一個遇上女神，再忘記她的故事: Chapter 62

甚麼，難道一切又是假的?還是Dean List First Hons的人都是思想古怪?
 
「點解呀Tracy?」我十分不解。
 
「同你拍拖嗰年幾，我已經知道你係咩人，我六年黎都放唔低你，証明你係我一生中最愛，但我唔會再做你女朋友。你想我繼續留喺你身邊，你就要做一個值得嫁既男人，到嗰一日，我唔會做你女朋友，我會立即嫁比你!」
 
和女伴簽一紙婚書前，你有問過自己是否值得嫁嗎?甚麼才叫值得嫁?甚麼才是一個好丈夫?你愛一個女人，所以想跟她結婚，但自己又是否值得負託?結婚是為了在法律上倫理確立你和她之間的關係，抑或想告訴她，你，會是她一生中遇過最好的男人?
 
這個問題突然成為了我生命中一個巨大的問號，和Tracy重修舊好當然是我人生中最大的任務，但如果我做不到一個值得嫁的男人，我和Tracy只有原地踏步，我開始慢慢細想好男人的條件…
 




事業?月薪四萬五千元的Key Account Manager，算是有吧。
 
有情有義?我雖然在愛情路上曾遇人不淑，但至少所有事情都出自真心。
 
孝順?當然了，這三年我以孝為先，重新修補了我和父母疏離的關係。
 
錢?銀行賬戶有六七十萬，股票又有十多萬，不算少吧?
 
還欠甚麼?
 




結婚需要甚麼?
 
結婚，就是代表要建立一個家，要有一個家，首先要有一個固定的居所。
 
經過個多星期的思量，我大概猜到Tracy的心意，於是便出發到屯門各屋苑睇樓，希望與Tracy建立一個家前，自己可以先為她提供多一份安全感。
 
2013，28歲，樓價高企，但為著與她建立進一步關係，做一個值得嫁的男人，忍痛也要買樓了。我找了不同的地產經紀以及父母出動，物色心儀屋所。
 
「拿李生，千金難買向南樓，呢度幾好架，向南冬暖夏涼，又係高層，仲望到屯門西鐵站添，雖然差唔多廿年樓齡，但業主有裝修過，即買即住架!」地產經紀在我看了上百個樓盤後仍極力游說。也難怪，在樓市辣招下生意慘淡，這個年頭如非必要又怎會有人主動買樓?我大概是他們絕少的客戶之一，當然是招呼週到。
 




「阿仔呀，呢間正呀，廳大房大呀，嘩!同友愛村比真係爭好遠咯。」媽媽這時也加入遊說行列。於是在對生活和結婚有一片曈景下，我便做了置業的決定，購買了屯門卓爾居的一個上車單位。因為我知道，給女人一個家，就是嫁。
 
為了給Tracy一個驚喜，我故意要求業主讓我大訂和細訂同一時間在律師樓處理交收手續。
 
「喂Tracy。」我致電給她。
 
「嗯，點呀?」
 
「今個星期三早少少收工，去一去上環吖，我有啲野想比你。」我回答，沒錯，Tracy，我想給你一個家，讓我成為一個值得嫁的男人。
 
「哦好啦。」
 
星期三，我帶Tracy來到律師樓下的電梯大堂，可笑的是她仍然對我的計劃慒然不知，我想如果她知道我為她準備的一切，一定會嫁給我吧。在樓價高企的今天，有能力置業的男人已經成為所謂的筍盤，為Tracy負上三十年供樓的責任，我絕對願意。
 
甫上律師樓，Tracy便一臉驚慌。




 
「喂，你帶我上律師樓做咩呀?搞結婚呀?我冇話嫁比你喎。」Tracy一臉不解。
 
「我求婚點會咁求其呀，陣間你咪知囉，有好野益你。」我回答。
 
等了五分鐘，便有接待員帶我們到師爺的辦公室。
 
「呀李生楊小姐，簽過呢份文件之後呢，你地就正式成為呢層樓既業主喇。」師爺簡單的解釋道。
 
「李智傑，你做乜野呀?你買樓還買樓，做乜拉埋我上黎呀，仲要同你聯名?」Tracy在知道一切後不但沒有露出欣喜的神情，反而顯得一臉憤怒。
 
「做咩呀Tracy，我知道給女人一個家，就是嫁，我想將呢份禮物送比你，比個驚喜你吖嘛，放心喎，層樓唔使你供架。」我仍然一臉天真的說。
 
「李智傑，邊個要你層樓呀!我唔簽呀!」Tracy說完，便頭也不回地走了。
 




我趕緊追了出去，卻發現她已不見，唯有再到街上尋找她的蹤影，終於在干諾道中找到了她。
 
「Tracy，你做乜唔開心呀?所有女仔如果見到個男人咁為佢都應該好開心架，唔係咩?」我依然一臉不解。
 
「你係咪白痴架李智傑?你當我係一般既女人呀?邊個話要你層樓呀?如果我係因為咁而去揀一個男人，我一早唔揀你呀!你知唔知呢幾年有幾多人渣寶馬Audi接我放工想追我我都冇理到佢地呀?我根本唔旨在層樓呀!
 
我揀得你，我就預左同你捱，就算我第時同你乞食訓街日日食麥當勞我都心甘情願，你以為我貪層樓?你咁樣係侮辱緊我呀!我唔係要你做一個大眾都覺得值得嫁既男人，我係要你做一個只有我楊詠怡覺得值得嫁既男人呀!死蠢!」Tracy說完再次頭也不回地走了。
 
我答應過我不會再放手，於是便衝上前一把抓住她。
 
「得，我做!我做比你睇，你唔好走!」我慌忙的說。
 
「睇下點。」
 
一個Tracy值得嫁的男人，究竟如何做到?