[真人真事][校園][純愛]《婚宴上的重遇》: 第二章

點解我會呆左一呆
係因為見到一個好靚嘅女仔喺櫃面
負責收銀同埋落單,
我之前從來未見過呢個女仔
所以我估佢係近期先入嚟麥當勞做
唔係講笑,
我真係覺得佢好靚
瓜子面,
眼大大,
好有靈氣


皮膚又好白
喺面上搵唔到任何嘅瑕疵
典型女神樣
但喺我心目中,
就一啲都唔常見
係咪我見過最靚嘅女仔
我唔敢講,
但我可以好肯定咁答你,
呢個麥當勞女員工,
係我咁耐以嚟,


俾到最大衝擊我嘅女仔
隨住我排緊嗰條收銀隊愈嚟愈短,
我同嗰個女仔就愈嚟愈接近
咁梗係啦
佢係員工我係食客,
我地一定會有接觸架
嗰陣我好想快啲到我買野食
但又好驚同佢講野,
我啲老毛病又嚟
都唔知點算好


依家諗返起真係好毒
普通叫野都咁鬼淆底
其實就冇野好驚
冇計啦,
鬼叫我咁毒咩
跟住終於到我買野食喇,
近望先發現
佢真係一啲瑕疵都冇
有啲女仔遠望好靚,
因為睇唔清楚
但係到近望嗰陣就覺得冇預想中咁靚
呢個麥當勞女員工就唔係
近望同遠望都係咁出眾
麥當勞女員工:「先生要啲乜野咁呢 」
不得了呀


佢連把聲都好好聽
其實講真,
我對聲音冇乜要求
基本上唔係老牛聲就已經可以,
咁呢位麥當勞女員工當然唔係老牛聲啦
所以已經好滿足
不過死火喇,
頭先掛住望佢,
唔記得嗌野食
要佢提我
都唔知會唔會俾佢見到我望住佢,
一陣以為我係痴漢咪死
所以都係拿拿臨講:「脆辣雞腿包餐飲可樂
喺度食,唔該 」
麥當勞女員工:「好,


唔該幾多蚊丫先生唔該 」(幾多蚊=當時嘅價錢,我真係唔記得左幾錢 )
估唔到呢個女員工咁好禮貌
竟然會講返唔該
你都唔知我幾慘,
平時我去麥當勞買野食,
未試過有人同我講唔該架
呢個女員工,
人靚聲甜不特止
仲要咁好禮貌
無論外在定係內在,
女神呢個名當之無愧
真係好似神一樣
當然啦,
我唔否認我係偏幫佢
講一句唔該都咁樣讚法


吹呀係咪唔得丫
落完單之後我就坐喺其中一張枱嗰度等攞野食
同埋望住佢,
雖然咁樣真係好似一個痴漢
不過我都唔會理架啦
望得幾多得幾多
直至佢大聲講:「脆辣雞腿包餐齊喇.」
我先行出去拎
跟住坐返頭先嗰個位,
咁樣我就可以一路食
一路望住一個咁精緻嘅面孔
我好記得我嗰陣特登食得慢啲,
一啖一啖咁樣吞落肚
平時十分鐘食完一個餐,
喺嗰日,


我竟然用左半個鐘先食完
之後再慢慢咁樣飲可樂,
結果我足足係嗰度逗留左九個字
跟住先離開麥當勞,
返屋企繼續溫生物.

嗰晚我喺度諗,
明明大家只係萍水相逢
大家都唔識大家,
只係見左一日
點解我會係咁諗住佢嘅
我好少喺街上面見到一個女仔之後,
返到屋企會係咁諗住佢
基本上成個腦都係佢,
當然會有好多ff啦
嗰個感覺好怪,
一方面我又喺度鬧自己
佢都唔知你係乜水,
你喺度掛住人做乜野呀
佢又唔會知你諗住佢嘅,
自己又辛苦
但又唔忍心唔諗住佢
自己都唔知自己做乜,
我肯定自己嗰啲死人性格,
一定唔會敢撩佢傾計
肯定淆底
正當我唔知有咩辦法嗰陣,
我個腦就諗到一條絕世好橋