《病港》: 100

「因為我哋都係同一類人‧‧‧？」神神化化的班尼走到一張桌子上，拿起一個粉蓋膠盒。


他把盒子打開，裡面是一塊塊發霉的麵包，而且入面有不少麵包蟲在毛茸茸地移動，令人毛骨悚然。


「只係鐘意比較特別嘅嘢‧‧‧‧‧‧就要受人侮辱、卑視。」班尼捉起一條麵包蟲，放到自己飼養著的蜥蝪中：「點解人嘅價值觀，一定要同大部份一樣先叫正常‧‧‧」


這麼一看，班尼在這間殘舊的房子中，還飼養了甲蟲、蟑螂、老鼠等寵物，令人有點心寒。






「點解你會鐘意病者？」我主動問出，一條基本問題。


「因為‧‧‧」班尼手也不洗，又咬住碰過麵包蟲的手指：「我鐘意佢哋個一套混亂嘅生存方式。」


「‧‧‧」






「其實不良人嘅生存方式頂多叫邪惡‧‧‧」班尼想得太入神，一不小心就咬損了指頭：「但病者嘅生存方式，就係混亂！我覺得好附合人類‧‧‧‧‧‧而且你睇下大眼‧‧‧佢眼睛水汪汪，邊會有人忍得到心，落手殺佢？」


「病者會攻擊人類，人類反擊係理所當然。」我指出班尼錯誤的觀點，說：「而且冇人會追求混亂‧‧‧‧‧‧」


「所以好少人會認同我哋～？」班尼攤開雙手，嘆氣：「你就唔覺病者佢哋好可憐？」






「有幾可憐？」


「佢哋唔同人類咁有機心。」班尼走到我面前，向我解說著病者的美好：「佢哋活潑好動！佢哋形態不同‧‧‧每一個都係獨特嘅個題‧‧‧同佢哋相處唔需要受到歧視嘅目光，唔需要語言，單純用個心去感受。」


「你喺病者面前，佢哋唔殺咗你‧‧‧‧‧‧我跟你姓。」我說。


「當然～我認為呢種內心本善嘅物種，係可以慢慢教化，就好似人類咁慢慢建立一個文明社會。」班尼說著異想天開的事情。


「咁對你有乜好處。」我望向滿身用衣物頸巾等布料包裹住的班尼。






「‧‧‧」班尼搖一搖頭，說：「我係為大家好。」



他回避的目光，告訴我有所隱瞞。


「你從一開始就鐘意呢啲嘢？」我走到桌子上，望住他畫的一幅畫。


畫作是用鉛筆掃描而成的，繪畫的內容是一隻穿住婚紗的舌女，一旁有著班尼的注名──Benny。


「每個人鐘意某啲嘢～都總係出自某些原因。」班尼拿起檯角那杯，不知放了多久的威士忌、喝下：「因為‧‧‧我覺得佢哋有親切感？嘰嘰。」






「親切感‧‧‧」到目前為止，只有大BOSS是能夠對人類釋出善意的病者。


難道班尼他，也有此種奇遇？


「你要唔要杯？」班尼在老舊的木桌下，取出一樽甘黃的威士忌：「同酒一樣，嘰～你開頭會好抗拒，之後越飲就越入口。」



我望住威士忌中淹死了的幼年老鼠：「唔洗客氣。」


「喔？」班尼望望酒中的死鼠，嘰嘰笑說：「唔好介意！用佢嚟泡釀啲酒都特別香醇。」






「你口味果然好特別。」


「你點解要隱藏住全身？」班尼問了一條我意想不到的問題。


「我諗我哋嘅對話要結束。」我沒興趣回答他的問題。


「唔好‧‧‧」班尼伸出一隻手向我，說：「我叫你嚟係有目的。」


早知道，






他不會單單叫我來，純粹看看他的病者小手工藝品。


「講。」


「我份人特別鐘意喺出面遊蕩‧‧‧除咗可以獵殺人類拎到物資之外，仲可以觀察下病者嘅一舉一動，就好似去動物園睇熊貓一樣咁過癮‧‧‧」班尼眼神放空，說：「直至有一日，我喺外面發現咗一隻從來冇出現過、冇人提及過嘅病者！我對佢充滿好奇‧‧‧想知道佢嘅行為、癖好、特性，可惜嘅係！佢警戒心實在太強，我捕捉唔到佢‧‧‧」


「形容一下當時嘅佢。」我說。


班尼咬住手指，顯得趣味非常地說：「佢當時拖住一條屍體‧‧‧拖啊拖‧‧‧拖啊拖‧‧‧‧‧‧我仲以為對方係人類。所以我就喺草叢入面望足咁耐，直至見到佢嘅正面‧‧‧發現係一隻滿臉紅點嘅病者時，我幾乎開心到笑咗出聲‧‧‧‧‧‧」


「‧‧‧」拖住屍體的？


「但即使係咁微弱嘅笑聲‧‧‧蚊咁細！佢都聽得到‧‧‧仲好警惕咁左望右望‧‧‧‧‧‧」班尼說。


「對方全身著住黑色嘅衫袍‧‧‧包到好實？」我望住班尼，先問一下外觀：「就好似你咁。」


那天我和白魂見到，拖拉住屍體的‧‧‧‧‧‧是病者，不是人嗎？


「有好多嘢先親眼去睇過先知。」班尼想以誘惑的目光令事情添上詭秘，但我當作聽著個瘋子說話：「想唔想知道，點解呢個世界咁乾淨？」


「‧‧‧」


「因為一切都有佢喺到工作，」班尼向我招手，離開學校隱蔽的地下室：「跟我嚟。」



對於班尼的說話，我一面懵然。


但是對於不良人，我也保持住一定的警戒。


「去邊？」我問。


「去帶你認清，默默為世界服務住嘅小可愛‧‧‧。」他答。


班尼出去之前，在這個牆身、地板都是木製的地下室中，拿了一個水袋、火機、木棍，還有一塊手掌大細的油油物體‧‧‧說不出是什麼東西來。


感覺好像是動物的脂肪，黃黃的油質帶點裡白。


「要唔要試啖‧‧‧？」班尼見我目光都放在那物體之上，便說：「係野狗嘅脂肪‧‧‧‧‧‧割咗落嚟有好多用途，包括食。」


「你用脂肪嚟做點火嘅燃料？」看來看去，我都只看出有這個組合。


「係～呢啲係班尼嘅小智慧。」班尼小聲、陰沉地自笑：「世界過多幾年‧‧‧仲點會仲有電池？呢家自備定脂肪當點燃光火嘅燃料差唔多‧‧‧‧‧‧」


他又說得有點道理。


只要病者一天還存在於世界中，世界便不能保持平衡，平衡不了就沒有社會，沒有社會則要返回原始的生活，沒有電。


我不禁暗地佩服，班尼的未雨綢繆。


「你想帶我去邊？」我跟在班尼他後面。


「跟我嚟，你會大開眼戒。」班尼徑自地說著。


離開地下室後，他走到小學的圍牆前捉住依附牆身生長的蔓藤爬了上去，借此不經大閘就能跨越出去。


「點解要咁爬出嚟？」我望住圍牆上的他。


「冇人會發現我哋出咗去！」他說。


雖然不知道他會帶我到哪去，但感覺他好像發現了一個不得了的地方，直覺與好奇的驅使下，令我也捉住了蔓藤爬出去了。


「噠──」我們二人一同跳落到學校外面。


之後，班尼便繼續領路：「你見到就會覺得好偉大‧‧‧人類冇必要瘋狂屠殺病者。」


他帶到我去到向北的海皮一帶，之前大本營的賴三帶過我們去釣魚的地方，是個東風徐徐的地方。


大海、微風和藍天，一個很棒的地方。


但任它多美，人們只要在街外都不能放鬆心情的去觀賞，不然就會換作自己被病者觀賞。


「爬落去！」班尼跨過鐵欄，到海旁下的石壆。


在石壆上走要有點小心，因為石與石之間都不免有著空隙，踏錯腳入去的話可能會被困住。


走下去才發現，整條海濱長廊有著自己的排水口，面積足夠讓一型貨車駛進去，不過被排口位的鐵製隔物渠口，只要稍為不太胖的人都能夠側住身穿入去裡面。


「要入去？」我始才開始明白他帶火把物料來的用意。


「冇錯‧‧‧！」班尼把動物脂肪裡在木棍上，再用火機點燃起脂肪，讓它成為燃料：「比起布碎、廢紙，用脂肪可以燒得仲耐，仲會有淡淡嘅脂肪香‧‧‧真係令我越嚟越肚餓‧‧‧‧‧‧」


在黑暗的排渠口中，水位只淹到我們的腳膝位置，不算太深。班尼手上的火把「啪啦啪啦」地燃燒著，脂肪的黃油亦一滴一滴徐徐地掉到水中，就好像燒烤時去烤豬、雞排一樣。


我們走到哪，那裡就會綻發出溫暖的火光，除了照明之外也起了安慰心靈的作用。要知道，一個人身處於黑暗太久，就會被內心的畏懼所侵吞。


因為人生出來以後，經過社會的洗禮‧‧‧‧‧‧總沒可能潔白如紙。


一旦置身於黑暗，那些負面的想法就會通通到來了。


「嘰‧‧‧嘰嘰‧‧‧吱‧‧‧」老鼠的聲音，跟班尼奸笑時相差無幾。


「好好地‧‧‧‧‧‧你點解會嚟呢啲地方。」我問。


「世界上有好多人享受見光‧‧‧亦都有，好多人鐘意收藏自己喺黑暗入面‧‧‧」班尼隔住圍巾，抓一抓自己發癢的臉部：「我發現咗個隻拖住屍體行嘅病者之後，就一直跟蹤佢‧‧‧跟蹤到佢嚟呢到。」


「呢到‧‧‧係佢嘅地盤？！」


「無錯‧‧‧嘰嘰，盜屍賊嘅地盤！」班尼笑聲真像老鼠。


「盜屍賊，個隻病者嘅名？」


「係！而且我相信，得我一見過‧‧‧」班尼開始說出一大段話，說明它的存在：「佢哋靈敏‧‧‧膽小！好少會見光‧‧‧或者暴露喺人嘅面前。」


「仲有‧‧‧‧‧‧陀背？」我說出，上次見到那個拖住屍體的不明人的特徵。


「無錯！」班尼答。


可惜，上一次它是背對住我們而行，加上渾身穿住了乞丐般的污衊黑袍，使我看不到其身上的紅點。


原來的確是一隻病者‧‧‧


而且，更是一隻有如「隱藏角色」的病者。


使我對它的興趣更為濃些，我對病者的研究真是出於厭惡嗎？


正常人面對班尼莫名其妙的病者探險邀請，都會馬上拒絕才是理所當然‧‧‧‧‧‧為什麼我會跟了上來。


轉眼間，我們已經在幽黑、腥臭的下水道，行了不知多久。這裡不見天日，也完全沒方向感可言，就活像一個複雜的大迷宮。


我能做，只有一直跟住班尼前進。


「你知道點行入去佢地盤？」我問。


「當然知‧‧‧」他指一指自己鼻孔，說：「腥臭味越係濃烈‧‧‧‧‧‧就代表越近。」