《病港》: 57

料不知，我越走得遠，它就越是跟緊住我。


於是，我改變主意了。


我轉身面向了它，並提起雨傘就準備要往它臉孔戳去的時候，它居然‧‧‧‧‧‧張口跟我說話了。


「哈佬。」它的聲線，根本跟正常人類無異。






要說它身體上有什麼特異？就只有那跟一般胖子相若的肚子吧‧‧‧‧‧‧


「新型病者‧‧‧識模仿人類聲音？」我卻了步，先看清情況再說。


「你行上呢條路通去墳場，係去搵北賢？」他的聲音懶音好重。






「有智慧病者‧‧‧」我繼續猜疑著它的身份。


「呵呵，我唔係病者呢。」它的笑容如同笑臉佛般，帶點趣怪：「我叫做南愚。」


「南愚‧‧‧？」






眼前這位自稱南愚的人，用手指擦一擦肚皮上的紅點，結果‧‧‧紅點像顏料般化開了。


「呵呵呵，我只係一位假病者。」南愚笑道。


「‧‧‧」


「你係上去搵北賢？」


「係‧‧‧」他既是人類，怎會打扮成病者躲在一旁偷看人。






「呵呵，你準備向佢買情報？」南愚猜得到我走這條路的目的。


「嗯，但點解你要企喺一邊偷望我‧‧‧」我問。


「因為南愚我唔想你哋俾北賢呃。」南愚說完之後，不忘加句笑聲：「呵呵。」


「呃乜。」

「北賢嘅情報都係假嘅，我南愚就唔同。」


「我憑乜要信你。」






「你即管上去搵北賢吧，你好快會落返嚟搵我要情報。」南愚笑呵呵的回到草叢那邊，躺地而睡。


精神病一個‧‧‧‧‧‧


我當然沒有理會他或去糾纏他，很快就跑完上坡路，到達將軍澳華人永遠墳場。上面空氣涼爽，輕風微微拂著我的黑袍，我在眾多墓碑之間行走掠過，感覺有如扮演著真的死神。


我在墳場行走了好一陣子，都找不著所謂北賢的身影，直至我靠近到最右面一列的墓碑時，才發現一個男子正躺坐在碑前，似是沉思、又像休息。


「你係北賢？」對方頭髮豎立，身材瘦長，跟剛才的南愚明顯成了對比。






「你嚟，係想知乜？」北賢閉住眼問：「你應該知我收費驚人。」


「我有果汁糖。」我把一顆果汁糖拿出，說：「我想知關於病童嘅資料。」


「糖？你啲糖留番俾細路食吧。」北賢無視我手上價值無比的果汁糖，說：「我唔需要～」


「你要啲咩？」我直接問。


「我要‧‧‧」北賢把掌心放在額前，回想著什麼：「我要十包即溶咖啡。」






「好難俾到你‧‧‧」咖啡在大本營來說，也是一種近乎天價的飲料。


「咁到你有先搵我。」北賢繼續困倦地閉起雙眼。


「冇情講？」


「嗯。」


如是者，我跟北賢的交涉失敗了。


不過之後我沒有放棄，還是持續地煩擾住他，他都能視若無睹地休息著，我只好空手而回。


「呵呵呵～你冇得到想要嘅情報？」走到那段下坡路時，南愚又出現了。


「佢肯定唔清楚十包即溶咖啡嘅價值‧‧‧已經夠我叫幾隊人親身去打探病童嘅下落，仲洗乜靠佢嘅情報。」我坦白地說出效應。


「呵呵，南愚可以講你聽關於「病童」嘅情報，但作為代價‧‧‧‧‧‧」南愚深視著我。


「你要果？」


「我要你幫我做一件事～」南愚又笑呵呵地說：「我南愚從來唔會要求人以物交易。」


「做咩事？」


「幫我去某間醫院，拎番啲嘢～」南愚說。


「邊間醫院。」


「區內附近嘅靈實醫院，我要你幫我去五樓嘅宿舍～搵番啲嘢。」南愚對我蠢蠢地微笑：「一張相。」


「相？乜相。」


「同時你每個抽屜都拉開嚟睇下，自然會搵到一張有我樣嘅相～呵呵，搵到返嚟我就會講病童嘅嘢你知。」


「我點解要信你先。」


「病童‧‧‧‧‧‧」南愚食指戳住下唇，想了想：「冇記錯佢係一個女仔～而且係個細路女係咪？呵呵。」


「‧‧‧又唔錯哂。」


「信我吧！要情報，搵南愚！」


「相‧‧‧搵到有你樣嘅相就得？」


南愚點頭：「放心吧～醫院個到好安全，只係比較遠我唔想親身去拎返姐‧‧‧‧‧‧呵呵。」


「我睇下點。」


在晨起之前，我就返回到大本營中。


我跟大舊問起了靈實醫院的情況，他答我搜索隊暫時未去到如此遙遠的地方，所以情況暫時不明。


所以，我想到個一石二鳥之計，或者應該說是一舉兩得。


學堂中。


「砰」我如常地推開了門，進入到班課說出今日的重點：「你哋都受訓咗成一個月？有時仲吟我幾時出去，今日‧‧‧‧‧‧我就要揀出一啲出去嘅成員。」


我簡單交代完今天的內容後，向來會熱烈討論、和應的班上學生，都靜了下來，你眼望我眼。


「‧‧‧」


「點？有冇人自願，我只會揀出兩隊人。」我補充一句：「機會難得。」


「老‧‧‧老師‧‧‧‧‧‧會唔會太過快‧‧‧同埋‧‧‧太急？」一位同學舉手問。


「你哋會有一星期去準備，而且我一向主張實戰。」我冷冷地反問一句：「你認為每日坐喺大本營，拎住枝木棍毆你身邊扮病者嘅朋友‧‧‧就真係識得殺病者？」


「我參加！」瑜小六第一個舉手，她亦是身為「病者攻擊學」班中暫時最高分的學霸。


「好，瑜小六第一個舉手去送死，仲有冇第二個？」我雙手撐住教師桌，身體傾前，問：「平時最串話要我快啲帶你哋行出大本營殺病者嗰幾個喺邊？」


「Chirs？阿璋、奧迪、阿文，你幾個平時最睇唔起我嘅教學方式，仲唔舉手出去？」我又說。


平時堂上最愛對我教的東西冷嘲熱諷當笑話的學生，現在都低住頭，不敢說話或是跟我雙眼直視。


「奧迪，你唔係話過要一拳打飛哂啲病者？」我繼續說。


「我‧‧‧我講笑姐‧‧‧老師‧‧‧唔洗真係‧‧‧‧‧‧」奧迪額頭漸漸滲汗：「唔洗真係叫我出去啊‧‧‧」



「喂！洗乜驚姐‧‧‧佢睇唔起我哋喎！」那個只有一米六的阿文，暗地捏了捏奧迪的手臂。


「阿文，你想參加？」我望向他。


「參‧‧‧加咪參加囉！驚春咩！」阿文抱住手，裝作沒什麼特別。


心裡怕得要死吧。


「Chirs，你成日都自作聰明，要唔要都出埋去一份？」我問。


「我唔會陪你哋癲‧‧‧‧‧‧」Chirs很快地站起，離開課室：「我只係嚟聽書‧‧‧冇話過要行出大本營。」


「果然，」我淺淺一笑，當著全班的面嘲笑他：「係個膽小鬼。」


Chirs聽後後腦蓋莫名地起火，咬住牙點點頭：「‧‧‧‧‧‧好。」


「我有冇聽錯？大聲啲。」


「好啊！我就陪你行出去。」Chirs指住我，雙目怒瞪：「一陣間有病者撲到你身上，唔好怪我唔救你啊！」


「好，大家為佢鼓掌。」我輕輕地拍手，說：「膽小鬼終於鼓起勇氣。」



「之後‧‧‧」我再走到一聲不發的公仔和娃娃面前，手放他們兩人的膊頭：「你兩個，以為實冇你哋份？」


「‧‧‧‧‧‧」今天公仔和娃娃兩兄妹的穿搭經過一番心思，一起穿了暗黑系穿搭服飾，氣質感覺上很靈氣。


「你哋屋企人咁憎大本營嘅寄生蟲，睇怕都唔會想你兩個做寄生蟲‧‧‧‧‧‧」我拍了拍他們的灰髮一下，轉身回到教師桌前：「一星期後，我要見埋你兩個出現。」


「就咁決定，一星期之後。」我在白板上逐一寫上會出外實習的學員名字：「瑜小六、阿文、奧迪、傻仔Chirs、公仔同娃娃，六個人唔多亦唔少。」


「點解要叫我傻仔？仲有，我覺得自己同唔到呢班人合作。」Chirs又擺起自以為事的嘴臉。


我無視Chirs的發言，徑自說下去：「小六，你暫時學分最多‧‧‧經驗都最多，到時你做小隊長。」


「小隊‧‧‧長？」瑜小六不明這職位的意思。


「如果我到時身不由己‧‧‧‧‧‧就由你指揮佢哋。」我說。


「阿Sir‧‧‧我冇話去喎‧‧‧‧‧‧！」奧迪連語氣也十分驚青。


「你唔係話要一拳打飛哂班病者？」


「講‧‧‧講下笑姐‧‧‧‧‧‧」


「我冇咁多時間同你講笑。」我望了被選中的學生一眼，說：「三日之後，嚟學堂等，帶你哋去揀武器。」


我離開學室後，班房隨即一片討論，我準備帶學生出外實習活動的事情，也在短短一、兩天散播到給整個大本營的人知道。

幾乎我經過那裡，旁邊的人就會討論我，或是凝望住我。更有老一輩的人在廣場公開討論我的不是，說我不應該帶年紀輕輕的青少年學生外出。


不過，什麼都阻不了我的計劃。



三天後。


「打好精神未？」我早就在學堂等著他們。


「打好。」瑜小六點頭。


公仔跟娃娃跟我視線對上後，兩兄妹才怯懦地點一點頭。

至於奧迪，亦被阿文這位好朋友拉住過來。


只欠Chirs沒來，


看來‧‧‧


「我哋唔好再等個膽小鬼。」我準備領他們下去市集。



「等陣！」Chirs及時出現。


「仲以為你唔敢嚟。」我一笑帶過，帶他們下去熱鬧的大本營市集。