「無啦啦多左幾個家姐同細妹 Season 2」: 中止

又俾佢贏咗…豈有此理。

100米同400米一定要贏到佢。

經歷過鏢槍既挫敗，今次面對呢個壞消息既時候我無沮喪，只係有少少唔服氣。

唔服氣既原因唔係因為佢，而係嬲係我身上，我嬲我自己能力未夠又自滿。

呼…今次100米係同時一齊跑，應該唔會再有鏢槍同跳遠個陣既心態。

應該會變咗做真係搏老命。

雖然我知道佢一定會入到決賽，但我都係想睇佢跑，想了解佢既速度到底同我既差幾多。

所以我走到賽道旁邊，霸定靚位等睇佢跑。

好可惜，因為有分開幾組預賽，仲未可以即刻睇到佢跑。

暫時只可以睇住其他人跑，雖然大家都跑得好快，但我始終都睇唔入眼。

我覺得佢既話，肯定可以跑得更快。

值得一提既係，賽道既情況好似惡化咗唔少，已經見到有兩三位師兄係跑緊個陣跣到

雨係呢個時候開始變大，慢慢變到好似一個開盡既花灑咁，水聲勁大。

偏偏學校既反應太慢，面對如此大雨只係識搬返係外面既野黎，完全無發指示去暫所有賽事。

「只要佢唔話腰斬，就算落雨到落到瀑布我地都係要跑架喇。」

佢個陣講既野，居然真係靈驗咗，仲要發生係佢身上。

無錯，而家終於輪到佢個組跑。

咁大雨，真係仲要跑？司令台個邊搞呀？

Sarah：「阿明~你又係度淋雨做乜呀？好易感冒架快D返去喇。

」

就係呢個時候，Sarah帶住遮係唔知邊度走咗出黎遮我。

我指一指起跑線，問Sarah點解咁大雨仲要繼續比賽，咁唔會好易出事咩。

Sarah：「我頭先去司令台借遮都聽到D老師係度討論呢件事，好幾位老師話呢場係最後一場甲組100米預賽，快快搞掂佢算啦咁喎。」

但係咁未免太冒險啦掛…受傷既話責任邊個負？

就係我思量緊呢D唔關我事既問題既時候，鳴聲又再響起。

賽道上有體育精神既運動員聽到之後都冒雨起跑，速度仲要無因為大雨而減慢，唔知仲以為佢地個邊無落雨。

尤其係佢，晨哥跑得特別快，仲快過頭先係無咁大雨既情況跑既我地。

都唔洗多講，佢咁樣仲點會贏唔到預賽，最令人佩服既係佢居然無跣腳。

「真係好厲害…」

呢句說話係我同Sarah同時講出黎，大家講完都望住對方笑咗出黎。

Sarah：「不過係我心目中都係阿明你叻D，嘻嘻。

」

我：「賣口乖。睇完喇，快D返入去喇，咁大雨有遮都會濕到。」

我摙一摙Sarah個鼻，懲罰同時亦係嘉勉佢既口甜舌滑，之後我地就拖住手返看台。

佢的確好厲害，呢個係無可爭議既事實。

但我要贏佢，呢個亦都係一個無可動搖既決心。

大雨未見到有減弱既跡象，學校係晨哥個場初賽完咗之後亦宣布所有賽事暫停，所有學生要返看台等。

亦因為呢場大雨，令到看台都一片混亂，好多人都淋濕咗，要係度抹身。

可惜大部分都係男，如果係女既話就一定好多好野睇喇。

因為我同Sarah唔係同一個社，所以我地係去到看台樓下就分別，各自各返去自己社既看台。

當我返到去自己社既看台個陣就已經發現看台爆哂栅，位都無多個。

連我之前坐既個個位都已經比人坐咗。

仆街喇…咁我個袋呢..？去咗邊？

阿希：「阿明~~呢邊呀~~

」

就係我惆悵不已既時候，阿希把死人聲又傳到黎我耳邊。

我周圍望望，終於比我搵到呢條傻仔，原來佢坐高咗幾級，仲同Ellie Yui坐埋一齊，連埋Cody四個人八隻眼望住我一個人。

我搖搖頭，嘆住氣咁走上去佢地個度坐低。

我都未真正坐低，阿希就已經撩我講野。

阿希：「喂恭喜你入咗男甲100米決賽喎，要同晨哥一齊跑有無信心贏？

」

我都估到呢條友會問呢個問題…

我：「講咁多做乜吖，咁大雨不如諗下下晝個學會接力跑唔跑得成仲好喇。

」

阿希：「又係wor你唔講我都唔記得添，我諗今日都係咁先架啦，咁大雨，我賭半個鐘後就會宣布今日中止架啦。

」

半個鐘…？係真唔係呀？

Yui：「阿明…毛巾。」

嘩Yui連毛巾都準備埋？真係細心到極點。

我接過Yui為我準備既毛巾，抹返乾自己個頭。

Ellie：「而家咁搞法家姐安排D野都唔知點算好喇…」

Ellen為陸運會安排咗野？會係D乜呢？

不過算喇，應該係學生會既機密野，我呢D外人都係唔好過問喇。