來你運動咁勁架喎。」
我：「跟住落黎我會贏佢，信唔信。」
阿希：「邊有可能吖~~佢係藍洛晨喎，點會贏到呀。」
我之前都係咁諗，但直至頭先掟鏢槍見到佢曾經同我差唔多成績，我就開始諗到底佢係咪真係咁遙不可及。
加上頭先比佢咁挑釁，就算佢真係神都好，我都要諗辦法打敗佢啦係咪先。
就算要去希臘問人借件天馬座聖衣都要。
「陳煒明。」
好啦到我啦，盡力而為啦。學D MK仔話搏盡無悔！！
今次企係準備位置既感覺唔同咗好多，之前鏢槍個種緊張感無哂。
我心無雜念，只係望住個沙地。
跳喇！！唔知係咪因為唔緊張，加上可能我又夠鬥志同集中，呢一跳我又取得令自己驚訝既好成績。
5.6米，刷新咗我既個人紀錄，同時係暫時第二名既紀錄，唔錯唔錯。下一次一定可以做
我跳完之後下意識望咗過去晨哥個邊，想睇下佢有咩反應，一如我預期，佢係無反應既。
佢應該無放我在眼內，不過唔緊要，我一定會令你大吃一驚，到時先睇你會有咩反應。
我拍拍屁股同腳上既沙就離開咗沙地，去返阿希佢地個邊。
阿希：「喂你真係個人才黎架喎，跳遠你都咁掂既？做乜唔去報校隊？」
我：「邊到勁吖，唔好咁讚我，我會囂架。」
就係我同阿希傾緊計既時候，黑仔跳咗，都有成4.8米，佢自己開心到跳起，仲差D仆咗係度食沙。
話都無咁快，就輪到晨哥跳，同之前一樣，大家都係好期待佢今次會有點既表現。
原本傾緊計既人都靜咗落黎，係跳遠場上既人既目光幾乎全部都集中係佢身上。
佢好輕鬆咁一跳，就有6.11米，一下超越哂所有人。
同樣地，佢咩都冇表示，係裁判話無foul之後就默默咁行返去Dickson佢地個邊。
Dickson佢地見到晨哥咁既狀態都唔敢講乜，只係企哂係晨哥背後，好似一排守衛咁。
仲有一個見到晨哥佢咁就即刻走咗去，唔知去邊。
好快，第三跳都過去咗，我又跳好咗少少，5.8米，又成功入到決賽。
唔洗講啦，佢梗係入到決賽，仲係以第一名既身份。
決賽入面就只有我同黑仔兩個係Form 5，其他都係Form 6既人。
所以順利成章，我就係第一個跳既人。
當我企係助跑道，準備起跑去跳既時候，突然聽到廣播。
「男子甲組100米最後召集~~」
吓！？咁快！？唔係11:30先開始咩！？而家幾點呀..？咦…屌…
原來而家已經11:40。
我見到咁即刻舉手同D老師示意有問題。
老師：「做咩呀同學？
」我：「唔好意思呀Miss，我要去100米個邊報到，而家我應該點算？」
老師：「啊啊咁呀？麻煩啦咁就…仲有無其他同學要過去報到？」
Miss一問完，在場有四五個人都舉起手。
老師：「咁呀…要過去100米既同學交低個名先，我搵工作人員去100米報到處幫你地報咗到先，我會安排你地幾個一次過跳哂三次，你地之後就即刻過去個邊啦。
」Miss轉數都幾快，安排又妥當，真係勁。
情況逼使下，我好快咁跳咗三次，雖然係好趕，但都唔影響我既表現，反而好似發揮得仲好，最好個次有6.2米。
一跳完，確認咗無foul之後我就有理無理直奔去100米召集處，仲差D跣親，去到既時候岩岩好人地就叫緊我個名。
我應完之後又急急腳行去起跑線Ready，對腳都未有得抖又要再搏殺。
但本著「搏盡無悔」既心態，我心入面一絲抱怨都無，反而覺得好充實。
「嘭！」
隨著槍聲一響，我就好似一粒子彈，應聲彈出。
快D…再快D…！！咁樣入到決賽都贏唔到佢，要再快D..！！
跑步係我唯一有信心既項目，一定要係呢個項目度贏到佢！！
最後，我又贏到預賽，時間仲相當好睇。
但當我滿意自己既成績既同時，又有個壞消息。
晨哥贏咗跳遠，成績係6.35米。